کراچی(نیوز ڈیسک)پیپلزپارٹی نے 2018 کے عام انتخابات میں ایک اورسرپرائزدینے کا فیصلہ کرلیاہے، بے نظیربھٹو کی بہن صنم بھٹو بلاول بھٹو کے ساتھ ملک بھرمیں انتخابی جلسوں سے خطاب اورلیاری سے الیکشن میں حصہ لے سکتی ہیں۔پیپلزپارٹی کی سینٹرل ایگزیکیٹو کمیٹی کے اجلاس میں پیپلزپارٹی کی شہید چیئرپرسن محترمہ بے نظیربھٹوکی بہن صنم بھٹو کو2018 کے انتخابات میں انتخابی معرکے میں اتارنے کی تجویز پیش کی گئی ۔ پیپلزپارٹی کے ذرائع کا کہنا ہے کہ پیپلزپارٹی نے فی الحال معاملے کوآئندہ انتخابات کے اعلان تک خفیہ رکھنے کا فیصلہ کیا ہے تاہم یہ طے کرلیا گیا ہے کہ صنم بھٹو نہ صرف 2018 کے انتخابی معرکے میں خود حصہ لیں گی بلکہ وہ بلاول بھٹو کے ساتھ ملک بھرمیں انتخابی جلسوں میں شرکت کریں گی۔ پیپلزپارٹی کے ایک حلقے کی جانب سے تجویز دی گئی کہ صنم بھٹو کوسینٹرل ایگزیکٹیوکمیٹی کا ممبربنایا جائے ۔ پیپلزپارٹی کے معتبرترین ذرائع کے مطابق صنم بھٹو کولیاری کی نشست سے انتخاب لڑایا جائے گا ۔سابق صدرآصف زرداری کی ہدایت پرفی الحال صنم بھٹو کو پیپلزپارٹی کے پلیٹ فارم پرفعال کرنے کی تجویز سے اتفاق کیا گیاہے تاہم سابق صدر صنم بھٹو کومیدان سیاست میں عین انتخابات کے موقع پرلاکرملکی سیاست میں ایک نیا سرپرائز دینا چاہتے ہیں۔

لاہور(نیوز ڈیسک)سر براہ میڈیا سیل تحرےک انصاف پنجا ب ڈاکٹر شاہد صد یق خان نے کہا ہے کہ بیدیاں روڈ لاہور میں وین دھماکے کی شدید الفاظ میں مذمت کرتے ہیں اور حکومت سے مطالبہ کرتا ہے کہ واقع کی تحقیقات کر کے قوم کے سامنے لائی جائے اور ذمہ داران کو قرارواقعی سزا دی جائے تاکہ ایسے واقعات دوبارہ رونما نہ ہوں۔ اپنے جاری بیان میں انہو ں نے کہاکہ پوری قوم دہشت گردی کے خلاف متحد ہے ایسے واقعات سے دشمن ہمارے عزم کو متزلزل نہیں کر سکتے۔ قوم کے ساتھ ساتھ فوج نے بھی دہشت گردی کے خلاف بھرپور جدوجہد کی ہے اور قیمتی جانوں کا نذرانہ پیش کیا ہے ان کی یہ قربانی رائیگاں نہیں جائے گی ۔ ایسی بزدلانہ کاروائیاں ملک واسلام کے خلاف گہری اورخطرناک سازش ہے ایسی کاروائیاں کرنے والوں کو کیفرکردار تک پہنچایاجائے پاکستان میں ایسے پے درپے واقعات کا ہونا حکومت کی نااہلی کا واضح ثبوت ہے انسانیت کے سفاک دشمنوں نے ایک بار پھر ملک عزیزکو خون و آگ میں نہلا دیا ہے۔ وحشی درندے آخر کب تک بے گناہ انسانوں کو انسانیت سوز بربریت کا نشانہ بناتے رہیں گے دہشت گردی کے خلاف جنگ کو سیاسی مصلحتوں کے نذر نہ ہونے دیا جائے۔

اسلام آباد (نیوز ڈیسک) پاکستان تحریک انصاف کے چیئرمین عمران خان نے کہا ہے کہ پاکستان کی ترقی کیلئے تعلیم انتہائی ضروری ہے ، معیاری تعلیم کے لئے اساتذہ کی بھرتی میرٹ پر کی جائے ، تعلیمی نصاب معاشرے اور حالات سے ہم آہنگ کرکے اساتذہ کو تربیت دی جائے ، خیبر پختونخوا میں تعلیمی نظام مثالی ہے ، کرپشن کا پیسہ پکڑ کر تعلیم پر خرچ کرینگے تاکہ قوم کے معماروں کی بہتر تربیت ہوسکے ۔ ان خیالات کا اظہار انہوں نے بدھ کے روز اسلام آباد میں تعلیم کے حوالے سے منعقدہ ایک سیمینار سے خطاب میں کیا چیئرمین تحریک انصاف نے کہا کہ پاکستان کی ترقی کیلئے بہتر اور معیاری تعلیم انتہائی ضروری ہے تحریک انصاف کا منشور معیاری تعلیم کی ضرورت پر زور دیتا ہے اور یہی وجہ ہے کہ خیبر پختونخوا میں تحریک انصاف کی حکومت تعلیمی نظام کی بہتری کیلئے متعدد اقدامات کررہی ہے حالیہ برسوں میں خیبر پی کے حکومت نے تعلیمی اصلاحات کے حوالے سے جو انقلابی کام کیا ہے اس پر ان کی جتنی بھی تعریف کی جائے کم ہے انہوں نے کہا کہ خیبر پختونخوا حکومت نے چالیس ہزار اساتذہ کو این ٹی ایس کے تحت بھرتی کیا تاکہ سفارشی کلچر کا خاتمہ ہوسکے کیونکہ اس سے بڑا ظلم اور کیا ہوسکتا ہے کہ اساتذہ بھی سفارش پر بھرتی ہوں عمران خان نے کہا کہ ناقص سسٹم کے تحت سیاسی بنیادوں پر بھرتی کچھ اساتذہ بیرون ملک کام کررہے ہیں جو ملک وقوم کے لئے انتہائی ضرر رساں ہے تحریک انصاف تعلیم میں بھی انقلابی تبدیلیاں لارہی ہے اور ہماری کوشش ہے کہ طبقاتی نظام تعلیم کو یکساں نظام تعلیم سے بدلا جائے انگریزی وقت کی ضرورت ہے لیکن اس کے سیکھنے کا مقصد یہ نہیں کہ بچوں کو اپنے کلچر سے دور کیا جائے دراصل تعلیمی نظام اور اس کا نصاب معاشرے اور حالات کے مطابق ہونا چاہیے تاکہ جدیدیت کے ساتھ ساتھ بچے اپنی رویات سے بھی باخبر رہے اور اس کے بل بوتے پر اپنے معاشرے کی اصلاح و ترقی کیلئے مثبت انداز میں اپنا کردار ادا کرسکے انہوں نے کہا کہ خیبر پختونخوا میں ہم اپنے منشور کے مطابق تعلیمی اصلاحات لارہے ہیں اور یہ بات ریکارڈ پر ہے کہ خیبر کے پی کے میں نہ صرف ستر فیصد نئے سکول بچیوں کے لئے بن رہے ہیں بلکہ ہر تین کالجز میں سے دو کالجز طالبات کے ہیں جبکہ مدارس کے اساتذہ کو بھی تربیت دینے کے حوالے سے مخلصانہ کام ہورہا ہے تاکہ مدارس کے طلبہ کوبھی قومی دھارے میں لایا جاسکے انہوں نے مزید کہا کہ تحریک انصاف نے کرپشن کیخلاف مسلسل گھیرا تنگ کررکھا ہے اور ہماری پوری کوشش ہے کہ کرپشن کا جتنا پیسہ پکڑیں اسے تعلیم پر ہی خرچ کریں تاکہ حقیقی معنوں میں تبدیلی لائی جاسکے #/s#

پونچھ(نیوز ڈیسک)بھارتی فوج نے ایک بار پھر لائن آف کنٹرول پر سیز فائر کی خلاف ورزی کرتے ہوئے پونچھ سیکٹر پر بلا اشتعال فائرنگ کی جس سے علاقے میں شدید خوف وہراس پھیل گیا تاہم اس واقعہ میں کوئی جانی نقصان نہیں ہوا۔ذرائع کے مطابق بھارتی فوج نے بدھ کی صبح 9 بجے کے قریب پونچھ سیکٹر میں چھوٹے ،خود کار ہتھیا رو ں اور مارٹر گو لو ں سے شدید فائرنگ کی جسپر پاک فوج نے بھر پور جوابی کارروائی کی ،ادھر بھارتی وزارت دفاع کے ترجمان ملیش مہتا نے خبررساں ادارے آئی اے این ایس سے بات چیت کرتے ہوئے الزام عائد کیا کہ پاکستانی فوج کی جانب سے بھارتی فوج کی پوسٹوں پر فائرنگ کی گئی جس کے جواب میں بھارتی فوج کی جانب سے بھی جوابی کارروائی عمل میں لائی گئی اور فائرنگ کا یہ سلسلہ تاحال جاری ہے ،واضح رہے کہ بھارت کی جانب سے گزشتہ چار روز سے مسلسل پونچھ اور جموں کے علاقوں میں بلا اشتعال فائرنگ کا سلسلہ جاری ہے ۔