امیر جماعت اسلامی کراچی حافظ نعیم الرحمان نے سندھ میں حکومت بنانے کا دعویٰ کردیا۔
ایک بیان میں حافظ نعیم الرحمان نے کہا کہ دیہی علاقوں سے بھی بڑی تعداد میں امیدوار کھڑے کیے ہیں، جماعت اسلامی کےعلاوہ کسی کو ووٹ دیا وہ گھوم کر وڈیروں کے پاس جائے گا۔
انہوں نے کہا کہ آج ہم نے این اے 250 کے لیے کاغذات نامزدگی جمع کروائے ہیں، کوشش ہے قومی اسمبلی کے 22 اور صوبائی کی 47 نشستوں پر آج ہی کاغذات جمع کرادیں۔
نعیم الرحمان کا کہنا تھا کہ ہم چاہتے ہیں ووٹ ڈالنے جائیں تو جماعت اسلامی کے علاوہ کوئی آپشن نہ ہو، 15 سال میں پیپلزپارٹی نے صوبے کو برباد کیا، تمام شعبوں کا برا حال ہے، لہٰذا جماعت اسلامی کا مینڈیٹ ہونا ضروری ہے۔
امیر جماعت اسلامی کراچی نے کہا کہ ایک دفعہ سندھ حکومت میں جماعت اسلامی آجائے تو حالات بہت بہتر ہوں گے، کراچی کے عوام کو جلدی خوش خبری ملے گی برے دن ختم ہونے والے ہیں۔
