میرپور: (ویب ڈیسک) آزاد کشمیر میں بلدیاتی انتخابات کے آخری مرحلے میں پاکستان تحریک انصاف (پی ٹی آئی) کے امیدوار راجہ نوید اختر گوگا بلا مقابلہ چئیرمین ضلع کونسل میرپور منتخب ہو گئے۔
میونسپل کارپوریشن کے میئر اور ڈپٹی میئر کے انتخاب کیلئے پولنگ کا عمل جاری ہے، پولنگ کے عمل کا آغاز صبح 10 بجے ہوا تھا جو کہ دن 2 بجے تک جاری رہے گا۔
میئر کیلئے پی ٹی آئی کے امیدوار عثمان خالد اور (ن) لیگ کے امیدوار عبدالرزاق کے درمیان مقابلہ ہے، ڈپٹی مئیر کیلئے پی ٹی آئی کے امیدوار رمضان چغتائی اور مسلم لیگ (ن) کے خواجہ راشد صدیق آمنے سامنے ہیں۔
ضلع کچہری میرپور میں امن وامان کی صورت حال برقرار رکھنے کیلئے پولیس کی بھاری نفری تعینات کی گئی ہے۔

کراچی: (ویب ڈیسک) سندھ ہائیکورٹ نے تحریک انصاف کراچی کے مستعفی ایم این ایز کی استعفوں کی منظوری کیخلاف فوری سماعت کی درخواست پر الیکشن کمیشن کو نوٹس جاری کردیئے۔
چیف جسٹس سندھ ہائیکورٹ جسٹس احمد علی شیخ کی سربراہی میں 2 رکنی بنچ نے تحریک انصاف کراچی کے مستعفی ایم این ایز کی استعفوں کی منظوری کیخلاف درخواست پر سماعت کی۔ پی ٹی آئی کے مستعفی ارکان اسمبلی نے فوری سماعت کی استدعا کی۔
چیف جسٹس نے استفسار کیا کہ آپ کو کیا ارجنسی ہے کیوں آئے ہیں؟ پی ٹی آئی کے وکیل نے موقف دیا کہ ضمنی الیکشن 16 مارچ کو ہے ہماری درخواست فوری سنی جائے، آپ نے 21 مارچ کی تاریخ مقرر کی ہے جب تک الیکشن ہوجائیں گے، بیلٹ پیپرز چھپ گئے تو عوام کے کروڑوں روپے ضائع ہوں گے۔
چیف جسٹس نے ریمارکس دیئے کہ ہم درخواست کو سن کر فیصلہ کریں گے، آپ جذباتی ماحول کیوں بنارہے ہیں ہم قانون کے مطابق سن کر فیصلہ کردیں گے۔
دائر درخواست میں موقف اپنایا گیا تھا کہ ارکین قومی اسمبلی کو غلط طور پر ڈی ناٹفائی کیا گیا ہے اور قانونی طریقہ کار اختیار نہیں کیا گیا، سپیکر قومی اسمبلی نے استعفوں کی منظوری کا پروسیس قانون کے مطابق پورا نہیں کیا، استعفیٰ دینے والے ارکان سے ان کے استعفوں کی تصدیق نہیں کی گئی، الیکشن کمیشن نے بھی اس فیصلے کی روشنی میں ایم این ایز کو ڈی نوٹیفائی کردیا، استعفوں کی منظوری کے الیکشن کمیشن کے نوٹیفکیشن کو غیر قانونی اور کالعدم قرار دیا جائے۔
درخواستیں دائر کرنے والوں میں ایم این اے علی زیدی، آفتاب جہانگیر، فہیم خان، عطاء اللہ ایڈووکیٹ، سیف الرحمان محسود، آفتاب صدیقی، اسلم خان، نجیب ہارون اور عالمگیر خان شامل ہیں۔
بعدازاں عدالت نے فوری سماعت کی درخواست پر الیکشن کمیشن کو نوٹس جاری کردیئے، عدالت نے 7 مارچ کے لئے درخواست کی سماعت مقرر کردی۔

لاہور: (ویب ڈیسک) لاہور ہائیکورٹ نے شہر کے ماسٹر پلان 2050 پر عملدرآمد کے حکم امتناع میں مزید توسیع کر دی ہے۔
لاہور ہائی کورٹ کے جسٹس شاہد کریم نے شہری میاں عبدالرحمان سمیت دیگر کی درخواستوں پر سماعت کی جس دوران لاہور ڈویلپمنٹ اتھارٹی کے وکیل صحت کی خرابی کی وجہ سے عدالت میں پیش نہیں ہو سکے۔
عدالت نے درخواست پر سماعت ملتوی کرتے ہوئے لاہور ماسٹر پلان 2050 پر عملدرآمد کے حکم امتناع میں 28 مارچ تک توسیع کر دی۔

رحیم یار خان: (ویب ڈیسک) ریلوے ملازمین نے رحیم یار خان میں ریلوے سٹیشن کے قریب تخریب کاری کا منصوبہ ناکام بناتے ہوئے مسافر ٹرین کو بڑے حادثے سے بچا لیا۔
ریلوے حکام کے مطابق کچھ تخریب کار ولہار ریلوے سٹیشن کے قریب ٹریک کو کھول رہے تھے، جب ریلوے ملازمین موقع پر پہنچے تو ملزمان نے ان پر حملہ کر دیا۔
واقعہ کے دوران سلاخیں اور پتھر لگنے سے پاکستان ریلوے کا ایک ملازم شدید زخمی ہوگیا جو دوران علاج ہسپتال میں دم توڑ گیا، تخریب کاروں کا منصوبہ ناکام ہونے سے علامہ اقبال ایکسپریس حادثےسے بال بال بچ گئی۔
مزید برآں پولیس کی جانب سے واقعے کا مقدمہ تھانہ کوٹ سبزل میں درج کر لیا گیا جس کے بعد مزید تحقیقات کا آغاز بھی کر دیا گیا ہے۔

اسلام آباد: (ویب ڈیسک) وزیر اعظم شہباز شریف سے چیئرمین جوائنٹ چیفس آف سٹاف کمیٹی جنرل ساحر شمشاد مرزا نے وزیراعظم ہاؤس میں ملاقات کی ہے۔
ذرائع کے مطابق ملاقات میں قومی سلامتی کی صورتحال سمیت ملک کی مجموعی سکیورٹی کی صورتحال پر تبادلہ خیال کیا گیا۔
ملاقات میں مسلح افواج سے متعلق معاملات پر اظہار خیال کیا گیا جبکہ پیشہ ورانہ امور پر بھی بات چیت کی گئی۔

اسلام آباد: (ویب ڈیسک) آصف زرداری پر عمران خان کے قتل کی سازش کے الزام کے کیس میں شیخ رشید کے خلاف فرد جرم آج بھی عائد نہ ہو سکی۔
ڈسٹرکٹ اینڈ سیشن کورٹ اسلام آباد میں شیخ رشید کےخلاف آصف زرداری پر عمران خان کے قتل کی سازش کے الزامات سے متعلق کیس کی سماعت ہوئی۔
شیخ رشید نے جوڈیشل مجسٹریٹ عمرشبیر کی عدالت میں طبی بنیادوں پر حاضری سے استثنیٰ کی درخواست دائر کردی۔
درخواست میں موقف اختیار کیا گیا کہ طبیعت ناساز ہے، ڈاکٹروں نے آرام کا مشورہ دیا ہے، آج عدالت میں پیش نہیں ہو سکتا، حاضری سے استثنیٰ دیا جائے، شیخ رشید کی میڈیکل رپورٹ بھی درخواست کے ساتھ منسلک کی گئی۔
عدالت نے شیخ رشیدکی طبی بنیادوں پر آج حاضری سے استثنیٰ کی درخواست منظور کرلی اور فرد جرم عائد کرنے کی تاریخ 21 مارچ مقرر کردی۔
واضح رہےکہ شیخ رشید پر آج فرد جرم عائد ہونا تھی، عدالت کی جانب سے حاضری یقینی بنانےکا حکم دیا گیا تھا، گزشتہ سماعت پر پولیس نے مقدمےکا چالان عدالت میں جمع کرایا تھا۔

کراچی: (ویب ڈیسک) ڈالر روپے کو روندتے ہوئے ملکی تاریخ کی بلند ترین سطح پر جا پہنچا، امریکی کرنسی کی قیمت میں آج پھر کاروبار کے آغاز پر بڑا اضافہ ہوا ہے۔
کاروباری ہفتے کے چوتھے روز امریکی کرنسی کی قدر میں بڑا اضافہ ریکارڈ کیا گیا ہے، انٹربینک میں 13 روپے 89 پیسے اضافے کے بعد ڈالر 280 روپے کی سطح پر ٹریڈ کر رہا ہے۔
یاد رہے کہ گزشتہ روز کاروبار کے اختتام پر انٹر بینک میں ڈالر 266 روپے 11 پیسے پر بند ہوا تھا۔

لاہور: (ویب ڈیسک) پاکستان تحریک انصاف کے چیئرمین اور سابق وزیراعظم عمران خان کا لیفٹیننٹ جنرل ریٹائرڈ امجد شعیب کی دوران حراست سوشل میڈیا پر وائرل ہونے والی تصویر پر ردعمل آگیا۔
سماجی رابطے کی ویب سائٹ ٹوئٹر پر سابق وزیراعظم عمران خان نے امجد شعیب کی تصویر شیئر کی ہے اور لکھا کہ ان کو اس طرح دیکھ کر بطور پاکستانی مجھے شرمندگی محسوس ہو رہی ہے۔
عمران خان کا کہنا ہے کہ امپورٹڈ حکومت نے ایک محب وطن پاکستانی کو بغاوت کے الزام میں جیل بھیج دیا ہے۔
واضح رہے کہ لیفٹیننٹ جنرل ریٹائرڈ امجد شعیب کی دوران حراست تصویر سوشل میڈیا پر وائرل ہوگئی ہے، امجد شعیب 3 روزہ جسمانی ریمانڈ پر پولیس تحویل میں ہیں، ان کو ٹی وی پر مبینہ اشتعال انگیز بیان پر گرفتار کیا گیا ہے۔

راولپنڈی: (ویب ڈیسک) سربراہ عوامی مسلم لیگ اور سابق وزیر داخلہ شیخ رشید نے کہا ہے کہ اس پر سب ججز متفق ہیں کہ 90 دن میں الیکشن ہوں گے اور الیکشن کمیشن اس کو یقینی بنائے گا، نگران حکومت 90 دن کیلئے ہے۔
سماجی رابطے کی ویب سائٹ ٹوئٹر پر اپنے پیغام میں سابق وفاقی وزیر شیخ رشید نے کہا کہ مہنگائی 50 فیصد بڑھ گئی اور ڈالر بھی 275 روپے کا ہوگیا، آسیب زدہ سائے ملک میں چھا جانے کا خطرہ ہے، پاکستان ڈیموکریٹک موومنٹ (پی ڈی ایم) میں پھوٹ پڑ گئی ہے، جمعہ کے روز 3 بجے لال حویلی میں پریس کانفرنس کروں گا۔
انہوں نے کہا کہ فضل الرحمان کا فرنٹ مین خیبر پختونخوا کا گورنر صوبے کی سیاست کیلئے صدر کے پاس کیا پیغام لایا وہ جلد ٹوئٹ کروں گا، اہم خبر کیلئے عوام میرے ٹوئٹر اکاؤنٹ کو 30 اپریل تک فالو کریں۔
شیخ رشید کا مزید کہنا تھا کہ یہ 3 ججوں کا نہیں بلکہ ساری سپریم کورٹ اور پاکستان کی عزت، وقار کا مسئلہ ہے جسے سارے جمہوریت دشمن ڈاکو داؤ پر لگانا چاہتے ہیں، جن 2 قابل احترام ججوں نے کیس سنا ہی نہیں ان کو فیصلے میں کیسے دھکیلا جا سکتا ہے۔

لاہور: (ویب ڈیسک) لاہور ہائیکورٹ نے وفاقی وزیر داخلہ رانا ثناء اللہ کے خلاف توہین عدالت کی درخواست ناقابل سماعت قرار دیتے ہوئے مسترد کر دی۔
لاہور ہائیکورٹ کے جسٹس عابد عزیز شیخ نے شہری رانا شاہد کی درخواست پر تحریری فیصلہ جاری کر دیا۔
تحریری فیصلے میں لکھا گیا ہے کہ درخواست گزار نے آڈیو لیکس کے معاملے پر ثبوت نہیں لگائے، آڈیو لیک کا ٹرانسکرپٹ بھی ساتھ نہیں لگایا گیا، درخواست گزار متاثرہ فریق نہیں ہے۔
فیصلے میں مزید کہا گیا کہ وفاقی وزیر داخلہ رانا ثناء اللہ کیخلاف درخواست ناقابل سماعت قرار دے کر مسترد کی جاتی ہے۔