اسلام آباد: (ویب ڈیسک) وزیراعظم شہبازشریف کا چینی وزیراعظم لی کیانگ کے ساتھ ٹیلیفونک رابطہ ہوا ہے،دونوں وزرائے اعظم نے اتفاق کیا کہ پاکستان اور چین کی اسٹریٹجک پارٹنر شپ کونقصان پہنچانے کی اجازت نہیں دینگے۔
پاک چین وزرائے اعظم نے دوطرفہ امور پر تفصیلی تبادلہ خیال کیا اوراتفاق کیا کہ پاک چین شراکت داری کو عوامی مفادات کے ساتھ امن و استحکام کےلیے جاری رکھنا چاہیے،دو طرفہ تعاون کو مزید بلندیوں تک لے جانے کے لیے رابطے بڑھائیں گے۔
وزیراعظم نے جامعہ کراچی حملے میں چینی شہریوں کی ہلاکت پراظہارافسوس بھی کیا اوردہشتگردانہ حملے کی مذمت کرتے ہوئے ہلاک چینی شہریوں کے اہلخانہ سے ہمدردی کااظہارکیا۔
شہباز شریف نے کہا کہ مجرمانہ فعل کی مکمل تحقیقات کر کے مرتکب افراد کو کٹہرے میں لائیں گے،پاکستان میں کام کرنے والے تمام چینی شہریوں کے تحفظ اور سلامتی کو انتہائی اہمیت دیتے ہیں۔ حکومت پاکستان چینی شہریوں کی حفاظت کے لیے تمام ضروری اقدامات اٹھائے گی۔
وزیراعظم نے پاکستان کی خودمختاری، علاقائی سالمیت اور قومی ترقی کے لیے چین کی بھرپور حمایت پراظہارتشکرکرتے ہوئے کہا کہ سی پیک کے تحت جاری اور نئے منصوبوں کو تیز رفتاری سے آگے بڑھائیں گے،سی پیک کی وجہ سے پاکستان کی سماجی و اقتصادی ترقی میں اضافہ ہوا۔
انہوں نے کہا کہ خصوصی اقتصادی زونز کو جلد از جلد مکمل فعال کرنے کے لیے مل کر کام کرنے کی ضرورت ہے،خصوصی اقتصادی زونز قائم کرنے میں کردار ادا کرنے والے چینی حکام کے تجربے سے سیکھنا چاہتے ہیں،دونوں ممالک کے لیے اسٹریٹجک اہمیت کے حامل منصوبوں بالخصوص ایم ایل ون پرکام کرینگے۔
اس موقع پر چینی وزیراعظم کا کہنا تھا کہ اقتصادی تعاون،تجارت کو بڑھانے اورسرمایہ کاری کی حوصلہ افزائی کے لیے تیار ہیں۔

اسلام آباد: (ویب ڈیسک) پاکستان تحریک انصاف کے رہنما ڈاکٹر شہباز گل نے الزام عائد کیا ہے کہ سیالکوٹ جلسے کے بعد ائیرپورٹ سے سابق وزیراعظم عمران خان کے دو فون چوری کرلیے گئے۔
اپنے بیان میں شہباز گل کا کہنا تھاکہ سیالکوٹ میں جان بوجھ کر عمران خان کو سکیورٹی فراہم نہیں کی گئی۔
ان کا کہنا تھاکہ عمران خان کے دو فون چوری کرلیے گئے ہیں۔
شہباز گل کا کہنا تھاکہ عمران خان کے جلسہ گاہ سے جانے کے بعد ائیرپورٹ سے فون چوری کروائے گئے۔
انہوں نے کہا کہ آپ تو بالکل بوکھلا گئے ہیں، عمران خان نے جو ویڈیو بیان ریکارڈ کروایا، وہ ان فونز سے نہیں ملنا۔
خیال رہے کہ گزشتہ روز سابق وزیراعظم عمران خان نے سیالکوٹ میں جلسے سے خطاب کیا تھا۔

اسلام آباد: (ویب ڈیسک) پاکستان مسلم لیگ (ن) نے پاکستان تحریک انصاف کے رہنما اور سابق وزیراعلیٰ پنجاب عثمان بزدار کی مبینہ کرپشن کے خلاف محکمہ اینٹی کرپشن سے رجوع کرنے کا اعلان کر دیا۔
اسلام آباد میں پریس کانفرنس کرتے ہوئے مسلم لیگ (ن) کے رہنما عطا تارڑ نے کہا کہ چیئر مین پاکستان تحریک انصاف اور سابق وزیراعظم عمران خان اقتدار سے نکلنے کے بعد پارسائی کے دعوے کر رہے ہیں، عمران خان ایسا تاثر دے رہے ہیں، جیسے ان سے صاف آدمی ملک میں کوئی نہیں ہے۔ گزشتہ حکومت میں عمران خان نے اختیارات کا ناجائز فائدہ اٹھایا۔۔
رہنما مسلم لیگ (ن) نے کہا کہ سال 2019 میں ایمنسٹی کے ذریعے بلیک منی کو وائٹ کروایا گیا، ایمنیسٹی اسکیم ان کے قریبی لوگوں کے لیے تھی، ایمنیسٹی اسکیم کے ذریعے عمران خان کے قریبی لوگوں کی کرپشن چھپانی گئی۔
عطاء تارڑ نے کہا کہ عثمان بزدار کے خلاف پنجاب اینٹی کرپشن میں درخواست دائر کریں گے، پنجاب میں ایک ایک پوسٹنگ پر کروڑوں روپوں کا ریٹ لگایا گیا، عثمان بزدار کا 4 ایکڑ کا ملتان میں اسپینش ولا ہےجس کی مالیت 70 کروڑ روپے ہے، عثمان بزدار نے تونسہ کے قریب 5 ارب روپے کی زمین لی۔ عثمان بزدار ڈمی وزیر اعلیٰ تھے جن کے ذریعے کرپشن کروائی گئی، پنجاب میں ایک ایک پوسٹنگ پر کروڑ کا ریٹ لگایا گیا، کرپشن کا منصوبہ بنی گالہ سے چلایا جاتا رہا ہے، عثمان بزدار اور ان جیسے لوگوں کو صرف کرپشن کے لیے لایا گیا، عثمان بزدار کے وزیراعلیٰ بننے سے پہلے چند کروڑ کے اثاثے تھے۔
ان کا کہنا تھا کہ ایک ٹیکسٹائل مل میں 12 کروڑ کی سرمایہ کاری ہے، عثمان بزدار کو لگانے کا مقصد ایسا ڈمی لگانا تھا جو خود بھی مال کمائے، بنی گالا میں بھی دے، عثمان بزدار کے ذریعے 10 ارب روپے کے ناجائز اثاثے بنائے گئے۔ پی ٹی آئی کے جلسوں اور عمران خان کے سفر پر خرچوں کے پیسے کہاں سے آئے؟ عثمان بزدار نے غریب عوام کے حق پر ڈاکا ڈالا، بزدار نے ملک کے وسائل کو بےدردی سے لوٹا، عمران خان نے سہولت کار کا کام کیا۔
عطا تارڑ نے کہا کہ عثمان بزدار نے 10 ارب کے اثاثے کیسے بنائے؟ عثمان بزدار کے فرنٹ مین بھی ملک کو لوٹنے میں مصروف رہے، عمران خان کے دور میں کسان نے 10 گنا زیادہ قیمت پر کھاد خریدی، عثمان بزدار کو تمام کرپشن کا جواب دینا ہوگا۔

فیصل آباد: (ویب ڈیسک) پاکستان تحریک انصاف کے مرکزی سیکریٹری اطلاعات و نشریات فرخ حبیب نے مطالبہ کیا ہے کہ آئینی ادارے اپنی ذمہ داری ادا کریں اور ملک میں الیکشن کرائیں، انتخابات کے انعقاد میں جتنی تاخیر ہوگی اتنا پاکستان کا نقصان ہو گا۔
ایک پریس کانفرنس سے خطاب کرتے ہوئے انہوں ںے الزام عائد کیا کہ حکومت ملک کو قحط کی طرف لے جارہی ہے اور کشمیریوں پر سودے بازی کی جا رہی ہے۔
سابق وفاقی وزیر مملکت برائے اطلاعات و نشریات فرخ حبیب نے کہا کہ لٹیروں اور ڈاکوؤں کی حکومت کا عوام سے کوئی تعلق نہیں، ان کے پاس مقصود چپراسی کے نام پر پیسہ چوری کرنے کے علاوہ کوئی مہارت نہیں۔ انہوں ںے کہا کہ 24 لوگوں پر قتل کا مقدمہ ہے، پاکستان کو مذاق نہ بنایا جائے۔
فرخ حبیب نے کہا کہ عمران خان کے دور میں لوگوں کا علاج مفت شروع ہو رہا تھا، مفتاح اسماعیل کہہ رہا ہے کہ کامیاب پاکستان پروگرام اچھا پروگرام ہے، ہمارے پیکجیز کے باعث ایکسپورت میں 26 فیصد اضافہ ہوا، لارج اسکیل مینوفیکچرنگ میں 26 فیصد اضافہ ہوا۔
انہوں ںے کہا کہ عمران خان کی جان صرف عمران خان کی نہیں 22 کروڑ عوام کی ہے، حکومت سیکیورٹی کے نام پر ٹوپی ڈرامہ نہ کرے، عمران خان امت مسلمہ کی آواز ہیں، عمران خان کی سیکیورٹی پر کمپرومائز نہیں ہونے دیں گے۔
پی ٹی آئی کے مرکزی سیکریٹری اطلاعات فرخ حبیب نے کہا کہ ہم انہیں انتخابات سے بھاگنے نہیں دیں گے، حمزہ شہباز کو ووٹ ڈالنے والے پی ٹی آئی ارکان نااہل ہوں گے، یہ سارے ملک کو لوٹ کر کھا گئے ہیں۔

اسلام آباد: (ویب ڈیسک) الیکشن کمیشن نے پنجاب کے منحرف ارکان کے خلاف ریفرنس میں تحریک انصاف کا جمع کرایا گیا دستخط شدہ جواب الجواب قبول کر لیا۔
‏چیف الیکشن کمشنر سکندر سلطان راجہ کی سربراہی میں تین رکنی کمیشن پی ٹی آئی کے 25 ‏منحرف ارکان پنجاب اسمبلی کے خلاف ریفرنسز پر سماعت کی، تحریک انصاف نے ‏دستخط شدہ جواب الجواب جمع کرا دیا۔ منحرف ارکان کے وکیل شہزاد شوکت نے کہا کہ ‏دستخط شدہ اور بغیر دستخط شدہ جواب الجواب مختلف ہے، نیا جواب الجواب مسترد کیا جائے۔
وکیل پی ٹی آئی فیصل چودھری نے کہا کہ یہ ٹیکنیکل خامی کے پیچھے چھپنے کی کوشش ‏کر رہے ہیں، الیکشن کمیشن نے پی ٹی آئی کا ‏جمع کرایا گیا جواب الجواب قبول کرلیا، منحرف ارکان کے وکیل سلمان اکرم راجہ نے دلائل دیتے ہوئے کہا کہ آرٹیکل 63 اے کے ‏تحت پارلیمانی پارٹی ارکان کو ہدایات جاری کرتی ہے، ممبرسندھ ناصردرانی نے ‏استفسار کیا ‏کہ کیا پارلیمانی پارٹی کا لیڈر بھی پالیسی جاری کرسکتا ہے۔
وکیل نے کہا کہ پارٹی چیئرمین ‏ہدایات جاری نہیں کرسکتا، عمران خان نے پی ٹی آئی ارکان پنجاب ‏اسمبلی کو چار اپریل ‏کو خط کے ذریعے پرویزالٰہی کو ووٹ دینے کی ہدایت دی، آج جو جواب الجواب جمع کروایا ‏گیا ‏اس میں بیان حلفی عمران خان کا نہیں سبطین خان کا ہے۔
عمران خان بیان حلفی دینے ‏سے ہچکچا کیوں رہے ہیں، انہیں پتا ہے کہ جھوٹے بیان حلفی پر کارروائی ہوسکتی ‏ہے، الیکشن کمیشن نے سماعت کل دن 12 بجے تک ملتوی کردی۔