لاہور(آئی این پی) پاکستان اور سری لنکا کے درمیان قذافی اسٹیڈیم لاہور میں تیسرے ٹی ٹوئنٹی میچ کیلیے سری لنکن اسکواڈ کے ویزوں کے حصول کیلیے پاکستانی سفارتخانے میں درخواست جمع کرا دی گئی ۔پاکستان اور سری لنکا کے مابین 29 اکتوبر کو قذافی اسٹیڈیم لاہور میں شیڈول تیسرے ٹی ٹوئنٹی میچ کیلیے سری لنکا کے 16 رکنی اسکواڈ اور 5 آفیشلز کے ویزوں کے حصول کیلیے پاکستانی سفارتخانے میں درخواست جمع کرا دی گئی، ضروری کارروائی کے بعد جلد آئی لینڈرز کو ویزے جاری ہو جائیں گے۔لاہور میں ٹی ٹوئنٹی سیریز کیلیے سری لنکن ٹیم کی قیادت تھسارا پریرا کر رہے ہیں، کپتان اپل تھارنگا، لیستھ مالنگا، دنیش چندیمل اور سورنگا لکمل شامل نہیں، ہیڈ کوچ نک پوتھاس اور فزیو بالا سنگھم بھی ہمراہ نہیں ہونگے۔ٹی ٹوئنٹی سیریز کےلیے زیادہ تر نئے کرکٹر شامل کئے گئے ہیں، اسکواڈ میں تھسارا پریرا (کپتان)، تھیس دلشان موناریوا، دنشکا گوناتھیلاکا، سدیرا سماراوکراما، آشان پریانجن، مہیلا اداوتے، دسون شناکا، سچتھ پتھیرانا، وکرم سنجایا، لاہیرو گماگے، سیکوجے پرسانا، وشوا فرنینڈو، اسورو ادانا، جیفرے ونڈرسے اور چتورنگا ڈی سلوا شامل ہیں۔
