ڈھاکہ: (ویب ڈیسک) انڈیا نے تین ایک روزہ میچز کی سیریز کے آخری میچ میں بنگلہ دیش کو 227 رنز سے شکست دے دی۔ بنگلہ دیش نے یہ سیریز 2-1 سے اپنے نام کی ہے۔
ظہور چوہدری سٹیڈیم میں کھیلے گئے میچ میں انڈیا کی طرف سے دیے گئے 410 رنز کے ہدف کے تعاقب میں بنگلہ دیش کی ٹیم صرف 182 رنز ہی بنا پائی ۔ بنگلہ دیش کی طرف سے شکیب الحسن 43 رنز بنا کر ٹاپ سکورر رہے۔ انڈیا کی طرف سے شردل ٹھاکر نے تین کھلاڑیوں کو آؤٹ کیا۔ عمران ملک اور اکسر پٹیل نے دو ، دو، جب کہ محمد سراج ، کلدیپ یادیو اور واشنگٹن سندر نے ایک ایک وکٹ حاصل کی۔
اس سے قبل پہلی اننگز میں بھارتی ٹیم انتہائی جارحانہ موڈ میں پہلے دو میچز ہارنے کا بدلہ لینے کے موڈ میں نظر آئی ۔ انڈیا نے پہلے بیٹنگ کرتے ہوئے مقررہ 50 اوورز میں آٹھ وکٹوں کے نقصان پر 409 رنز بنائے تھے۔ اوپنر شکھر دھون 15 کے مجموعی سکور پر آؤٹ ہوئے تو ویرات کوہلی اور ایشان کشن نے کریز سنبھال لی اور انتہائی جارحانہ کھیل پیش کیا۔ ایشان کشن نے انتہائی تیز کھیلتے ہوئے 24 چوکوں اور 10 چھکوں کی مدد سے 210 رنز بنائے جب کہ ویرات کوہلی نے 113 رنز سکور کیے۔
انڈیا نے تیسرے ون ڈے میں بنگلہ دیش کو 227 رنز سے شکست دے دی
