رباط (نیٹ نیوز) غیر ملکی میڈیا کے مطابق مراکش کی حکومت نے ملک بھر میں برقع کی پروڈکشن اور فروخت پر پابندی عائد کر دی ہے۔ یہ اقدام سیکیورٹی وجوہات کی بناء پر اٹھایا گیا ہے۔ تاہم اس شمال افریقی ملک کے حکام کی جانب سے کوئی سرکاری اعلان سامنے نہیں آیا ہے۔ رپورٹس ہیں کہ وزارت داخلہ کی جانب سے اس ہدایات پر عمل درآمد رواں ہفتے ہی شروع ہو جائے گا۔ غیر ملکی میڈیا سے گفتگو کرتے ہوئے مراکشی حکومت کے ایک اعلیٰ اہلکار نے بتایا کہ برقع پر پابندی کا حتمی فیصلہ کر لیا گیا ہے، اب اس کی درآمد، مینوفیکچرنگ اور مارکیٹنگ پر مکمل پابندی ہو گی جس پر ہر صورت عملدرآمد کروایا جائے گا۔ یہ اقدام جرائم پر قابو اور سیکیورٹی وجوہات کی بناء پر اٹھایا گیا ہے۔ واضح رہے کہ مراکشی خواتین میں حجاب اوڑھنے کا رجحان ہے۔ وزارت داخلہ کی جانب برقع پر پابندی کے حوالے سے آگاہی مہم بھی شروع کر دی گئی ہے۔
