سابق جنوبی افریقی فاسٹ باؤلر مورنے مارکل قومی ٹیم کے باؤلنگ کوچ مقرر

لاہور: (ویب ڈیسک) پاکستان کرکٹ بورڈ (پی سی بی) نے جنوبی افریقہ کے سابق فاسٹ باؤلر مورنے مورکل کو پاکستانی کرکٹ ٹیم کا بولنگ کوچ مقرر کردیا۔
تفصیلات کے مطابق پاکستان کرکٹ بورڈ (پی سی بی) کا قومی ٹیم کے باؤلنگ کوچ کے لیے سابق جنوبی افریقی فاسٹ باؤلر مورنے مورکل کے ساتھ باضابطہ معاہدہ ہو گیا، پی سی بی کی جانب سے انہیں 6 ماہ کا کنٹریکٹ دیا گیا ہے۔
ذرائع کے مطابق عمرگل کو پاکستان کرکٹ بورڈ نے عبوری باؤلنگ کوچ مقرر کر رکھا تھا، تاہم اب اس عہدے کے لیے عمر گل اور مورنے مورکل میں سے کسی ایک کو چننا تھا، ٹیم ڈائریکٹر مکی آرتھر نے مورنے مورکل کے حق میں ووٹ دیا۔
خیال رہے کہ پاکستان اور سری لنکا کے درمیان جولائی میں 2 ٹیسٹ میچوں پر مشتمل سیریز ہونی ہے، سری لنکا کے خلاف ٹیسٹ سیریز کے لیے قومی کھلاڑیوں کا کیمپ جولائی کے پہلے ہفتے میں کراچی میں لگے گا جس کے بعد کھلاڑی سری لنکا کے لیے روانہ ہو جائیں گے۔