اسلام آباد (خصوصی رپورٹ) بھارتی کمیونسٹ پارٹی (مارکسسٹ) نے بھارتی وزیراعظم نریندر مودی کو جیب کترا قرار دے دیا ہے۔ کرنسی نوٹوں کی بندش پر نریندر مودی کے خلاف سخت بیان جاری کرتے ہوئے کمیونسٹ پارٹی آف انڈیا کے سیکرٹری جنرل سیتارام یچوری نے کہا ہے کہ بھارتی وزیراعظم نے عوام کو ان کے پیسے سے اس طرح محروم کر دیا ہے جیسے ایک جیب کترا کرتا ہے ۔ انہوں نے بھارتی وزیراعظم پر الزام عائد کیا کہ انہوں نے ناجائز دولت رکھنے والوں کو اپنی دولت کو قانونی بنانے میں مدد دی ہے اور ان کا یہ دعوی کہ نوٹوں پر پابندی کے باوجود ملکی شرح افزائش 7 اعشاریہ ایک فیصد ہوجائے گی دھوکا دینے کے مترادف ہے۔ انہوں نے کہا کہ حکومت یہ دعوی کیسے کرسکتی ہے کہ اسے ناجائز دولت کے خلاف کامیابی حاصل ہوئی ہے جب کہ اس نے ابھی تک یہ بھی نہیں بتایا کہ بینکوں کے پاس کتنی رقم واپس آئی ہے جبکہ رقم نکلوانے پر بدستور پابندی ہے۔
