وفاقی دارالحکومت میں سکیورٹی صورتحال’صوبوں سے 23 ہزار 500 پولیس اہلکار طلب

لاہور (کرائم رپورٹر) وفاقی حکومت نے وفاقی
دارالحکومت میں سکیورٹی اور امن و امان کی صورتحال کے پیش نظر صوبوں سے 23 ہزار500 پولیس اہلکار طلب کر لیے۔ اس حوالے سے پنجاب، سندھ اور بلوچستان حکومتوں کو مراسلہ ارسال کر دیا گیا ہے۔ مراسلے کے مطابق اسلام آباد میں سکیورٹی ڈیوٹی کے لیے پنجاب پولیس سے 15 ہزار، سندھ پولیس سے8 ہزار جبکہ بلوچستان پولیس سے500 اہلکار طلب کیے گئے ہیں۔ وفاقی حکومت کی جانب سے مطلوبہ پولیس نفری کو20 ستمبر تک اسلام آباد میں رپورٹ کرنے کی ہدایت کی گئی ہے۔ پولیس اہلکاروں کی تعیناتی کا مقصد وفاقی دارالحکومت میں سکیورٹی انتظامات کو مزید موثر بنانا اور امن و امان کی صورتحال کو برقرار رکھنا ہے۔ مراسلہ پنجاب، سندھ اور بلوچستان حکومتوں کے علاوہ وفاقی سکیورٹی و انٹیلی جنس اداروں کو بھی ارسال کر دیا گیا ہے۔