کراچی(خصوصی رپورٹ)امریکا میں پہلی مرتبہ ایک خاتون کے یہاں ٹرانسپلانٹ بچہ دانی کے ذریعے بچے کی پیدائش ہوئی ہے جسے ماہرین نے ایک تاریخ ساز کامیابی قرار دیا ہے یونکہ اس سے قبل یہی سمجھا جاتا تھا کہ بچہ دانی کے کینسر کے نتیجے میں اگر کسی خاتون کی بچہ دانی نکال دی جائے تو وہ کبھی ماں بننے کی سعادت حاصل نہیں کر پائے گی۔ تاہم، سوئیڈن کے ماہرین نے اس وقت یہ صورتحال پلٹ دی جب 2014 میں انہوں نے ایک خاتون پر تجربہ کرتے ہوئے بچہ دانی ٹرانسپلانٹ کی۔ اب امریکا میں خاتون نے 3.9 پاﺅنڈ (1.77 کلوگرام) کے صحت مند بچے کو جنم دیا ہے۔ بیلر یونیورسٹی کے ماہرین کا کہنا ہے کہ بچہ دانی کے بغیر پیدا ہونے والی خاتون نے کامیاب ٹرانسپلانٹ کے نتیجے میں اب ایک بچے کو جنم دیا ہے اور اب ماہرین طب نے لوگوں کی زندگی بچانے کے ساتھ ان کی زندگی بہتر بنانے کی جانب بھی اہم پیشرفت کی ہے۔ ڈاکٹروں نے ٹرانسپلانٹ کے شعبے میں لوگوں کو نئی ناک، ہونٹ، آنکھوں کے پپوٹے، جبڑے، ہاتھ، پاﺅں، ٹانگیں وغیرہ دے چکے ہیں لیکن یہ پہلی مرتبہ ہے کہ کسی کو بچہ دانی ٹرانسپلانٹ کی گئی ہو اس کا نتیجہ بھی کامیابی کی صورت میں ملا ہے۔ اس تجربے کی کامیابی کے نتیجے میں ان خواتین کیلئے امید کی کرن پیدا ہوئی ہے جو پہلے اولاد کی نعمت سے محروم تھیں۔
‘
