نیپال کے وسطی علاقے میں واقع ہملنگ ہمال (Himlung Himal) کے بیس کیمپ پر برفانی تودہ گرنے سے کم از کم 15 نیپالی کارکن جاں بحق ہوگئے، جبکہ ایک کارکن تاحال لاپتا ہے۔ یہ واقعہ رواں موسم خزاں کی کوہ پیمائی مہم کے دوران نیپال میں پیش آنے والا مہلک ترین حادثہ قرار دیا جا رہا ہے۔
7,126 میٹر بلند پہاڑ پر نیپالی کارکن غیرملکی کوہ پیماؤں کی آمد سے قبل کیمپ قائم کرنے، خیمے لگانے اور رسیاں محفوظ کرنے میں مصروف تھے کہ برفانی تودہ بیس کیمپ سے ٹکرا گیا۔ حادثے کے وقت غیرملکی کوہ پیما ابھی وہاں نہیں پہنچے تھے۔
ریسکیو ٹیموں نے جمعرات کو برف کے نیچے سے مزید 8 لاشیں نکالیں، جبکہ اس سے قبل 7 لاشیں برآمد کی جاچکی تھیں۔ نیپال نیشنل ماؤنٹین گائیڈ ایسوسی ایشن کے مطابق ایک کارکن اب بھی لاپتا ہے اور خراب موسمی و پہاڑی حالات کے باعث تلاش کا عمل مشکل رہا۔
حکام کے مطابق برآمد ہونے والی لاشوں کو ہیلی کاپٹر کے ذریعے کھٹمنڈو منتقل کیا جا رہا ہے۔ نیپال میں ہر سال ہزاروں غیرملکی سیاح اور کوہ پیما آتے ہیں، جبکہ مقامی گائیڈز، پورٹرز اور دیگر معاون عملہ ان مہمات کا اہم حصہ ہوتا ہے۔
نیپال میں برفانی تودہ گرنے سے 15 کوہ پیمائی کارکن جاں بحق، ایک لاپتا
