سابق وفاقی وزیر اور رہنما مسلم لیگ (ن) میاں جاوید لطیف کا کہنا ہے کہ ہم اداروں میں کسی کیخلاف مہم کو تسلیم نہیں کریں گے۔
لاہور میں میڈیا سے گفتگو کرتے ہوئے جاوید لطیف نے کہا کہ آج ایک شخص کو معصوم کہا جارہا ہے، ن لیگ سے انتخابی نشان واپس لیا گیا، پارٹی نے شیر کے نشان کے بغیر سینیٹ کا الیکشن لڑا، 2018 میں لیول پلیئنگ فیلڈ نہیں تھی لیکن کسی معصوم کا لفظ استعمال کیا گیا۔
انہوں نے کہا کہ اس وقت کسی نے نہیں کہا دو تہائی اکثریت والی جماعت سے زیادتی ہے، ہم چاہتے ہیں سب کے ساتھ انصاف ہو، جو جیل میں ہیں ان کے ساتھ بھی انصاف ہو۔
لیگی رہنما کا کہنا تھا کہ میرے خلاف شوشل میڈیا مہم چلائی جارہی ہے، مخالفین الیکشن کو متنازع بنا رہے ہیں، البتہ سب کو لیول پلینگ فیلڈ ملنی چاہیے، ہمیں صرف فیلڈ ملی ہے لیول تو ملی ہی نہیں۔
جاوید لطیف نے کہا کہ ہم اداروں میں کسی کے خلاف مہم کو تسلیم نہیں کریں گے، ڈان اور سیسلین مافیا کے الفاظ آج تک واپس نہیں لیے گئے، اداروں کو بتانا ہوگا شوشل میڈٰیا مہم کے پیچھے کون ہیں۔
سابق وفاقی وزیر نے کہا کہ مخالفین چاہتے ہیں کوئی ایسی ججمنٹ آجائے جو الیکشن پر اثر انداز ہو، ماضی میں کسی کی خواہش پر فیصلے سپریم کورٹ میں کیے گئے، الیکشن کے بغیر جمہوریت اور ملک کا نقصان ہوگا۔a
