لاہور(ویب ڈیسک) مسلم لیگ (ن) نے صدارتی امیدوار کے لیے پیپلزپارٹی کے اعتزاز احسن کا نام مسترد کردیا۔قومی اسمبلی میں قائد حزب اختلاف اور مسلم لیگ (ن) کے صدر شہبازشریف کی زیرصدارت لاہور میں مسلم لیگ (ن) کا اجلاس ہوا جس میں اہم فیصلہ کیے گئے۔ذرائع کے مطابق مسلم لیگ (ن) نے صدارتی امیدوار کے لیے پیپلزپارٹی کے اعتزاز احسن کی نامزدگی مسترد کرتے ہوئے کہا ہےکہ پیپلز پارٹی نے اعتزاز احسن کے نام پر اعتماد میں نہیں لیا، اعتزاز احسن دھرنے میں بھی اپوزیشن کو تقسیم کرنے کے ایجنڈے پر تھے۔اجلاس میں فیصلہ کیا گیا کہ صدارتی امیدوار کی متفقہ نامزدگی پاکستان الائنس کے ذریعے کی جائے، پیپلزپارٹی نے اتفاق نہ کیا تو (ن) لیگ کے عبدالقادر بلوچ صدارتی امیدوار ہوں گے۔ذرائع کے مطابق پاکستان الائنس کا اجلاس 24 اگست کو مری یا اسلام آباد میں ہو گا، الائنس کے ہر اجلاس میں تمام اپوزیشن جماعتوں کی قیادت شرکت کی پابند ہوگی۔ذرائع کا بتانا ہے کہ مسلم لیگ (ن) نے نوازشریف کے لیے انصاف دو احتجاجی تحریک شروع کرنے کا فیصلہ کیا ہے، عید کے بعد احتجاجی تحریک کا پہلا جلسہ راولپنڈی میں ہوگا جب کہ تحریک میں اپوزیشن جماعتوں کو بھی شرکت کی دعوت دی جائے گی۔ذرائع کے مطابق اجلاس میں فیصلہ کیا گیا کہ عوام کو تحریک میں بتایا جائےگا کہ نوازشریف کا احتساب نہیں ہورہا بلکہ انتقام لیا جا رہا ہے، نوازشریف اور مریم نواز کا نام ای سی ایل میں رکھنا انتقامی کارروائی ہے، زرداری کی چھٹی کے دن ضمانت ہوجاتی ہے مگر نواز شریف کو انصاف نہیں ملتا۔ذرائع نے بتایا کہ اجلاس میں بریفنگ دی گئی کہ مولانا فضل الرحمان نے مسلم لیگ (ن) سے بھرپور تعاون کی یقین دہانی کرائی، انہوں نے آج شہبازشریف سے فون پر گفتگو کرکے بھی انہیں تعاون کا یقین دلایا۔اجلاس میں فیصلہ کیا گیاہے کہ اپوزیشن کو متحد کرنے کی کوشش کی جائے گی اور اس سلسلے میں پیپلزپارٹی کے رہنما رضا ربانی اور خورشید شاہ آج شہبازشریف سے ملاقات کریں گے۔دوسری جانب اجلاس کے بعد میڈیا سے گفتگو کرتے ہوئے رانا ثنااللہ نے کہا کہ اجلاس میں سب سے اہم معاملہ صدارتی انتخاب رہا، کوشش ہے اپوزیشن اتحاد میں ایک امیدوار ہی سامنے لایاجائے، اگر اپوزیشن اتحاد کرلے تو حکومتی صدارتی امیدوار کو شکست دی جاسکتی ہے۔سابق وزیرقانون کا کہنا تھاکہ اپوزیشن اتحاد کا عید الاضحیٰ کے ایک روز بعد اسلام آباد یا مری میں اجلاس ہو گا جس میں صدر مملکت کے لیے اپوزیشن اتحاد کا متفقہ امیدوار سا منے لا یاجائے گا۔

کراچی(ویب ڈیسک)سینٹرل پولیس آفس میں آئی جی سندھ کی زیر صدارت اجلاس میں اہم فیصلے کئے گئے جس کے مطابق پولیس اہلکاروں کی رہائشگاہ کے لئے وزیراعلیٰ سندھ سے باقاعدہ درخواست کی جائے گی اور سندھ پولیس کی مراعات پنجاب پولیس کے مساوی کرنے کا فیصلہ بھی کیا گیا ہے۔سینٹرل پولیس آفس میں آئی جی سندھ کی زیر صدارت اجلاس میں بیوہ فنڈ کو3ہزارروپے سے بڑھاکر5ہزارروپے کردیا گیا اور آن لائن ادا کرنے کی بھی منظوری دے دی گئی ہے ،دوران ڈیوٹی مستقل معذوری کی صورت میں کانسٹیبلزکو مخصوص موٹرسائیکلیں دی جائیں گی،دوران فرائض قانونی مسائل اور مقدمات کی صورت میں امداد5لاکھ روپے تک کر دی گئی اور موذی بیماری کی صورت میں امداد ایک لاکھ سے بڑھا کر دس لاکھ روپے کر دی گئی۔اجلاس میں 3سال میں انتقال اور جاں بحق کانسٹیبلز کی امدادی رقوم کے لئے کوائف جمع کرنے کا فیصلہ کیا گیا ہے جبکہ کانسٹیبلزکے2بچوں کی شادی کے لئے گرانٹ50ہزارسے بڑھا کر1لاکھ روپے کردی گئی،ریٹائرمنٹ پر الاونس 15اور 25ہزارروپے سے بڑھاکربنیادی تنخواہ کے برابرکردی گئی، کانسٹیبلز کے بچوں کو 65فیصد نمبر لینے پر مکمل اسکالرشپ دی جائے گی،اجلاس میں سندھ پولیس کی مراعات پنجاب پولیس کے مساوی کرنے کا فیصلہ کرتے ہوئے پولیس ملازمین کی انشورنس کا فیصلہ بھی کیا گیا ہے جس کے لئے سات روز میں سفارشات پیش کرنے کا حکم دیا گیا ہے جبکہ پولیس اہلکاروں کی رہائشگاہ کے لئے وزیراعلیٰ سندھ سے باقاعدہ درخواست کی جائے گی۔

اسلام آباد(ویب ڈیسک)وزیراعظم عمران خان نے کہا ہےکہ مستقبل کی جانب پیش قدمی کیلئے ہندوستان اور پاکستان کو مذاکرات کرنا ہوں گے اور کشمیر سمیت تمام تصفیہ طلب معاملات کا حل نکالناہوگا۔سماجی رابطے کی ویب سائٹ ٹوئٹر پر اپنے بیان میں وزیراعظم عمران خان نے کہا کہ ’میری تقریب حلف برداری کیلئے پاکستان آنے پر میں سدھو کا مشکور ہوں، وہ امن کا پیامبر بن کرآیا جسے پاکستانی عوام نے بے پناہ محبت اور پیار دیا‘۔ انہوں نے کہا کہ ’بھارت میں جو لوگ سدھو کے خلاف تلواریں سونتے ہوئے ہیں وہ حقیقت میں برصغیر کے امن پر حملہ آور ہیں جس کے بغیر ہمارے لوگوں کی ترقی ممکن نہیں‘۔وزیراعظم کا کہنا تھا کہ ’مستقبل کی جانب پیش قدمی کیلئے ہندوستان اور پاکستان کو مذاکرات کرنا ہوں گے اور کشمیر سمیت تمام تصفیہ طلب معاملات کا حل نکالناہوگا‘۔عمران خان نے مزید کہا کہ’ غربت مٹانے اور برصغیر کے عوام کی زندگیوں میں بہتری لانے کا آسان ترین نسخہ ہے کہ بات چیت کے ذریعے تنازعات حل کیے جائیں اور باہمی تجارت کا آغاز کیا جائے‘۔

اسلام آباد(ویب ڈیسک)وزیراعظم عمران خان سے وزیراعلیٰ پنجاب عثمان بزدار نے ملاقات کی جس دوران عبدالعلیم خان بھی موجود تھے اس موقع پر عمران خان نے عثمان بزدارکووزیراعلیٰ منتخب ہونے پرمبارکباد دی۔اس موقع پر ان کا کہناتھا کہ عوام نے مینڈیٹ دیا،پنجاب میں تبدیلی نظرآنی چاہئے۔میڈیا رپورٹس کے مطابق وزیراعظم عمران خان سے وزیراعلیٰ پنجاب عثمان بزدار نے ملاقات کی ہے، عمران خان نے عثمان بزدارکووزیراعلیٰ منتخب ہونے پرمبارکباد دی۔ملاقات میں پنجاب کی کابینہ کے حوالے سے مشاورت کی گئی۔وزیراعظم عمران خان نے کہا کہ عثمان بزدار کا انتخاب پنجاب میں ایک نئے دور کا آغاز ہے جس میں پنجاب بھر اور خصوصا پس ماندہ علاقوں میں تعمیر و ترقی پر خصوصی زور دیا جائے گا۔انہوں نے کہا کہ پنجاب کی عوام نے نئے پاکستان کی آواز پر لبیک کہا ہے۔ امید ہے عثمان بزدار اس اعتماد پر پورا اتریں گے۔وزیراعظم نے وزیراعلیٰ پنجاب کووفاق کی جانب سے ہرممکن تعاون کی یقین دہانی کرائی اور انہیں ہدایت کی کہ تمام ارکان اوراتحادیوں کوساتھ لےکرچلیں۔اس موقع پر عمران خان کا کہناتھا کہ عوام نے مینڈیٹ دیاہے پنجاب میں تبدیلی نظرآنی چاہئے۔