شہریوںکیلئے مشکلات پیدا کرنیوالوں کیخلاف بلاامتیاز کارروائی ہوگی:فیصل کامران

لاہور (کرائم رپورٹر) آئی جی آپریشنز فیصل کامران نے کہا ہے کہ شہریوں کیلئے مشکلات پیدا
کرنے والوں کے خلاف بلاامتیاز کارروائی ہوگی۔ فیصل کامران نے کہا کہ شہری ایسے عناصر کی اطلاع پولیس کو 15 پر دیں۔ لاہور پولیس آپریشنز ونگ نے فوری رسپانس کرتے ہوئے خواتین اور بچوں کے خلاف جنسی جرائم میں ملوث13 ملزمان کو گرفتار کرلیا۔ ترجمان ڈی آئی جی آپریشنز کے مطابق سات سالہ بچی سے مبینہ زیادتی کی کوشش کرنے والا ملزم کاشف گلبرگ پولیس نے گرفتار کر لیا۔ اسی طرح نوانکوٹ پولیس نے بچی سے مبینہ زیادتی کی کوشش کے الزام میں ملزم حمزہ کو گرفتار کر لیا جبکہ ساندہ اور مصطفی ٹائون میں بچوں سے بدفعلی کی کوشش کے مقدمات درج کرکے ملزمان احمد اور عرفان کو گرفتار کیا گیا۔ ڈیفنس سی پولیس نے خاتون سے مبینہ زیادتی کی کوشش کے الزام میں ملزم عبدالودود کو گرفتار کر لیا اور نوانکوٹ پولیس نے خاتون سے مبینہ زیادتی کی کوشش کے الزام میں ملزم حسن کو گرفتار کرلیا۔ اسی طرح خواتین پر تشدد کے مختلف واقعات میں7 ملزمان گرفتار کرلیے گئے جن کے خلاف قانونی کارروائی جاری ہے۔ ترجمان ڈی آئی جی آپریشنز نے کہا ہے کہ والدین کی بروقت توجہ بچوں کو جرائم اور استحصال سے محفوظ رکھنے میں اہم کردار ادا کرتی ہے۔ ڈی آئی جی آپریشنز فیصل کامران نے کہا ہے کہ خواتین اور بچوں کے خلاف جرائم پر زیرو ٹالرنس پالیسی ہے۔ فیصل کامران نے کہا کہ خواتین اور بچوں کا تحفظ لاہور پولیس کی ترجیحات میں شامل ہے۔