لاہور(نیوزایجنسیاں)سابق اولیمپئن شہناز شیخ نے ایشین ہاکی چیمینزٹرافی میں بھارت اور ملائشیا کا میچ فکس ہونے کے خدشات ظاہر کردیئے۔شہناز شیخ کا میڈیا سے خصوصی بات چیت کے دوران کہنا تھا کہ منگل کی رات شیڈول انڈیا، ملائشیا میچ دیکھنے بعد محسوس ہوتا ہے کہ یہ میچ فکس تھا۔ میری اس بات کی تائید میچ کے دوران کمنٹیٹر بھی کر رہا تھا کہ بھارت سپرٹ کے ساتھ نہیں کھیل رہا۔ میچ کے دوران ملائشیا نے 40 فیصد جبکہ بھارت نے 60 فیصد بال کنٹرول کے باوجود گول اسکور نہ کیا۔سابق اولیمپئن نے کہا بھارتی ٹیم 22 مرتبہ ملائشیا کے گول ایریا میں داخل ہوئی لیکن گول اسکور نہ کرسکی جبکہ ملائشیا 7 مرتبہ انڈین اٹیک سرکل میں داخل ہوسکا، کھیل کے اس قدر فرق کے باوجود اور شماریات کا موازنہ کرنے سے واضح معلوم ہوتا ہے کہ یہ میچ فکس تھا۔شہناز شیخ کا کہنا تھا کہ ماضی میں بھی بھارت اور ملائشیا پر یہ الزامات لگتے رہے ہیں کہ دونوں ٹیمیں جان بوجھ کر ایسا کھیلتی ہیں، میری رائے میں یہ اسپورٹسمین سپرٹ کے خلاف ہے۔ سلطان قابوس اسپورٹس کمپلیکس مسقط میں جاری پانچویں ایشین ہاکی چیمینزٹرافی میں انڈیا اور ملائشیا کے مابین کھیلا گیا یہ میچ بغیر کسی گول کے برابر رہا تھا، رانڈ رابن کی بنیاد پرکھیلے جانے والے اس ٹورنامنٹ میں دونوں ٹیموں نے ایک، ایک پوائنٹ حاصل کرکے سیمی فائنل کے لئے کوالیفائی کرلیا۔
ہاکی میں بھی میچ فکسنگ کے الزامات اٹھنے لگے
