کراچی: پاکستانی شوبز انڈسٹری کے معروف اداکار و پروڈیوسر یاسر نواز نے اُن کی حج کی تصاویر پر تنقید کرنے والوں کو کرارا جواب دے دیا۔
یاسر نواز نے اپنے یوٹیوب وی لاگ میں کہا کہ میرے لیے حج کی سعادت حاصل کرنا زندگی کا یادگار لمحہ ہے اور دیگر لوگوں کی طرح میں نے بھی اپنی زندگی کے ان یادگار لمحات کو کیمرے میں محفوظ کیا۔
اداکار نے کہا کہ حج کے دوران، ناصرف ہم نے بلکہ دُنیا بھر سے آئے ہوئے دیگر عازمین نے بھی اپنی ویڈیوز بنائی تھیں اور تصاویر کھینچی تھیں کیونکہ ہر انسان ہی چاہتا ہے کہ اُس کے پاس یادگار لمحات تصاویر کی شکل میں ہمیشہ محفوظ رہیں۔
اُنہوں نے کہا کہ دورانِ حج، میں نے اور میری اہلیہ ندا نے جو عبادات کیں، وہ ہمارا اور اللہ تعالیٰ کا معاملہ ہے، دوسرے لوگوں کو اس بارے میں بولنے کا کوئی حق نہیں۔
یاسر نواز نے مزید کہا کہ جن لوگوں نے حج کی ہماری تصاویر اور ویڈیوز پر تنقید کیں، مجھے اُن کی تنقید سے کوئی فرق نہیں پڑتا۔
مزید پڑھیں: معروف میزبان ندا یاسر حج کیلئے روانہ
دوسری جانب اداکارہ و ٹی وی میزبان ندا یاسر نے کہا کہ اللہ تعالیٰ تنقید کرنے کرنے والوں کو ہدایت دے اور انہیں بھی ہماری طرح حج کی سعادت نصیب فرمائے۔
ندا یاسر نے مزید کہا کہ ناقدین کو ہمارے کام سے سیکھنا چاہیے اور اُنہیں ہمارے نقشِ قدم پر چلتے ہوئے قریضہ حج ادا کرنا چاہیے۔
واضح رہے کہ یاسر نواز اور اُن کی اہلیہ ندا نے حال ہی میں حج کی سعادت حاصل کی، اس دوران جوڑے نے اپنے یوٹیوب چینل پر حج کے وی لاگز بھی پوسٹ کیے تھے۔
اس جوڑے کی جانب سے دورانِ حج تصاویر اور ویڈیوز سوشل میڈیا پر شیئر کرنے پر صارفین نے انہیں شدید تنقید کا نشانہ بنایا تھا۔
