رواں سال کا پہلا فیچر ٹک ٹاک صارفین کی بڑی مشکل میں معاون ثابت ہوگا

لاہور: (ویب ڈیسک) ٹک ٹاک صارفین کی جانب سے اکثر شکایات کے بعد ایپ انتظامیہ نے نیا فیچر متعارف کروانے کی ٹھان لی۔
کمپنی کی جانب سے ایک نیا فیچر متعارف کرایا جا رہا ہے جس کا مقصد مناسب وقت تک نیند کو یقینی بنانا ہے، کمپنی کی جانب سے نئے فیچر سلیپ ریمائنڈرز کی آزمائش کی جا رہی ہے۔
اس فیچر کے تحت سونے کے وقت کے الرٹس لگانے جبکہ نیند کے دوران نوٹیفکیشنز کو میوٹ کرنے جیسے آپشنز دستیاب ہوں گے، نئے فیچر کی آزمائش دنیا بھر میں صارفین کی محدود تعداد میں کی جا رہی ہے، یہ نیا فیچر سکرین ٹائم سیٹنگز میں سلیپ ریمائنڈرز کے نام سے موجود ہوگا۔
کمپنی نے بتایا کہ اس فیچر سے صارفین کو ٹک ٹاک پر سکرولنگ کے دوران معلوم ہوسکے گا کہ اب ان کے سونے کا وقت ہوگیا ہے، اس کے لئے صارفین کو سونے کے ایک وقت کو سلیکٹ کرنا ہوگا اور وہ وقت قریب آنے پر ایپ کی جانب سے یاد دلایا جائے گا کہ نیند کا وقت آگیا ہے۔
اس کے ساتھ ساتھ پش نوٹیفکیشنز 7 گھنٹوں کے لئے میوٹ ہوجائیں گے تاکہ صارف کی نیند متاثر نہ ہوسکے۔
ٹک ٹاک کے ایک ترجمان نے بتایا کہ ہم صارفین کی بہتری کے لئے متعدد نئے ذرائع پر کام کر رہے ہیں اور یہ نیا ٹول بھی اسی مقصد کے لئے تیار کیا گیا ہے۔
یاد رہے کہ اس سے قبل ٹک ٹاک نے فروری 2020 میں سکرین ٹائم منیجمنٹ ٹولز متعارف کرائے تھے اور اس کے بعد سے ایسے متعدد فیچرز کا اضافہ کیا گیا جو صارفین کو ایپ کے استعمال کے حوالے سے زیادہ اختیار فراہم کر سکیں۔