ہماری سیاست میں بیان بازی کو بہت اہم سمجھا جاتا ہے اور سمجھا یہ جاتا ہے کہ اکثر سیاست دان بیان بازی پر زندہ ہیں۔ مسائل کو میڈیاپر لایا جاتا ہے اور بار بار رگیدا جاتا ہے۔ اس مسئلے کو پارلیمنٹ میں نہیں لایا جاتا۔ حقیقت یہ ہے کہ ہر جماعت بیان بازی میں نمبر لے جانے کی کوشش کرتی ہے۔ ن لیگ ہو یا پیپلزپارٹی یا حکومتی وزراءبان بازی میں نمبر لے جانے کی کوشش میں ہوتے اگر کسی ایک بھی مسئلہ کو لیا جائے تو ایک پارٹی اگر درجنوں کے حساب سے بیان دیتی ہے تو دوسری سینکڑوں کے حساب سے جواب دینا اپنا فرض سمجھتی ہے۔پارلیمنٹ میں جاکر مسائل اجاگر کرنے کے بجائے پریس کانفرنس کرتے ہیں میڈیا پر گفتگو کرتے ہیں یا جلدی میں مخالفین پر وار کرتے ہیں۔ حکومتی وزراءسے حکومتی کارکردگی مہنگائی کی بات کریں تو اصل ایشوز سے ہٹ کر ایک ہی رٹ لگاتے ہیں حکومت کی کارکردگی گزشتہ حکومتوں سے بہتر رہی ہے۔ پاکستان کا مستقبل روشن ہے اور حکومت کو اپوزیشن سے کوئی خطرہ نہیں اور اپنی مدت پوری کرے گی اور آیندہ الیکشن بھی جیتیں گے اور حکومت ہم ہی ہیں۔ اپوزیشن ہر روز ایک ہی قسم کے بیان دیتی ہے۔ عوام مہنگائی کی چکی میں پس رہے ہیں اور اس حکومت کو جلد گھر بھیج دیں گے۔ اپوزیشن بھی سڑکوں پر سیاست کرتی ہے۔ مسائل کو پارلیمنٹ میں نہیں اٹھایا جاتا۔ عوام کو بے وقوف بنانے کا رواج ہر ملک میں ہے۔ ٹرمپ الیکشن ہار گئے جوبائیڈن جیت کر برسراقتدار ہوگئے۔ ٹرمپ نے اقتدار میں آنے کے بعد 100 دن کے اندر 511 بار غلط بیانی اور اسی طرح جوبائیڈن پر بھی غلط بیانیوں کا الزام ہے کہ انہوں نے 100 دن کے اندر 58 بار غلط بیانی کی مگر امریکہ میں ان کے جھوٹ پکڑے یہاں پاکستان میں سیاستدانوں کے جھوٹ پکڑے نہیں جاتے اور وہ اپنی صفائی میں مزید جھوٹ بول کر جان چھڑا لیتے ہیں۔
