اسلام آباد: (ویب ڈیسک) لیفٹیننٹ کرنل ریٹائرڈ عاصم عمران خان کے سیکیورٹی انچارج تعینات کر دئیے گئے۔
لیفٹیننٹ کرنل ریٹائرڈعاصم ایس ایس جی کمانڈو رہ چکے ہیں، شہباز گل نے ٹوئٹ کی کہ انشاللہ کرنل (ر) عاصم آج سے میری ٹیم کا باقاعدہ حصہ بن کر اپنی ذمہ داریاں نبھائیں گے، امید کرتا ہوں توقعات پر پورا اترنے کے لئے کرنل ر عاصم سخت محنت سے کام کریں گے۔
پاکستان تحریک انصاف نے سابق ایس ایس جی کمانڈو لیفٹیننٹ کرنل (ر) عاصم کو چیرمین عمران خان کا سیکیورٹی انچارج تعینات کردینے کی تصدیق اپنے آفیشل ٹوئٹر ہینڈل کے ذریعے بھی کی۔

اسلام آباد: (ویب ڈیسک) مارگلہ کے جنگلات میں آگ لگانے والے ٹک ٹاکرز نکلے، مارگلہ کے جنگلات میں آگ لگانے والے دو نوجوانوں کی ویڈیو سامنے آگئی۔
ویڈیو میں ٹک ٹاکر کو لائیٹر کی مدد سے آگ لگاتے دیکھا جاسکتا ہے، ایک اور ویڈیو میں مشہور ٹک ٹاکر خاتون کو بھی مارگلہ کی پہاڑیوں پر آگ کے دوران ٹک ٹاک ویڈیو بناتے دیکھا جاسکتا ہے۔
اسلام آباد وائلڈ لائف کا کہنا ہے کہ آگ لگانے والے ٹک ٹاکرز کے خلاف کارروائی کی جائےگی، ٹک ٹاکرز کی ویڈیو بنانے اور فالورز بڑھانے کے لیے جنگل کو آگ لگا دیتے ہیں۔
انتظامیہ کا کہنا ہے کہ آسٹریلیا میں جنگلات کو آگ لگانے کی سزا عمر قید ہے، پاکستان میں بھی سخت قانون لانے کی ضرورت ہے۔

راولپنڈی: (ویب ڈیسک) سابق وزیر داخلہ شیخ رشید کا کہنا ہے کہ آج اور کل کا دن سیاست کے لیے بہت اہم ہیں۔48گھنٹے میں اہم فیصلے ہوجائیں گے۔
شیخ رشید کا کہنا ہے کہ اسلام آباد ،راولپنڈی اور ہر جگہ فیصلے ہورہےہیں۔31مئی تک اہم فیصلے ہوجائیں گے۔اب ایم کیو ایم بھی کہتی ہے الیکشن کراؤ۔
انہوں نے بتایا ہے کہ 20مئی کو ملتان جلسےمیں عمران خان مارچ کی کال دیں گے۔عمران خان کے خلاف جس جس نے ماسٹر پلان بنایا وہ عقل کا اندھا تھا۔اداروں کے ساتھ ہوں، ان کو پاکستان کی ریڑ کی ہڈی سمجھتا ہوں۔
ان کاکہنا ہے کہ ڈالر 200روپے تک جارہاہے،آصف زرداری نے نواز شریف سے جو بدلہ لینا تھا وہ لے لیا ہے۔جس جہاز پر نواز شریف آئے گا اس میں چور اور غدار کے نعرے لگیں گے۔
انہوں نے کہا ہے کہ ایف آئی اے میں ایک ہی کام ہورہاہے۔حمزہ شہباز،فریال تالپور اور آصف زرداری کےکیسز کسی طرح سے ختم کرنے کا پلان چل رہاہے۔اس سے بڑا المیہ کیا ہوسکتا کہ ایک فرد جرم والا شخص ملک کا وزیراعظم ہے۔
ان کا کہنا ہے کہ فرد جرم والے کو پاکستان کا چیف ایگزیکٹو لگا دیا جائے یہ کہاں کا قانون ہے۔کیا جن پر کیسز ہوں ان سے ملک کے بڑے فیصلے کروائے جا سکتے ہیں؟ایف آئی اے مقصود چپڑاسی کا کیس ختم کرنے جارہی ہے۔افسران کو ہٹا کر کرائے کے لوگ لگائے جا رہے ہیں جو عدالتوں سے کیسز واپس لے رہے ہیں ۔

کراچی : (ویب ڈیسک) کراچی میٹرک بورڈ کے تحت امتحانات کا آغاز ہوگیا، تاہم کمپوٹر سائنس پرچہ سوا نو بجے مبینہ طور پر سوشل میڈیا پر وائرل کردیا گیا۔
چیئرمین میٹرک بورڈ کا کہنا ہے کہ پرچہ بورڈ آفس سے نکل جانے کے بعد انتظامیہ کی ذمہ داری نہیں ہوتی۔
خیا ل رہے کہ بورڈ آف سیکنڈری ایجوکیشن کراچی کے تحت امتحانات میں 3 لاکھ 60 ہزار سے زائد طلبہ شریک ہو رہے ہیں۔ میٹرک بورڈ کے مطابق کراچی کے 18 ٹاؤنز میں 448 امتحانی مراکز قائم کیے گئے ہیں جن کے اطراف دفعہ 144 نافذ کی گئی ہے۔
دوسری جانب میڈیا پر ایڈمٹ کارڈ کے متعلق چلنے والی خبروں کا وزیربورڈ سندھ نے نوٹس لے لیا، وزیربورڈ اسماعیل راہو نےچیئرمین میٹرک بورڈ سے وضاحت طلب کرلی۔
اسماعیل راہو نے کہا کہ جن طلبہ کو ایڈمٹ کارڈ کا اجرا نہیں ہوا ان کو ایڈمٹ جاری کرنے کا حکم دیا ہے، جن طلبہ کا آج ایڈمٹ کارڈ نہ ملنے کی وجہ سے پیپر نہیں ہوا ان سےدوبارہ امتحان لیا جائیگا۔

لاہور : (ویب ڈیسک) تحریک انصاف (پی ٹی آئی) کے منحرف رہنما علیم خان نے لندن میں مسلم لیگ (ن) کے قائد نواز شریف سے ملاقات کی ہے۔
رپورٹس کے مطابق نواز شریف اور علیم خان کے درمیان ملاقات 2 گھنٹے تک جاری رہی۔ تاہم میڈیا سے گفتگو کرتے ہوئے علیم خان کا کہنا تھا کہ ابھی سیاسی گفتگو نہیں کرسکتا اور ملک کے حالات بہتر ہوں گے۔
یاد رہے کہ رواں سال مارچ میں بھی عبدالعلیم خان نے نواز شریف سے لندن میں ملاقات کی تھی۔
یاد رہے علیم خان، عمران خان کے پرانے ساتھی تھے لیکن اب ان کی راہیں جدا ہو چکی ہیں، اور وہ مسلم لیگ ن کے قریب ہو گئے ہیں۔