اسلام آباد (خصوصی رپورٹ) سابق وزیراعظم میاں محمد نوازشریف کی احتساب عدالت پیشی کے موقع پر معمر خاتون تحصیل ممبر راولپنڈی میونسپل کارپوریشن آپا زبیدہ نے سابق وزیراعظم سے درخواست کی کہ ایم پی اے کی خصوصی نشست پر پارٹی کیلئے انہوں نے اپنی تمام جمع پونجی کے علاوہ ادھار کی رقم سے 75ہزار روپے پارٹی کو دیئے‘ اب مالی حالات سخت کسمپرسی کا شکار ہیں۔ خدا را میری رقم مجھے لوٹائی جائے۔

لاہور(ویب ڈیسک ) سپریم کورٹ نے اینٹی کرپشن مقدمات میں وزیر اعلیٰ کی اجازت دینے کا اختیارمعطل کر دیا ہے . سپریم کورٹ لاہور رجسٹری میں چیف جسٹس پاکستان میاں ثاقب نثار کی سربراہی میں تین رکنی بنچ نے ڈی جی اینٹی کرپشن کی درخواست پر سماعت کی‘ڈی جی اینٹی کرپشن کی طرف سے صفدر شاہین پیرزادہ ایڈووکیٹ پیش ہوئے.ڈی جی اینٹی کرپشن حسین اصغر نے سپریم رجسٹری میں درخواست دائر کی تھی. ڈی جی اینٹی کرپشن نے عدالت میں کہا کہ بڑے بیورو کریٹس کے خلاف کارروائی کے لیے وزیراعلیٰ پنجاب کی اجازت لازمی ہے اور وزیراعلیٰ اجازت نہ دے تو بڑے بیورو کریٹس کے خلاف مقدمہ درج نہیں کرسکتے.عدالت نے اینٹی کرپشن رولز 5، 6 اور 10 کو معطل کردیا اور کہا کہ کسی بھی وزیراعلیٰ سے کرپشن مقدمات میں اجازت لینے کا اختیار غیرآئینی ہے اور سیاسی اجازت لینا تو فوجداری قوانین کی بنیادی روح سے ہی متصادم ہے.سپریم کورٹ نے اینٹی کرپشن انکوائریوں سے متعلق لاہور ہائیکورٹ میں زیر سماعت مقدمات بھی 2 ہفتوں میں نمٹانے کا حکم دیا. دوسری جانب نجی ہسپتالوں سے متعلق کیس کی سماعت کے دوران چیف جسٹس پاکستان نے پرائیوٹ ہسپتالوں کے علاج کے طریقہ کار پر اعتراض اٹھا دیا. سپریم کورٹ لاہور رجسٹری میں پرائیوٹ ہسپتالوں میں مہنگے علاج سے متعلق از خود نوٹس کی سماعت ہوئی.
چیف جسٹس پاکستان میاں ثاقب نثارنے ہسپتالوں کی تعمیر کے بارے میں ڈی جی ایل ڈی اے سے رپورٹ طلب کر تے ہوئے ڈی جی ایل ڈی اے کو تفصیلی رپورٹ 19 نومبر کو پیش کرنے کا حکم دیا. دوران سماعت چیف جسٹس پاکستان نے ریمارکس دیئے کہ ڈاکٹرز ہسپتال اور نیشنل ہسپتال کے بارے میں مطمن نہیں ہوں،پرائیوٹ ہسپتالوں کا یہ مطلب نہیں کہ صرف پیسہ ہی کمانا ہے.

کراچی(ویب ڈیسک) سندھ کے محکمہ اینٹی کرپشن نے پاکستان تحریک انصاف کے رہنما جہانگیر ترین اور سابق وزیراعلیٰ سندھ ارباب غلام رحیم کے خلاف کرپشن تحقیقات کا آغاز کردیا۔جہانگیر ترین اور ارباب غلام رحیم پر سابق صدر پرویز مشرف کے دور میں کراچی میں انڈسٹریل پارک کے منصوبے میں کرپشن کا الزام ہے۔اینٹی کرپشن حکام کے مطابق 2004 میں کراچی کے علاقے کورنگی میں ڈھائی ارب روپے کی 250 ایکڑ زمین غیرقانونی طور پر این آئی پی نامی کمپنی کو الاٹ کی گئی۔حکام کے مطابق کمپنی کے سی ای او جہانگیر ترین کے قریبی دوست تھے اور زمین کی الاٹمنٹ سے جہانگیر ترین اور ارباب غلام نے ذاتی فائدے حاصل کیے۔اینٹی کرپشن حکام کے مطابق کہا گیا تھا کہ زمین پر انڈسٹریل پارک بنایا جائے گا، جس کا افتتاح ملائشیا کے وزیراعظم کریں گے۔حکام کے مطابق نجی کمپنی کو زمین سندھ کابینہ کی منظوری کے بغیر دی گئی، اس سلسلے میں ریٹ کمیٹی سے زمین کی مالیت کا تخمینہ اور اجازت بھی نہیں لی گئی اور قیمتی زمین کو 50 ہزار روپے فی ایکڑکے حساب سے الاٹ کردیا گیا۔اینٹی کرپشن حکام کے مطابق 2004 سے سندھ حکومت کو زمین سے کوئی ریونیو نہیں ملا اور سرکاری زمین کے 14 سالوں سے بیکار پڑے رہنے سے قومی خزانے کو نقصان ہوا۔حکام کی جانب سے زمین کی الاٹمنٹ منسوخ کرنے اور تحقیقات میں ملوث افراد کے خلاف قانونی کارروائی کے لیے معاملہ نیب کو بھیجے جانے کی سفارش کی گئی ہے۔

لاہور(ویب ڈیسک) ہیلمٹ کی پابندی سے پریشان شہریوں پر ایک اور پابندی لگ گئی۔ سگنل کے بعد اب ون وے کی خلاف ورزی پر بھی لاہور کے شہریوں پر اعلان ہوگا۔میڈیا رپورٹس میں بتایا گیا ہے کہ سیف سٹی حکام کے مطابق ون وے کی خلاف ورزی جان لیوا حادثات کا باعث ہے۔ ای چالاننگ پر عمل درآمد کروانے کے لیے شہر بھر ٹریفک وارڈنز کو خلاف وورزی کرنے والوں سے متعلق ڈیٹا وائرلیس پر فراہم کیا جائے گا۔سیف سٹی حکام کا کہنا ہے کہ شہری ای چلان بروقت ادا کریں ورنہ ان کی گاڑی کو ٹریفک پولیس کی مدد سے تھانوں میں بند کر دیا جائے گا۔اب تک سینکڑوں ناد ہند گاڑیوں کو تھانے میں بند کیا جاچکا ہے۔خیال رہے پنجاب سیف سٹی اتھارٹی کے تحت الیکٹرانک چالان 23 ستمبر کو شروع کیا گیا تھا جب سے ای چالان کا آغاز کیا گیا ہے روزانہ پانچ ہزار سے زائد چالان کیے جا رہے ہیں۔جب کہ دوسری جانب روالپنڈی کی ضلعی انتظامیہ نے مخصوص علاقوں میں بغیر ہیلمٹ موٹر سائیکل چلانے پر پابندی لگا دی ہے۔پابندی کا نوٹیفیکیشن بھی جاری کیا جاچکا ہے۔ نوٹیفیکیشن کے مطابق بغیرہیلمٹ موٹرسائیکل سواروں پرمال روڈ،پشاورروڈپرداخلےپرپابندی ہو گی۔بغیرہیلمٹ موٹرسائیکل کےمال روڈ،پشاورروڈداخلےپرپابندی کااطلاق یکم دسمبرسےہوگا۔ڈپٹی کمشنرراولپنڈی نےچیف ٹریفک افسرکی سفارشات پرپابندی عائدکی۔نوٹیفیکیشن میں کہا گیا ہے کہ بغیر ہیلمٹ سگنل ایریاناکےسےکچہری چوک تک موٹرسائیکل نہ چلائی جائے۔ ذرائع کے مطابق پابندی کی خلاف ورزی کرنےوالےموٹرسائیکل سواروں کوگرفتارکیاجائےگا۔مذکورہ مراسلے میں یہ بھی کہا گیا ہے کہ گزشتہ 10 ماہ میں مال روڈ،پشاورروڈپرموٹرسائیکل سواروں کے46سنگین حادثات ہوئے۔10 ماہ میں ہیلمٹ استعمال نہ کرنیوالے16موٹرسائیکل سوارحادثات میں جاں بحق ہوئے۔بغیرہیلمٹ موٹرسائیکل سواروں پرپابندی مفاد عامہ کےپیش نظرلگائی گئی۔یاد رہے کہ اس سے پہلے لاہور میں بھی ہیلمٹ کی پابندی عائد کر دی گئی ہے اور اس پابندی کی خلاف ورزی کرنے والوں کے خلاف ابھی تک ہزاروں چالان کئیے جاچکے ہیں۔

اسلام آباد (ویب ڈیسک) وزیر اعظم عمران خان کا کہنا ہے کہ جو لیڈر یوٹرن نہ لے وہ لیڈر ہی نہیں ہے، نپولین اورہٹلرنے یو ٹرن نہ لے کر تاریخی شکست کھائی۔سینئر صحافیوں سے ملاقات کے دوران گفتگو کرتے ہوئے وزیر اعظم عمران خان نے کہا کہ حالات کے مطابق یوٹرن نہ لینے والا کبھی کامیاب لیڈرنہیں ہوتا، جو یوٹرن لینا نہیں جانتااس سے بڑا بےوقوف لیڈر نہیں ہوسکتا۔ نپولین اورہٹلرنے یو ٹرن نہ لے کر تاریخی شکست کھائی، نوازشریف نے عدالت میں یوٹرن نہیں لیا بلکہ جھوٹ بولا۔خیال رہے کہ وزیر اعظم عمران خان اس سے قبل صحافیوں سے ملاقات میں بھی یوٹرن کے ’ فوائد‘ بیان کرچکے ہیں۔ اپوزیشن جماعتوں کی جانب سے ان پر یوٹرن کے الزامات بھی عائد کیے جاتے رہے ہیں۔انہوں نے اپنے بیان میں مزید کہا کہ شہبازشریف کو چیئرمین پی اے سی بناناملک سے مذاق ہوگا، احتساب قوانین میں ترامیم کی ضرورت ہے، سپریم کورٹ کے فیصلوں پر من و عن عمل کریں گے، دورہ چین توقعات سے زیادہ کامیاب رہا، چین کے ساتھ ہونے والے معاہدوں کی تفصیلات منظر عام پر نہیں لاسکتے۔

اسلام آباد (ویب ڈیسک) : چیف جسٹس آف پاکستان جسٹس ثاقب ثار نے چیف جسٹس کا منصب سنبھالتے ہی اپنی کارکردگی سے لوگوں میں اپنا مقام بنایا اور کم ہی عرصہ میں عوام میں مقبول ہو گئے ، یہی وجہ تھی کہ عوام انصاف کے لیے چیف جسٹس ثاقب نثار سے اپیل کرنے لگی جبکہ جسٹس ثاقب نثار نے بھی عوام کو انصاف دلوانے اور ان کی فریاد سننے کی حتی الامکان کوشش کی۔چیف جسٹس آف پاکستان جسٹس ثاقب نثار آئندہ برس 17 جنوری 2019ءکو ریٹائر ہو رہے ہیں، جس کے بعد سپریم کورٹ کے 8 سینئیر جج صاحبان کو بالترتیب یہ عہدہ سنبھالنے کا موقع ملے گا۔ان 8 ججز میں جسٹس آصف سعید خان کھوسہ، جسٹس گلزار احمد ، جسٹس عمر عطا بندیال، جسٹس قاضی فائز عیسیٰ، جسٹس اعجاز الاحسن، جسٹس سید منصور علی شاہ،جسٹس منیب اختر اور جسٹس یحیٰی آفریدی شامل ہیں۔چیف جسٹس کی ریٹائرمنٹ کے بعد سینئیر ترین جج کو چیف جسٹس کا عہدہ تفویض کیا جاتا ہے۔ 18 جنوری 2019ئکو جسٹس آصف سعید خان کھوسہ چیف جسٹس آف پاکستان کا عہدہ سنبھالیں گے، جسٹس آصف سعید خان کھوسہ 20 دسمبر 2019ءکو ریٹائر ہو جائیں گے،جس کے بعد جسٹس گلزار احمد چیف جسٹس کے عہدے پر فائز ہوں گے۔ جسٹس گلزار احمد یکم فروری 2022ءکو ریٹائر ہوں گے۔ 2 فروری 2022ءکو جسٹس عمر عطا بندیال چیف جسٹس کا منصب سنبھالیں گے۔جسٹس عمر عطا بندیال 16 ستمبر 2023ء تک عہدے پر فائز رہیں گے۔ان 8 جج صاحبان میں سے بھی کچھ جج صاحبان اس عہدے پر پہنچنے سے قبل ہی ریٹائر ہو جائیں گے کیونکہ آئین کے مطابق سپریم کورٹ کے جج کی ریٹائرمنٹ کی عمر 65 سال مقرر ہے۔ واضح رہے کہ موجودہ چیف جسٹس آف پاکستان جسٹس ثاقب نثار نے کم ہی عرصہ میں عوام نے بے انتہا مقبولیت حاصل کی۔ سپریم کورٹ کے جج جسٹس میاں ثاقب نثار کو 7 دسمبر 2016ء کو چیف جسٹس آف پاکستان مقرر کیا گیا جس کے بعد انہوں نے 31 دسمبر 2016ءکو چیف جسٹس کے عہدے کا حلف ا±ٹھایا اور اپنی ذمہ داریاں سنبھالیں۔