لاہور (خصوصی رپورٹ) ملک میں نوجوان بڑی تعداد میں منشیات کا استعمال کرنے لگے، سٹوڈنٹس بھی کسی سے پیچھے نہ رہے، دوستوں کے ساتھ ٹولیاں بنا کر مخصوص جگہ پر نشہ کرنے لگے۔ کالج کے بعد اچھی نوکری یا بہترین مستقبل کی بجائے غلط راستہ اختیار کرکے اپنی زندگی تباہ کرنے لگے۔ اقوام متحدہ کی رپورٹ کے مطابق پاکستان میں منشیات کے عادی افراد کی تعداد 7 ملین سے زیادہ ہے جس میں نوجوانوں کی بڑی تعداد بھی شامل ہے جبکہ منشیات کی روک تھام کیلئے حکومتی سطح پر کی جانے والی کوششیں بھی ناکافی ہیں۔ پاکستان میں سب سے زیادہ استعمال کیا جانے والا نشہ چرس ہے جبکہ دنیا بھر میں منشیات کے عادی نوجوانوں کی تعداد 30 ملین کے قریب ہے۔ تفصیلات کے مطابق پاکستان میں منشیات کے عادف افراد کی تعداد سات ملین سے زیادہ ہے اور نشے کی یہ عادت ہر سال تقریباً اڑھائی لاکھ ہلاکتوں کی وجہ بنتی ہے۔ افسوس کی بات یہ ہے کہ ملک میں منشیات کے افراد کی تعداد جاننے کیلئے وفاقی یا صوبائی حکومتیں کوئی ریسرچ نہیں کرواتیں ، تمام رپورٹس اور اعدادوشماراقوام متحدہ سے لی جاتی ہیں، اقوام متحدہ کا منشیات سے متعلقہ محکمہ یو این او ڈی سی کہلاتا ہے۔ پاکستان کے 70 لاکھ منشیات کے عادی افراد کی عمریں 25 سے 39 سال کے درمیان ہیں۔ پاکستان میں منشیات کا مسئلہ دہشت گردی سے بھی بڑا مسئلہ بن چکا ہے کیونکہ دہشت گردی کے نتیجے میں گزشتہ دس برس کے دوران تقریباً ساٹھ ہزار افراد نشانہ بنے جبکہ اس سے چار گنا زیادہ ہلاکتیں منشیات کی وجہ سے ہوئیں۔ دنیا بھر میں منشیات کے استعمال کے حوالے سے مختلف بیماریوں میں مبتلا افراد کی تعداد میں گزشتہ چھ برسوں میں غیر متناسب اضافہ ہوا۔ عالمی سطح پر منشیات کے عادی نوجوانوں کی تعداد 29 ملین سے زائد ہے جبکہ چھ برس قبل یہ تعداد 27 ملین تھی۔ بارہ ملین انسان انہی 29 ملین میں سے ان 14 فیصد افراد کے ساتھ زندگی گزار رہے ہیں جو ایچ آئی وی وائرس کا شکار ہیں۔ دنیا بھر کی منشیات کا 40 فیصد حصہ کراچی کی بندرگاہ اور ہوائی اڈے کے ذریعے سمگل کیا جاتا ہے۔ افغانستان سے چالیس فیصد منشیات اور افیون کا حصہ کراچی جبکہ ساٹھ فیصد حصہ دیگر ممالک کے راستے ناجائز اور خفیہ طریقوں سے فروخت کیا جاتا ہے۔

اسلام آباد (خصوصی رپورٹ) آئندہ عام انتخابات میں الیکٹرانک ووٹنگ اور بائیومیٹرک مشینوں کی خریداری کیلئے مجموعی طور پر 90سے 100ارب روپے کا تخمینہ ہے۔ قانون سازی کے بعد خریداری کیلئے ایک سال کا عرصہ درکار ہو گا جس کی وجہ سے آئندہ الیکشن میں اس کا استعمال ممکن نہیں ہے‘ تاہم الیکشن کمیشن جون کے بعد ہونے والے ضمنی انتخابات میں الیکٹرانک ووٹنگ کا تجربہ کرنا چاہتا ہے۔ کمیشن پائلٹ پراجیکٹ پر یقین رکھتا ہے کیونکہ ٹیکنالوجی کو آہستہ آہستہ متعارف کرانا ہی مناسب ہو گا۔ ذرائع کے مطابق الیکشن کمیشن نے 100بائیومیٹرک اور 150الیکٹرانک مشینوںکی خریداری کا ٹینڈر جاری کردیا ہے۔ پڑوسی ملک بھارت میں 14لاکھ مشینوں کے ذریعے سات مراحل میں 80کروڑ ووٹرز اپنا حق رائے دہی استعمال کرتے ہیں۔ یہ مشینیں بھارت میں ہی بنائی جاتی ہیں جس کی لاگت 300ڈالر ہے۔ پاکستان ہالینڈ سے الیکٹرانک ووٹنگ مشینیں منگوا رہا ہے جو 1600سے 1800ڈالر میں فی مشین پڑے گی جبکہ بائیومیٹرک مشین 1000سے 1200ڈالر میں آئے گی۔ ہمیں الیکشن میں تین لاکھ بائیومیٹرک اور تین لاکھ الیکٹرانک ووٹنگ مشینیں درکار ہوں گی۔ بائیو میٹرک مشینیں بنانے والی یہ کمپنیاں فرانس‘ جرمنی‘ ہالینڈ اور جاپان سے تعلق رکھتی ہیں جہاں الیکشن بیلٹ پیپر پر ہوتا ہے تاہم بھارت‘ کینیڈا‘ آسٹریلیا اور برازیل‘ وینزویلا سمیت امریکہ میں الیکٹرانک ووٹنگ تاحال جاری ہے۔

کراچی،لاہور (مانیٹرنگ ڈیسک) فیکٹری ایریا کے علاقے پنجاب سوسائٹی سے گزشتہ رات گرفتار دہشت گرد کی مبینہ ساتھی کا سراغ مل گیا ، نورین لغاری نامی خاتون دو ماہ شام میں داعش کے ساتھ گزارنے کے بعد چند روز قبل پاکستان آئی تھی ، حساس اداروں نے تحقیقات کے لئے حیدر آباد پولیس سے رابطہ کر لیا ۔ تفصیلات کے مطابق فیکٹری ایریا سے گزشتہ رات گرفتار دہشت گرد کی مبینہ ساتھی کا سراغ مل گیا ۔ گرفتار خاتون نورین لغاری حیدر آباد سندھ کی رہائشی ہے ۔ جائے وقوعہ سے نورین کا کالج کارڈ اور والد عبدالجبار کے شناختی کارڈ کی کاپی ملی ۔ جائے وقوعہ سے نورین کے والد عبدالجبار کا خط بھی ملا ۔ نجی ٹی وی کے مطابق حساس اداروں نے مزید تحقیقات کے لئے حیدر آباد پولیس سے رابطہ کر لیا ۔ ذرائع کے مطابق نورین نے دو ماہ شام میں داعش کے ساتھ گزارے ۔ نورین چھ روز قبل ہی پاکستان آئی تھی ۔

فیصل آبا د (سٹاف رپورٹر)فیصل آباد میں ”چکن پاکس“ کا مرض ”بے قابو“ ہونے لگا ہے رواں سال کے دوران اب تک ہلاکتوں کی تعداد 12اور متاثرین کی تعداد بڑھ کر 58تک جا پہنچی ہے۔ ضلعی انتظامیہ اور محکمہ صحت کے حکام کی غفلت اور لا پرواہی کے باعث چکن پاکس کی وباءبڑے پیمانے پر پھیلنے سے مزید ہلاکتوں اور متاثرین کی تعداد بڑھنے کا خدشہ، جبکہ فیصل آباد میں ڈینگی وائرس بھی پھر سے سر اٹھانے لگا ہے رواں سال میں پہلا کیس سامنے آیا ہے کراچی کی رہائشی 65سالہ خاتون شمیم بی بی شاہکوٹ میں اپنے رشتہ داروں کے ہاں آئی تھی کہ اسے الائیڈ ہسپتال لایا گیا۔ جہاں اس میں ڈینگی وائرس کی تصدیق ہو گئی اور چکن پاکس کا مرض تیزی سے پھیلنے لگا ہے۔ رواں سال میں اب تک چکن پاکس کے مرض میںمبتلا 12مریضوں کی ہلاکتیں ہو چکی ہیں اور رواں ماہ میں چکن پاکس کے مریضوں کی تعداد 47ہو گئی تھی جو کہ اب بڑھ کر 58تک جا پہنچی ہے۔ گزشتہ دنوں میں مزید 11مریضوں کو الائیڈ ہسپتال منتقل کیا گیا ہے اور مریضوں کی تعداد روز بروز بڑھ رہی ہے مریضوں کی تعداد 58سے تجاوز ہونے کا خدشہ،مگر حکومت پنجاب نہ ہی ضلعی انتظامیہ اور نہ ہی محکمہ صحت کے حکام کی طرف سے کوئی مو¿ثر اقدامات کیے جا رہے ہیں۔ سی ای او ہیلتھ ڈاکٹر نوازش نے اس بارے میں شہریوں میں آگاہی مہم شروع کرنے کا ایک منعقدہ اجلاس میں اعلان کیا تھا جو کہ صرف کمرہ اجلاس تک ہی محدود ہو کر رہ گیا ہے۔ اعلان کے باوجود چکن پاکس بیماری کی آگاہی مہم شروع نہ کی جا سکی ہے اور چکن پاکس مرض کے علاوہ ڈینگی وائرس کے بڑے پیمانے پر پھیلاﺅ کا خدشہ لاحق ہے۔ اس امر پر شہریوں نے وزیراعلیٰ پنجاب، صوبائی وزیر ومشیر صحت،چیف سیکرٹری ہیلتھ پنجاب، ڈی سی او ہیلتھ اتھارٹی فیصل آباد سے مطالبہ کیا ہے کہ نوٹس لےکر چکن پاکس کے مرض اور ڈینگی وائرس کی روک تھام کرنے کےلئے ہنگامی بنیادوں پر اقدامات کئے جائیں۔