غزہ (صباح نیوز) فلسطین کے علاقے غزہ کی پٹی میںجمعہ کے روز ‘حق واپسی’ اور غزہ کی ناکہ بندی کے خاتمے کے لیے ہونے والےمظاہرےمیں اسرائیلی فوج کی فائرنگ سے 14فلسطینی زخمی ہوگئے۔ مرکز اطلاعات فلسطین کے مطابق غزہ میں وزارت صحت کی طرف سے جاری کردہ ایک بیان میں بتایا گیا ہے کہ مشرقی غزہ میں اسرائیلی فوج کی فائرنگ سے 14شہری زخمی ہوئے۔مشرقی غزہ میں شہریوں کی بڑی تعداد نے مظاہروں میں آمد کا آغاز کیا۔ یہ مسلسل 35 واں ہفتہ ہے جس میں غزہ کی پٹی میں اسرائیل مخالف مظاہرے کیے گئے۔ مرکزاطلاعات فلسطین کے مطابق خراب موسم کے باوجود فلسطینیوں کی بڑی تعداد نے مشرقی سرحد پر جمع ہو کر اسرائیلی مظالم کے خلاف احتجاج کیا۔ خیال رہے کہ فلسطین کے علاقے غزہ کی پٹی پر 30مارچ 2018 سے مظاہروں کا سلسلہ جاری ہے۔ ہر روز شام کے اوقات میں بالخصوص جمعہ کو بڑی تعداد میں شہری اسرائیل کے خلاف مظاہروں میں حصہ لیتے ہیں۔ اسرائیلی فوج کی وحشیانہ ریاستی دہشت گردی کے نتیجے میں اب تک 235فلسطینی شہید اور 25ہزار کے قریب زخمی ہوچکے ہیں۔
اسرائیلی فوج کی فائرنگ سے غزہ میں 14 فلسطینی زخمی
