واشنگٹن (محسن ظہیر سے) وفاقی وزیر داخلہ وترقی و منصوبہ بندی احسن اقبال کا کہنا ہے کہ موجودہ حالات میں پاکستان، امریکہ تعلقات میں سرد مہری کا فائدہ دہشت گرد اٹھائیں گے ۔ امریکہ کو اتحاد اور اشتراک کی پالیسی کے ذریعہ ہی کامیابی حاصل ہو سکتی ہے ۔ ان خیالات کا اظہار انہوں نے امریکی کانگریس میں عالمی جیو پولیٹیکل خطرات کے موضوع پر سیمینار سے خطاب کے دوران کیا ۔ وزیر داخلہ کا مزید کہنا تھا کہ سمٹتی دنیا میں اشتراک کے علاوہ تمام راستے انتشار کے راستے ہیں ۔ سیکیورٹی کے خطرات علاقائی نہیں رہے پوری دنیا کے لئے چیلنج ہیں ۔ دہشت گرد گروہ بین الاقوامی نیٹ ورک بن چکے ہیں اور دہشت گردی کا مقابلہ عالمی اتحاد و اشتراک سے ہی کیا جا سکتا ہے ۔احسن اقبال نے سیمینار سے خطاب کے دوران مزید کہا کہ پاکستان دہشت گردی کے خلاف جنگ میں 60,000 جانوں کی قربانی اور 120 ارب ڈالر کے نقصان سے سب سے نمایاں ہے ۔ گذشتہ چار سالوں میں پاکستان نے دہشت گردی کی کمر توڑی ہے۔ انہوں نے مزید کہا کہ چار ملین سرچ آپریشن ، 218727 کومبینگ آپریشن ، 16000 سے زائد اینٹیلی جنس آپریشنز کئے گئے ہیں ۔ دہشت گردی کے خلاف قومی اتحاد کو فروغ دیا گیا ۔ تمام اداروں اور قوتوں کے اشتراک سے کامیابی ملی ۔وزیر داخلہ نے کہا کہ دہشت گردی کو شکست دینے کے لئے دنیا میں مشترکہ کوششیں کرنا ہوں گی۔ افغانستان میں داعش کا مجمع ہونا علاقے کے لئے خطرہ ہے ۔ حالیہ رپورٹس کے مطابق افغانستان میں 45-70 فیصد علاقہ انتہا پسندوں کے قبضہ میں ہے ۔ڈرگ ٹریفک بلند ترین سطح پر پہنچ چکی ہے ۔ پاکستان میں 3 ملین افغان مہاجرین ہیں ۔احسن اقبال کا کہنا تھا کہ پاکستان افغانستان میں سوویت یونین کے خلاف جنگ کی آج تک قیمت ادا کر رہا ہے ۔ امریکہ اور یوروپین ممالک کی ذمہ داری ہے کہ امن کی کوششوں میں پاکستان کا ساتھ دیں ۔اقتصادی ترقی کے ذریعہ امن اور استحکام کو پائیدار بنایا جا سکتا ہے ۔سماجی اور اقتصادی ترقی کے ٹھوس پروگراموں کے ذریعہ اشتراک کیا جانا چاہئے۔
a
