ممبئی(ویب ڈیسک) اپنی شعلہ بیانی کے لیے مشہور اداکار رشی کپور نے ان کی اداکاری کی تعریف کرنے والے وکیل کو بھی شرمندہ کردیا۔رشی کپور کی حال ہی میں ریلیز ہوئی فلم ”ملک“ کو شائقین کی جانب سے ملا جلا ردعمل ملا ہے۔ تاہم ان کے ایک مداح نے ان کی اداکاری کی تعریف کرتے ہوئے کہا ”سر میں نے آپ کی فلم”ملک“ دیکھی جس میں آپ نے ایک وکیل کو صورتحال کے پیش نظر مظلوم ظاہر کیا جس پر آپ قابل تعریف ہیں، بحیثیت وکیل میں آپ کو سماجی مسائل اجاگر کرنے پر مبارکباد دیتا ہوں۔“اصولاً تو رشی کپور کو اپنے اس مداح کو سراہنا چاہیے تھا لیکن انہوں نے الٹا اس کی انگریزی کا مذاق اڑاتے ہوئے کہا ”بحیثیت وکیل آپ کی انگریزی، گرامر اور املا بہت خراب ہے، میں سمجھ نہیں پارہا کہ آپ کہنا کیا چاہ رہے ہیں، آپ کو اس پرتوجہ دینی چاہیے۔“

کراچی(ویب ڈیسک) عیدالاضحیٰ کے موقع پر ریلیز ہونے والی فلم”جوانی پھر نہیں آنی 2“ نے باقی دونوں فلموں”لوڈویڈنگ“ اور ”پروازہےجنون“کو پیچھے چھوڑتے ہوئے ایک بار پھر میدان مارلیا۔جوانی پھر نہیں آنی2بڑی عید پر مقامی سینماﺅں میں ریلیز ہونے والی ہمایوں سعید اور فہد مصطفیٰ کی فلم ”جوانی پھر نہیں آنی 2“ نے سب سے زیادہ بزنس کرکے میدان مارلیا۔ پاکستان میں فلم نے ریلیز کے پہلے روز 3 کروڑ 22 لاکھ جب کہ پاکستان سے باہر 2 کروڑ17 لاکھ کا بزنس کیا ہے۔ مجموعی طور پر”جوانی پھر نہیں آنی2 “ 5 کروڑ 39 لاکھ کا بزنس کرنے میں کامیاب رہی ہے۔پرواز ہے جنون اداکار حمزہ علی عباسی، احد رضا میر اورہانیہ عامر کی فلم”پرواز ہے جنون“کو بھی شائقین نے بے حد پسند کیا، فلم اپنے موضوع کے اعتبار سے پہلے ہی شائقین کی توجہ حاصل کرنے میں کامیاب ہوچکی تھی۔ لوگوں کو حمزہ علی عباسی اور ہانیہ عامر کی کیمسٹری پسند آگئی اور فلم ریلیز کے پہلے روز ایک کروڑ79 لاکھ کا بزنس کرنے میں کامیاب ہوگئی۔لوڈ ویڈنگ اداکار فہد مصطفیٰ اورمہوش حیات اس بار اپنا جادو دکھانے میں ناکام رہے۔ عید الاضحیٰ پر ریلیز ہونے والی تینوں فلموں میں سے”لوڈ ویڈنگ“سب سے کم بزنس کرنے میں کامیاب ہوئی ہے۔ ریلیز کے پہلے روز فلم نے صرف 90 لاکھ روپے کمائے ہیں تاہم امید کی جارہی ہے کہ فلم ویک اینڈ پر اچھا بزنس کرنے میں کامیاب ہوجائے گی۔

کراچی(ویب ڈیسک) پاکستانی اداکار فہد مصطفیٰ کا کہنا ہے کہ پچھلے 4 سال سے میری فلمیں عید پر ریلیزہورہی ہیں لہٰذا معذرت کے ساتھ کہنا چاہوں گا کہ میں پاکستان کا سلمان خان ہوں۔حال ہی میں بی بی سی ایشین نیٹ ورک کو انٹرویو دیتے ہوئے فہد مصطفیٰ نے عیدالاضحیٰ پر ریلیز ہونے والی اپنی دونوں فلموں ”جوانی پھر نہیں آنی2“اور”لوڈ ویڈنگ“ سے متعلق خیالات کا اظہار کیا۔فہد مصطفیٰ نے عید پر ریلیز ہونے والی فلموں کے بزنس پر پڑنے والے اثرات کے بارے میں کہا میں پروڈیوسر نہیں ہوں لہٰذا مجھے بزنس کے حوالے سے اتنی تشویش نہیں ہے تاہم میرے لیے سب سے بڑا چیلنج دونوں فلموں میں مختلف نظر آنا تھا کیونکہ دونوں فلموں میں میرا کردار ایک دوسرے سے بالکل مختلف ہے۔فہد مصطفیٰ نے کہا ”فلم جوانی پھر نہیں آنی2“کی کاسٹ بہت بڑی ہے لہٰذا اگر فلم باکس آفس پراچھا رسپانس نہیں دیتی تو میرے لیے زیادہ مسئلہ نہیں ہوگا کیونکہ اس کا اثر پوری کاسٹ پر ہوگا۔ تاہم فلم”لوڈویڈنگ“میں میرا مرکزی کردار ہے اور کاسٹ میں بھی زیادہ لوگ نہیں ہیں لہٰذا اگر”لوڈ ویڈنگ“ شائقین کو پسند نہیں آتی تو سارا ملبہ مجھ پر گرے گا لہٰذا میں ”جوانی پھر نہیں آنی2“سے زیادہ فلم”لوڈویڈنگ“کے لیے فکر مند ہوں۔انٹرویو کے دوران فہد مصطفیٰ نےمذاق کرتے ہوئے کہا کہ پچھلے 4 سال سے میری فلمیں عید پر ریلیزہورہی ہیں لہٰذا معذرت کے ساتھ کہنا چاہوں گا کہ میں پاکستان کا سلمان خان ہوں۔واضح رہے کہ عیدالاضحیٰ پر ریلیز ہونے والی فلم”جوانی پھر نہیں آنی 2“باقی دونوں فلموں”پرواز ہے جنون“اور”لوڈویڈنگ“سے اچھا بزنس کرنے میں کامیاب ہوئی ہے۔

ممبئی(ویب ڈیسک) بالی ووڈ کے سلطان سلمان خان سوشل میڈیا پر مذاق کا نشانہ بن گئے۔
بالی ووڈ کے دبنگ اداکار سلمان خان کی فلم ”ریس3“ کو ایمیزون پرائم ویڈیو پر ریلیز کیا گیا ہے جس کی اطلاع ٹوئٹر پر دیتے ہوئے سلمان خان نے شائقین سے فلم دیکھنے کی اپیل کی اور کہا ”زندگی کی اس ریس میں کون آگے بڑھتا ہے؟“سلمان خان کے مداحوںنے”ریس3“ دیکھنا تو دور الٹا سلمان خان کا مذاق اڑا دیا اور کہا ”ریس3“ اتنی ری فلم ہے کہ اسے دیکھنے کا مطلب وقت اور پیسے ضائع کرنا ہے۔ ایک صارف نے سلمان خان کی ٹوئٹ کا مذاق اڑاتے ہوئے کہا کہ سلمان خان کی فلم”ریس3“ دیکھ کر زندہ رہنا مشکل ہے، میں یہ فلم دیکھے بغیر بھی زندہ رہ سکتاہوں۔ایک صارف نے ”ریس3“ کو بے حد بری فلم قراردیتے ہوئے کہا بہت مشکل سے ہم نے فلم ایک بار دیکھی ہے اب دوبارہ دیکھنے کی طاقت نہیں بچی۔واضح رہے کہ سلمان خان، بوبی دیول اورجیکولین فرنینڈس کی فلم”ریس3“ 2018 کی بدترین فلم قرار پائی ہے۔