لاہور (خصوصی رپورٹ)حکومت کیخلاف تمام اپوزیشن جماعتوں کو متحد کرنے کیلئے مسلم لیگ کے مرکزی صدر چودھری شجاعت حسین سرگرم ہوگئے ہیں، وہ آج کراچی روانہ ہوں گے جہاں پیپلزپارٹی رہنما آصف علی زرداری سے ملاقات کریں گے جس میں ملک کی سیاسی صورتحال اور مستقبل کے لائحہ عمل کی منصوبندی کریں گے۔ تفصیلات کے مطابق سابق صدر پاکستان آصف علی زرداری کی وطن آمد سے ملک میں سیاسی صورتحال میں گہماگہمی نظر آرہی ہے آصف علی زرداری مختلف سیاسی جماعتوں اور دیگر شعبوں سے تعلقات رکھنے والے افراد سے ملاقاتیں کررہے ہیں اس حوالے سے مسلم لیگ ق کے مرکزی صدر چودھری شجاعت حسین جو ایک عرصہ سے تمام اپوزیشن جماعتوں کو اکٹھا کرنے کیلئے کوشاں ہیں وہ آج کراچی روانہ ہوں گے جہاں وہ مسلم لیگ ق کی صوبائی قیادت سے ملاقاتیں کرنے کے ساتھ ساتھ پیپلزپارٹی کے رہنما آصف علی زرداری سے بھی ملاقات کریں گے، ذرائع کے مطابق اس حوالے سے دونوں پارٹیوں کے رہنماﺅں نے اس امر کی تصدیق بھی کی ہے۔
