لاہور(نیوزایجنسیاں) پاکستانی نژاد برطانوی باکسر عامر خان نے کہا ہے کہ پاکستان اور بھارت کے درمیان جنگی ماحول اور کشیدگی کو باکسنگ رنگ میں حل کرایا جاسکتا ہے، رمضان کے بعد سپر باکسنگ لیگ کیلئے بڑا اعلان ہوگا جس میں پاکستانی کھلاڑی شرکت کریں گے،بھارتی کھلاڑی بھی شاید لیگ کا حصہ ہوں۔گزشتہ روزعالمی شہرت یافتہ پاکستانی نژاد برطانوی باکسر عامر خان کی لاہور میں حضرت علی بن عثمان ہجویری المعروف داتا گنج بخش کے مزار پر حاضری دی اور فاتحہ خوانی کی، بعد ازاں زائرین میں لنگر بھی تقسیم کیا ۔ اس موقع پر میڈیا سے گفتگو کرتے ہوئے عامر خان نے کہا کہ جب بھی لاہور آتا ہوں تو داتا دربار پر حاضری دیتا ہوں۔باکسر نے بتایا کہ ان کی اگلی فائٹ اب ستمبر میں ہوگی۔عامر خان نے باکسنگ کے ذریعے پاک بھارت تعلقات کو بہتر بنانے کی خواہش کا اظہار کرتے ہوئے کہا کہ اسپورٹس کا مطلب امن ہے، اس سے پاک بھارت تعلقات بہتر ہوسکتے ہیں، باکسنگ رنگ دونوں ملکوں کے کھلاڑیوں کو یکجا کرسکتی ہے۔انہوں نے بتایاکہ رمضان کے بعد سپر باکسنگ لیگ کیلئے بڑا اعلان ہوگا، لیگ میں پاکستانی کھلاڑی شرکت کریں گے جب کہ آئندہ بھارتی کھلاڑی بھی شاید لیگ کا حصہ ہوں۔عامر خان کا کہنا تھا کہ ان کے بھائی ہارون خان اب پاکستان میں باکسنگ کھلاڑیوں کی کوچنگ کریں گے۔ خیال رہے کہ عامر خان کو مئی 2016 میں امریکا کے شہر لاس ویگاس میں ہونے والی فائٹ میں میکسکو کے باکسر کنیلو الواریز نے ناک آﺅٹ کر دیا تھا جس کے بعد سے وہ باکسنگ رنگ سے دور تھے۔تاہم گزشتہ ماہ انہوں نے دو سال بعد باکسنگ رنگ میں واپسی کی اور کینیڈا سے تعلق رکھنے والے حریف فل لو گریشو کو صرف 39 سیکنڈز میں ناک آو¿ٹ کر دیا تھا۔واضح رہے کہ معروف عالمی باکسر عامر خان نے گزشتہ سال ستمبر کے مہینے میں ”سپر باکسنگ لیگ“ کے نام سے پاکستان کی پہلی باکسنگ لیگ منعقد کرانے کا اعلان کیا تھا۔
