لاہور (خصوصی رپورٹ) ڈپٹی سپیکر پنجاب اسمبلی کی سرکاری گاڑی پر قومی پرچم الٹا لگا دیا گیا۔ ڈپٹی سپیکر الٹا پرچم لٹکائے ہی گاڑی میں گھومتے رہے۔ ڈپٹی سپیکر دوست محمد مزاری اور ان کے سٹاف نے گاڑی پر لگے پرچم کو نظرانداز کئے رکھا۔ ڈپٹی سپیکر اسمبلی میں شرکت کےلئے اجلاس میں اسی الٹے پرچم والی گاڑی میںہی آئے۔ گاڑی سے اترے اور اسمبلی میں پہنچ گئے۔ ڈپٹی سپیکر کے جانے کے بعد سٹاف کو نشاندہی کی گئی جس پر گاڑی کا الٹا پرچم درست کرلیا گیا۔

لاہور (خصوصی رپورٹ) پاکستان کی سیاست میں فاطمہ بھٹو کی دبنگ انٹری کا امکان، گورنر سدھ لگایا جائے گا۔ تفصیلات کے مطابق پاکستان تحریک انصاف کی اعلیٰ قیادت نے فیصلہ کیاہے کہ حکومت رہے نہ رہے جس جس کے ہاتھ خون یا کرپشن سے لدے ہوئے ہیں ان کے پلے اب کچھ نہیں چھوڑا جائیگا۔ سندھ میں پیپلزپارٹی کا بھی صفایا ہونے جارہا ہے کیونکہ وہاں کسی کو کوئی رعایت نہیں ملنے والی اور سارے معاملے کو بڑے پیمانے پر ہینڈل کرنے کے لیے ایک بڑا فیصلہ کیاجارہاہے کہ فاطمہ بھٹو جن کا بھٹو خاندان سے سو فیصد تعلق ہے۔

اسلام آباد (مانیٹرنگ ڈیسک) ایف بی آر نے انکشاف کیا ہے کہ پاکستانیوں کے بیرون ملک پچاس ہزار اکاﺅنٹس کا پتہ چلا لیا ہے جن میں سے زیادہ تر کا تعلق کراچی لاہور اور اسلام آباد سے ہے۔ ممبر ایف بی آر نے بتایا کہ دوبئی میں 537 افراد کی 1385 جائیدادوں کی تحقیقات کی ہیں۔ دوبئی میں 38 ارب کی 867 جائیدادوں کی بھی تصدیق ہوئی ہے۔ اکاﺅنٹس سپین اٹلی فرانس جرمنی اور دیگر ملکوں میں بھی ہیں۔ بیرون ملک اثاثوں کے کیس میں وفاقی تحقیقاتی ادارے کی جانب سے متحدہ عرب امارات میں جائیدادیں رکھنے والے 25 سیاستدانوں کا انکشاف کیا گیا ہے۔ایف آئی اے نے بیرون ملک پاکستانی شہریوں کے اثاثوں کے کیس میں سپریم کورٹ میں رپورٹ جمع کرادی۔رپورٹ میں ایف آئی اے نے بتایا کہ سیاسی شخصیات کی جائیداد قانونی یا غیرقانونی ہونے کا تعین نہیں کیا جا سکا۔ ان کا کہنا تھا کہ تحقیقات میں ایمنسٹی اسکیم سے فائدہ اٹھانے والوں کی معلومات خفیہ ہونے کے باعث ایف آئی اے کو مشکلات کا سامنا ہے۔واضح رہے کہ قانون کے مطابق وفاقی بورڈ آف ریوینیو (ایف بی آر) ایمنسٹی اسکیم کی معلومات خفیہ رکھنے کا پابند ہے۔رپورٹ میں بتایا گیا کہ قومی احتساب ادارے (نیب) کے 21 ملزمان بھی ایمنسٹی اسکیم سے فائدہ اٹھانے والوں میں شامل ہیں۔ان کا کہنا تھا کہ 2 مفرور ملزمان بھی یو اے ای میں جائیدادوں کے مالک ہیں۔رپورٹ کے مطابق 895 میں سے 642 افراد نے بیان حلفی ایف آئی اے کو جمع کرا دیے جس میں سے 72 پاکستانیوں نے یو اے ای میں جائیداد ہونے سے انکار کیا۔ایف آئی اے کے مطابق 364 افراد نے ایمنسٹی اسکیم میں اور 200 نے اسکیم سے پہلے جائیداد ظاہر کیں۔ فیڈرل بورڈ آف ریونیو (ایف بی آر) نے برطانیہ اور دبئی میں جائیداد بنانے والے 15 سو پاکستانیوں کو شوکاز نوٹس ارسال کرنے کا فیصلہ کرلیا۔پہلے مرحلے میں ان ایک ہزار افراد کو نوٹسز ارسال کیے جائیں گے جنہوں نے برطانیہ میں جائیداد بنائی اور باقاعدہ ماہانہ کرایہ وصول کیا۔دوسرے مرحلے میں دبئی میں جائیداد بنانے والے 500 افراد کو نوٹس ارسال کیے جائیں گے۔اس ضمن میں آرگنائزیشن آف اکنامکس کارپوریشن اینڈ ڈیولپمنٹ (او ای سی ڈی) اور برطانیہ کے ٹیکس اتھارٹی، ایف بی آر کو معلومات فراہم کرنے میں معاونت کرے گی تاہم دبئی کے تناظر میں ٹیکس حکام ساری تفصیلات فراہم کریں گے۔ایف بی آر حکام کو یقین ہے کہ نوٹس کے ذریعے ٹیکس وصول کنندہ گان اس امر کا ادراک کرسکیں گے کہ صارفین نے اپنی ساری جائیداد کا تذکرہ ٹیکس ایمنسٹی اسکیم میں کیا یا پھر نہیں۔ایف بی آر ذرائع نے بتایا کہ ’ہمیں ٹھیک طرح سے معلوم نہیں ہے کہ برطانیہ اور دبئی میں کتنی سرمایہ کاری کی گئی۔ دوسری جانب ڈائریکٹر انٹیلی جنس اور تحقیقات نے پراپرٹی، گفٹ اسکیم، گاڑیاں وغیرہ سے متعلق تمام ڈیٹا جمع کرلیا ہے اور مذکورہ تفصیلات ریجنل ٹیکس افسران کے ساتھ شیئر کی جا چکی ہیں۔ ایف بی آر کے مطابق 82 ہزار 8 سو 48 افراد نے ٹیکس ایمنسٹی اسکیم سے فائدہ اٹھاکر اپنے اثاثے ظاہر کیے اور تقریباً 25 کھرب روپے مالیت کے اثاثوں کو وائٹ منی میں تبدیل کیا۔ ان میں 5 ہزار 3 سو 63 افراد نے بیرون ملک اثاثے جبکہ 77 ہزار 4 سو 85 افراد نے اندورن ملک اثاثے ظاہر کیے۔ایمنسٹی اسکیم کے تحت 2 ماہ میں ایف بی آر نے ایک سو 21 ارب روپے ٹیکس وصول کیا جس میں سے 44 ارب روپے بیرون ملک اثاثوں جبکہ 77 ارب روپے اندرون ملک اثاثوں کی مد میں وصول کیا گیا۔

اسلام آباد (ملک منظور احمد) قومی اسمبلی میں قائد حزب اختلاف میاں شہبازشریف اور پاکستان پیپلز پارٹی کے شریک چیئرمین آصف علی زرداری اور دیگر اپوزیشن سے تعلق رکھنے والے قائدین کے درمیان ہونے والی ملاقات کے نتیجے میں ملک کی قومی سیاست میں ایک ہلچل مچ گئی ہے ،پاکستان پیپلزپارٹی نے ملک کو سیاسی عدم استحکام اور محاذآرائی سے بچانے کے لئے قومی حکومت کی تشکیل کی تجویز دیدی ہے، پاکستان مسلم لیگ (ن) کی قیادت نے اس تجویز پر غور وخوض کے لئے دیگر سیاسی جماعتوںکے ساتھ رابطے کرنے کا فیصلہ کیا ہے ،ذمہ دار سیاسی ذرائع نے بتایا کہ اپوزیشن کی طرف سے پارلیمنٹ کے اندر اور باہر موجودہ حکومت کو ٹف ٹائم دینے کے لیے جے یو آئی کے سربراہ مولانا فضل الرحمان کی طرف سے مجوزہ کل جماعتی کانفرنس کے انعقاد پر اب سنجیدگی سے نہ صرف غور وخوض شروع کردیا ہے بلکہ پہلی مرتبہ آصف علی زرداری اور بلاول بھٹو زرداری اس مجوزہ کانفرنس میں شرکت کریں گے ،اپوزیشن نے ایوان کے اندر عددی اکثریت حاصل کرنے کے لیے آزاد ارکان پارلیمنٹ اور تمام چھوٹی جماعتوں سے رابطے کرنے کا فیصلہ کیا ہے ،مسلم لیگ ن کے ذمہ دار رہنماﺅں نے کہا ہے کہ ابھی ہمیں ان ہاﺅس تبدیلی اور موجودہ حکومت کو گرانے کی جلدی نہیں تاہم بہت جلد قومی حکومت کی تشکیل اور ان ہاﺅس تبدیلی کے حوالے سے اپوزیشن اتحاد آنے والے دنوں واضح لائح عمل کا اعلان کرے گا ،اپوزیشن سے تعلق رکھنے والی دونوں بڑی سیاسی جماعتوں مسلم لیگ ن اور پیپلز پارٹی کے مرکزی قائدین نے ماضی کے سیاسی اختلافات اور جارحانہ بیانات کو پس پشت ڈالتے ہوئے یہ فیصلہ کیا ہے کہ اہم قومی ایشوز پر اپوزیشن نہ صرف متفقہ لائحہ عمل اختیا رکرے گی بلکہ حکومت مخالف تحریک کے حوالے سے اتفاق رائے سے فیصلے کیے جائیں گے ،اپوزیشن کے اجلاس میں حکومت کے اتحادی مینگل گروپ کی شرکت نے تحریک انصاف کے لیے خطرے کی گھنٹی بجادی ہے ،اپوزیشن کے ذرائع نے بتایا کہ حکومت کی ایک اور اتحادی جماعت ایم کیوایم سے بھی رابطے کرنے کا فیصلہ کیا گیا ہے ،فاٹا سے تعلق رکھنے والے بعض ارکان پارلیمنٹ بھی اپوزیشن کے ساتھ رابطے میں ہیں ،باور کیا جاتا ہے کہ وفاقی وزیرخزانہ اسد عمر کی طرف سے پیش کیے جانے والے منی بجٹ کے موقع پر اپوزیشن اتحاد مزید فعال اور متحرک ہوجائے گا ،سردار اختر مینگل نے آصف علی زرداری کی دعوت پر اپوزیشن میں متحرک کردار ادا کرنے کا فیصلہ کیا ہے ،قومی سیاسی منظر نامے میں اپوزیشن آنے والے دنوں میں مزید ہنگامہ خیزی پید اکرنے کی کوشش کرے گی ۔