لاہور(ویب ڈیسک) چیف جسٹس پاکستان جسٹس ثاقب نثار نے اسلام آباد ایئرپورٹ پر گلگت بلتستان کے وزیر فدا محمد کی جانب سے حکام کو دھکے دینے کا نوٹس لے لیا ہے۔زرائع کے مطابق چیف جسٹس پاکستان جسٹس ثاقب نثار نے گزشتہ روز اسلام آباد ایئر پورٹ پر گلگت بلتستان کے وزیر سیاحت فدا محمد کی جانب سے حکام کے ساتھ بدتمیزی اور انہیں دھکے دینے کے واقعے کا نوٹس لے لیا ہے۔ چیف جسٹس نے گلگت بلتستان کے وزیر فدا محمد خان اور پی آئی اے حکام کو کل لاہور رجسٹری پیش ہونے کا حکم دے دیا ہے۔دوسری جانب گلگت بلتستان حکومت کے ترجمان نے اپنے بیان میں کہا ہے کہ پہلے گلگت بلتستان کے وزراءکے ساتھ بدتمیزی کی گئی، وزیرسیاحت فدا خان کو عملے نے جھوٹ بول کر جذباتی کیا، معاملہ رفع دفع ہوگیا ہے اور اگر وزرا کے رویئے سے کسی کی دل آزاری ہوئی تو معذرت کرتے ہیں۔واضح رہے کہ اسلام آباد ائیر پورٹ پر موسم کی خرابی کے باعث فلائٹ تاخیر کا شکار ہوئی تو صوبائی وزیر فدا حسین آگ بگولہ ہوگئے اور شفٹ انچارچ سے بدتمیزی کی اور دھکے دیئے تھے۔ صوبائی وزیر کی جانب سے کی جانے والی بدتمیزی کی ویڈیو ایئر پورٹ پر موجود کسی نامعلوم شخص نے اپنے موبائل فون کیمرے میں عکس بند کرلی تھی، ویڈیو سوشل میڈیا پر وائرل کردی گئی اور الیکٹرونک میڈیا کے ذریعے یہ خبر پورے ملک میں پھیل گئی۔

کراچی(ویب ڈیسک) اومنی گروپ کے مالک انور مجید کو راہداری ریمانڈ پر کراچی سے لاہور منتقل کرنے کی تیاریاں مکمل کرلی گئی ہیں۔ ذرائع کا کہنا ہے کہ سابق صدر آصف زرداری کے قریبی ساتھی اور اومنی گروپ کے مالک انور مجید کو راہداری ریمانڈ پر کراچی سے لاہور منتقل کئے جانے کی تیاریاں مکمل کرلی گئی ہیں۔انور مجید کو کل سپریم کورٹ لاہور رجسٹری میں پیش کیا جائے گا، ذرائع کے مطابق ایف آئی اے نے حوالات کی سکیورٹی کے لیے 10 ٹیمیں تشکیل دیدی ہیں، ہر ٹیم کی سربراہی اسسٹنٹ ڈائریکٹر کے عہدے کا افسر کرے گا، تمام افسران کا ڈیوٹی روسٹر بھی جاری کر دیا گیا ہے جب کہ ہر ٹیم 4 افسران پر مشتمل ہوگی۔واضح رہے کہ انور مجید کا تعلق سابق صدر آصف زرداری کے قریبی ساتھیوں میں ہوتا ہے جب کہ انور مجید کے خلاف 74 ارب کی منی لانڈرنگ کا کیس چل رہا ہے۔

اسلام آباد/ پشاور(ویب ڈیسک) ایس پی طاہر داوڑ کے اغوا اور قتل کی تحقیقات کے لیے جے آئی ٹی قائم کر دی گئی جب کہ شہید کے لواحقین کے لیے ڈیڑھ کروڑ روپے کی امداد کا اعلان کردیا گیا۔ذرائع کے مطابق افغانستان میں شہید ہونے والے ایس پی طاہر داوڑ کے اغوا اور قتل کی تحقیقات کے لیے جے آئی ٹی قائم کر دی گئی ہے، جے آئی ٹی 7 اراکین پر مشتمل ہے جس میں پولیس، انٹیلی جنس اور سی آئی ڈی افسران بھی شامل ہیں اور اس کی سربراہی ایس پی انویسٹی گیشن کریں گے۔دوسری جانب خیبر پختون خوا حکومت نے شہید طاہر داوڑ کے لواحقین کے لیے ڈیڑھ کروڑ روپے شہید پیکیج کا اعلان کیا ہے۔ صوبائی وزیر اطلاعات شوکت یوسف زئی کا کہنا ہے کہ ایس پی طاہر داوڑ بی پی ایس 17 میں خدمات سر انجام دے رہے تھے، اس لیے کے پی حکومت نے ان کی بہترین خدمات اور شہادت پر پیکیج کا اعلان کیا جس میں مالی امداد اور پلاٹ بھی شامل ہے۔شوکت یوسف زئی کے مطابق شہید ایس پی کی 60 سالہ ریٹائرمنٹ تک ان کی اہلیہ کو تنخواہ دی جائے گی، ان کے ایک بیٹے کو اے ایس آئی بھرتی کیا جائے گا اور شہید کے بچوں کی تعلیم کے لیے اسکالرشپ دی جائے گی جب کہ شہید کی بیوہ اور بچوں کو مفت طبی سہولیات بھی فراہم کی جائیں گی۔واضح رہے کہ طاہر داوڑ کو گزشتہ ماہ اسلام آباد کے علاقے جی ٹین فور سے اغوا کیا گیا تھا اور افغان وزارت خارجہ کے مطابق ان کی لاش ننگر ہار کے ضلع دربابا میں مقامی لوگوں کو ملی تھی جسے انہوں نے پاکستان کے حوالے کیا۔ بی بی سی کے مطابق خراسان ولایہ نامی تنظیم نے طاہر خان کے اغوا اور شہید کرنے کی ذمے داری قبول کی ہے۔

اسلام آباد(ویب ڈیسک)اسلام آباد سے پراسرا طور پر لاپتہ ہونے والے سی ڈی اے کے ڈپٹی ڈائریکٹر ایاز محسود کی ویڈیو منظر عام پر آگئی جس میں انہوں نے اپنی گمشدگی کی تردید کرتے ہوئے کہا ہے کہ وہ ڈی آئی خان میں رشتہ داروں سے ملنے آئے ہیں۔ایاز خان کی اہلیہ نے پولیس کو درخواست دی تھی کہ ان کے شوہر آبپارہ کے قریب اپنے دفتر سے جمعرات کی شام جی 13 گھر جانے کے لیے نکلے مگر گھر نہ پہنچے اور بعد میں رات 8 بجے فون پر بتایا کہ کورنگ ٹاﺅن میں ہیں۔اہلیہ کے مطابق ایاز خان نے فون پر بات کرتے ہوئے تین غیر متعلقہ افراد کے ساتھ ہونے اور پریشانی کا ذکر کیا،اس کے بعدسے ان کا فون مسلسل بند ہے ، ایاز خان کی بیٹی کی ہفتہ کو شادی ہے ، اہلیہ نے ایاز خان کے اغوا کا خدشہ ظاہر کیا تھا۔میڈیا پر خبریں نشر ہونے کے بعد ایاز خان کا ایک ویڈیو پیغام سامنے آیا جس میں وہ اپنی خیریت سے ہونے کی اطلاع دے رہے ہیں، انہوں نے کہا کہ وہ بالکل ٹھیک ہیں اور ڈی آئی خان میں رشتہ داروں کے پاس ہیں۔ایاز خان نے کہا کہ ان کا موبائل فون خراب تھا جس کی وجہ سے وہ گھر والوں سے رابطہ نہیں کرسکے۔

کراچی (خصوصی رپورٹ) سابق وزیر پٹرولیم ڈاکٹر عاصم حسین کی چاق و چوبند حالت میں واک کرتے ہوئے ویڈیو سامنے آ گئی ویڈیو ناظم آباد جم خانہ کی ہے نجی ٹی وی کی جانب سے جاری ڈاکٹر عاصم حسین کی ویڈیو میں دیکھا جا سکتا ہے کہ ڈاکٹر عاصم حسین نے ٹریکنگ سوٹ پہن رکھا ہے اور وہ تیزی سے واک کررہے ہیں اور ان کے ہاتھ میں کوئی لاٹھی بھی نہیں ہے اور وہ بڑے توانا اور چاک و چوبند نظر آ رہے ہیں واضح رہے کہ ڈاکٹر عاصم حسین جب انسداد دہشت گردی یا احتساب عدالت میں پیش ہوتے ہیں تو انہوں نے ہاتھ میں لاٹھی پکڑ رکھی ہوتی ہے اور سر پر ٹوپی پہن کر رکھی ہوتی ہے اور ہاتھ میں تسبیح ہوتی ہے اور وہ عدالت کو ہمیشہ بتاتے ہیں کہ وہ بیمار ہیں۔

لاہور(خصوصی رپورٹ)مسلم لیگ (ن) نے موجودہ سیاسی حالات کی نزاکت کو بھانپتے ہوئے عدلیہ سمیت اہم اداروں کے ساتھ مصالحانہ پالیسی اپنانے کا فیصلہ کرلیا ۔ذرائع کے مطابق مسلم لیگ( ن)کے مشاورتی اجلاس میں طے پایا کہ میاں نوازشریف سمیت سینئر قیادت،عدلیہ سمیت دوسرے اداروں کے ساتھ محتاط رویہ اپنائے گی ،آئین کا مکمل احترام کرنے کیساتھ ساتھ تصادم کی پالیسی سے گریز کیا جائے گا،پارٹی کو احتجاج اور جلا گھیرا کی طرف لے جانے کی بجائے تیل دیکھو اورتیل کی دھار دیکھو کی پالیسی پر سیاست کی جائے گی۔ذرائع کے مطابق مسلم لیگ( ن)کے مشاورتی اجلاس میں نئی پالیسی سے رہنماں اور ارکان اسمبلی کو آگاہ کر دیا گیا ۔مشاورتی اجلاس میں یہ بھی طے پایا کہ حکومت کی عوام دشمن پالیسیوں پر تحریک انصاف کو پارلیمینٹ کے اندر اور باہر بھرپور ہدف تنقید بنایا جائیگا۔