لاہور (وقائع نگار)امیر جماعت اسلامی پاکستان سینیٹر سراج الحق نے کہاہے کہ جے آئی ٹی رپورٹ نے دو ججوں کے فیصلوں کی توثیق کر دی ہے کہ وزیراعظم صادق اور امین نہیں رہے ، حکمران خاندان کے اثاثے آسمان سے باتیں کر رہے ہیں مگر وہ آمدنی کے ذرائع بتانے میں ناکام رہے ،سپریم کورٹ جلد از جلد فیصلہ سنائے تاکہ ملک سے کرپشن کا ہمیشہ خاتمہ ہوسکے ، وزیراعظم کے خلاف فیصلہ آنے سے جمہوریت کو کوئی نقصان نہیں ہوگا بلکہ کرپٹ قیادت کے جانے سے جمہوریت کا پہیہ زیادہ تیزی سے آگے کو چلے گا ۔ ان خیالات کااظہار انہوںنے منصورہ میں پر ہجوم پریس کانفرنس سے خطا ب کرتے ہوئے کیا ۔ اس موقع پر سیکرٹری جنرل جماعت اسلامی لیاقت بلوچ ، ڈپٹی سیکرٹری جنرل محمد اصغر ،اظہر اقبال حسن اور سیکرٹری اطلاعات امیر العظیم، امیر جماعت اسلامی لاہور ذکر اللہ مجاہداور ڈپٹی سیکرٹری اطلاعات قیصر شریف بھی موجود تھے ۔ سینیٹر سراج الحق نے کہاکہ جے آئی ٹی نے حکمران خاندان کے خلاف تحقیقات کر کے دیگ کا ایک چاول عوام کے سامنے پیش کیاہے ۔ ابھی پوری دیگ ایسے چاولوں سے بھری پڑی ہے۔انھوں نے کہاکہ جے آئی ٹی رپورٹ ملک میں کرپشن کے پروردہ ان مگر مچھوں کے خلاف ہے ، جنہوں نے قومی دولت لوٹ کر بیرون ملک محل بنائے اور ناجائز دولت کو ایک سے دوسرے اور پھر تیسرے ملک میں منتقل کرتے رہے ۔ یہ مسلم لیگ یا کسی سیاسی پارٹی کا مسئلہ نہیں۔ ملک میں قانون اور عدلیہ کی بالادستی اور آئینی اداروں کے استحکام کے لیے ضروری ہے کہ وزیراعظم استعفیٰ دیں اور جب تک سپریم کورٹ کا فیصلہ سامنے نہیں آتا، اپنے منصب سے الگ ہو جائیں ۔ انہوں نے کہاکہ ہم نے پہلے بھی وزیراعظم کی خدمت میں درخواست کی تھی کہ وزارت عظمیٰ کے منصب اور ملک کے وقار کی خاطر اپنے منصب سے الگ ہو جائیں لیکن انہوں نے اس پر کان دھرنے کی بجائے اسے انا کامسئلہ بنالیا ۔ انہوں نے کہاکہ جے آئی ٹی رپورٹ پر محاذ آرائی یا ایک دوسرے کے گریبان پکڑنے کی ضرورت نہیں ، جو لوگ اس پر ہنگامہ آرائی کر رہے ہیں ، وہ اس اہم ترین قومی مسئلے کو گرد و غبار کی نذرکر کے اصل ایشو سے قوم کی نظریں ہٹانا چاہتے ہیں ۔ سینیٹر سراج الحق نے کہاکہ جے آئی ٹی رپورٹ کو ردی قرار دینے والے چند دن صبر کریں ۔ سپریم کور ٹ کا فیصلہ آئے گا تو پتہ چلے گا کہ یہ رپورٹ ردی کی ٹوکری میں پھینکنے والی ہے یا وہ لوگ ردی کی ٹوکری میں پھینکنے کے قابل ہیں جو حقائق کو چھپانے کے لیے واویلا مچارہے ہیں ۔ وزراءرونے دھونے کی بجائے وقت کا انتظار کریں ۔ انہوںنے کہاکہ جے آئی ٹی کی رپورٹ نے قوم کو بہت حوصلہ دیاہے ۔ قوم سپریم کورٹ کے ساتھ ہے۔ہم جے آئی ٹی ارکان کے شکر گزار اور ان کی محنت اور لگن کو سراہتے ہیں ۔ جے آئی ٹی نے ہر قسم کے دباﺅ کو خاطر میں نہ لاتے ہوئے اپنا فرض پورا کیاہے ۔ انہوں نے کہاکہ کرپشن کےخلاف جماعت اسلامی نے مارچ 2016 ءمیں جس قومی تحریک کا آغاز کیا تھا ، آج وہ ملک بھر کے گلی کوچوں ، اقتدار کے ایوانوں اور عدالت عظمیٰ تک میں موجود ہے اور وہ وقت دور نہیں جب کرپٹ مافیا اور کرپشن سے عوام کو نجات مل جائے گی اور پاکستان دنیا میں ایک کرپشن فری ملک کے طور پر اپنی پہچان بنائے گا۔سینیٹر سراج الحق نے کہا کہ ہمارا اصل ہدف معاشی دہشتگردی سے نجات تھا جن کی وجہ سے قوم کو غربت اور جہالت جیسی دہشتگردی کا سامنا کرنا پڑا ۔ انہوں نے کہاکہ انتخابی کرپشن کا راستہ روکنا اور بااعتماد اور غیر جانبدار انتخابات کی راہ ہموار کرنے کی ضرورت ہے ۔ انہوں نے کہاکہ استحصال اور ظلم کا نام جمہوریت نہیں ، اصل جمہوریت عوام کو ان بیماریوں سے نجات دلانا اور آئین و قانون کی بالادستی قائم کرناہے جن کی وجہ سے پورے معاشرے میں بگاڑ پیدا ہواہے ۔ انہوںنے کہاکہ نیب زدہ ڈرگ مافیا اور ناجائز اسلحہ بیچنے والے انتخابی نظام کی کمزوریوں کا فائدہ اٹھا کر اقتدار کے ایوانوں میں پہنچ جاتے ہیں ۔ قوم کے ہاتھ تاریخی موقع آیاہے کہ وہ ایسے لوگوں کو ہمیشہ کے لیے مسترد کر کے دیانتدار اور اہل قیادت کا انتخاب کریں ۔ انہوں نے کہاکہ ہم انتخابی اصلاحات کے لیے عوامی اور عدالتی جنگ لڑیں گے ۔ ایک سوال کے جواب میں سراج الحق نے کہاکہ اب تو ہمارے شریف وزیر خزانہ کے بارے میں بھی بہت کچھ سامنے آچکاہے اور ان کا کردار بھی مشکوک ہوگیاہے ۔

لاہور ( آن لائن) پاکستان عوامی تحریک کی سنٹرل کور کمیٹی نے اعلان کیا ہے کہ 15 جولائی بروز ہفتہ پنجاب اسمبلی سے ایوان وزیراعلیٰ تک احتجاجی ریلی نکالی جائے گی اور سانحہ ماڈل ٹاﺅن کے ذمہ دار شریف برادران ،رانا ثناءاللہ اور ان کے حواریوں کو شامل تفتیش کرنے اور آئندہ کے احتجاجی لائحہ عمل کا اعلان جائیگا،بریفنگ دیتے ہوئے سیکرٹری جنرل خرم نواز گنڈاپور نے کہا کہ احتجاج میں تمام جماعتوں کو شرکت کی دعوت دی جائیگی۔ 3 وزراءنے ماڈل ٹاﺅن کیس پر مصالحت کیلئے پیسوں کی پیشکش کی یہ حکمران ہر ایک کو پیسوں کو پیشکش کرتے ہیں،حکمران اس سے انکار کریں وزراءکے نام بتا دوں گا۔ رانا ثناءاللہ جس طرح فوج کو ٹارگٹ کرتا ہے ایسا کوئی را یا موساد کا ایجنٹ ہی کر سکتا ہے۔ کور کمیٹی کے اجلاس سے سربراہ عوامی تحریک ڈاکٹر طاہر القادری نے ٹیلیفون پر خطاب کیا اور کور کمیٹی کو ضروری ہدایات دیں ۔کور کمیٹی کے اجلاس کے بعد سیکرٹری جنرل خرم نواز گنڈاپور نے عہدیداروں کے ہمراہ میڈیا کو بریفنگ دیتے ہوئے کہا کہ 17 جون 2014 ءکے دن ماڈل ٹاﺅن میں شریف برادران کے حکم پر خون کی ہولی کھیلی گئی جس کا سب سے بڑا ثبوت جسٹس باقر نجفی کمیشن کی رپورٹ کو تین سال گزر جانے کے بعد بھی پبلک نہ کرنا ہے ،باقرنجفی کمیشن کی رپورٹ میں قاتلوں کے نام اور پتے درج ہیں، اس عدالتی انکوائری کی کاپی حاصل کرنے کیلئے ہم تین سال سے لاہور ہائیکورٹ کے دروازے پر بیٹھے ہیں، خرم نواز گنڈاپور نے کہا کہ شہدائے ماڈل ٹاﺅن کے ورثاءیتیم بچے اور ان کے لواحقین پوچھ رہے ہیں کہ ان کے والدین ،بہن بھائیوں اور عزیز واقارب کو جس جرم کی پاداش میں موت کے گھاٹ اتارا گیااور تین سال کے بعد بھی انصاف کیوں نہیں ملا؟ اس موقع پر عوامی تحریک کے رہنماﺅں جی ایم ملک ،فیاض وڑائچ، نوراللہ صدیقی، ساجد بھٹی نعیم الدین چودھری ایڈووکیٹ، مظہر علوی و دیگر رہنما موجود تھے۔ خرم نواز گنڈاپور نے کہا کہ ہماری جماعت کا یہ باضابطہ مطالبہ ہے کہ جے آئی ٹی کی رپورٹ کے بعد وزیراعظم نواز شریف فوری طور پر مستعفی ہو کر اپنے اوپر عائد چارجز کا سامنا کریں ،انہوں نے کہا کہ پورا خاندان دو نمبر ثابت ہواجو عرصہ 35 سال سے قومی دولت کو لوٹ رہا تھا اور اب اس لوٹ مار کے جملہ ثبوت سامنے آچکے ہیں اور ہم سمجھتے ہیں کہ یہ لاتوں کے بھوت باتوں سے نہیں مانیں گے۔