دبئی (اے پی پی) پاکستان نے کالی آندھی کو ون ڈے سیریز میں شکست دے کر انٹرنیشنل کرکٹ کونسل (آئی سی سی) کی تازہ ترین ٹیم رینکنگ میں آٹھویں پوزیشن پر گرفت مضبوط کر لی، اس کے ساتھ ہی پاکستان کے 2019ءورلڈکپ تک براہ راست رسائی کے امکانات بھی روشن ہو گئے، بلے بازوں میں بابراعظم ایک درجہ ترقی پا کر آٹھویں نمبر پر آ گئے، محمدحفیظ 7 درجے ترقی کے ساتھ ٹاپ ٹونٹی میں شامل ہو گئے جبکہ شعیب ملک 17 درجے چھلانگ لگا کر 45ویں نمبر پر آ گئے، باﺅلرز میں حسن علی کی 15، محمدعامر کی 13، حفیظ کی 11 اور عماد وسیم کی 7 درجے ترقی ہوئی ہے، حفیظ دنیا کے دوسرے بہترین آل راﺅنڈر بن گئے۔ بدھ کو آئی سی سی کی طرف سے جاری کردہ تازہ ترین ون ڈے رینکنگ کے تحت جنوبی افریقن ٹیم بدستور سرفہرست ہے، آسٹریلیا دوسرے، نیوزی لینڈ تیسرے، بھارت چوتھے، انگلینڈ پانچویں، سری لنکا چھٹے، بنگلہ دیش ساتویں نمبر پر موجود ہے، پاکستان نے 90 ریٹنگ پوائنٹس کے ساتھ آٹھویں پوزیشن مزید مستحکم کر لی، ویسٹ انڈین 83 پوائنٹس کے ساتھ نویں نمبر پر موجود ہے، بلے بازوں میں ڈی ویلیئرز پہلے، وارنر دوسرے، ویرات کوہلی تیسرے، جوروٹ چوتھے، فاف ڈوپلیسی پانچویں، ڈی کوک چھٹے، گپٹل ساتویں نمبر پر برقرار ہیں، بابراعظم ایک سیڑھی چڑھ کر آٹھویں نمبر پر آ گئے، محمدحفیظ 7 درجے ترقی پا کر 27ویں سے 20ویں نمبر پر آ گئے، سرفراز احمد دو درجے بہتری کے ساتھ 36ویں نمبر پر آ گئے، شعیب ملک 17 درجے چھلانگ لگا کر 62ویں سے 45ویں نمبر پر آ گئے، باﺅلرز میں عمران طاہر سرفہرست ہیں، سٹارک دوسرے، بولٹ تیسرے نمبر پر موجود ہیں، محمدعرفان 20ویں نمبر پر ہیں، حفیظ 11 درجے اوپر چڑھ کر 38ویں سے 27ویں نمبر پر آ گئے، حسن علی 15 درجے چھلانگ لگا کر 49ویں سے 34ویں، محمدعامر 13 درجے چھلانگ لگا کر 51 سے 38جبکہ عماد وسیم 46 ویں سے 39ویں نمبر پر آ گئے۔

اسلام آباد (اے پی پی) پاکستان نے ایک روزہ بین الاقوامی کرکٹ کی تاریخ میں بھارت کی زیادہ فتوحات کا ریکارڈ توڑ دیا۔ اس طرح گرین شرٹس زیادہ ون ڈے انٹرنیشنل میچز جیتنے والی دنیا کی دوسری ٹیم بن گئی۔ پاکستان نے ویسٹ انڈیز کو تیسرے اور آخری ون ڈے کرکٹ میچ میں شکست دیکر یہ کارنامہ سرانجام دیا۔ ون ڈے کرکٹ کی تاریخ میں زیادہ فتوحات کا عالمی ریکارڈ آسٹریلیا کے پاس ہے۔ تفصیلات کے مطابق ایک روزہ بین الاقومی کرکٹ کی تاریخ میں زیادہ فتوحات کا عالمی ریکارڈ آسٹریلیا کے پاس ہے جس نے اب تک 898 میچز کھیل رکھے ہیں جن میں وہ سب سے زیادہ 554 میچ جیت کر پہلے نمبر پر ہے۔ پاکستان کرکٹ ٹیم نے 1973 میں ون ڈے کیریئر کا آغاز کیا اور اب تک مجموعی طور پر 874 میچز کھیلے، جن میں گرین شرٹس نے 460 میچز میں فتوحات حاصل کیں اور اب زیادہ ون ڈے میچ جیتنے میں دنیا کی دوسری ٹیم میں اس کا شمار ہوتا ہے، 388 میچز میں گرین شرٹس کو شکست کا سامنا کرنا پڑا جبکہ 8 میچز ٹائی ہوئے اور 18 میچز ہار جیت کے فیصلے کے بغیر ہی ختم ہوگئے۔ بھارتی ٹیم ون ڈے میچز میں کامیابی کے تناسب سے تیسرے نمبر پر ہے۔ بھارت کی ٹیم نے اب تک مجموعی طور پر سب سے زیادہ 907 ون ڈے میچز کھیل رکھے ہیں جبکہ وہ 459 میچز میں کامیابی کے ساتھ تیسرے نمبر پر ہے اس کو 402 میچوں میں شکست کا سامنا کرنا پڑا اور 7 میچز ٹائی ہوئے اور 39 میچز بغیر فیصلے کے ختم ہوگئے۔ ویسٹ انڈیز کی ٹیم ون ڈے میچز میں کامیابی کے حوالے سے 378 میچز جیت کر دنیا کی چوتھی ٹیم ہے۔ ویسٹ انڈیز کی ٹیم نے اب تک مجموعی طور پر سب سے زیادہ 754 ون ڈے میچز کھیل رکھے ہیں جبکہ وہ 378 میچز میں کامیابی کے ساتھ چوتھے نمبر پر ہے اس کو 343 میچوں میں شکست کا سامنا کرنا پڑا اور 9 میچز ٹائی ہوئے اور 24 میچز بغیر فیصلے کے ختم ہوگئے۔

لاہور(آئی این پی) قومی کر کٹ ٹیم کے سابق کپتان شاہد آفریدی نے کہا ہے کہ سرفراز احمد ایک جارح مزاج کپتان ہیں اور ٹیم کو ایسے ہی قائد کی ضرورت ہے جب کہ میری نیک خواہشات ان کے ساتھ ہیں۔پاکستان کے سابق کپتان بوم بوم شاہد آفریدی کا کہنا ہے کہ پاکستان ٹیم کو آگے بڑھنے کے لیے بہت زیادہ محنت کی ضرورت ہے، بلاشبہ سرفراز احمد ایک جارح مزاج کپتان ہیں اور ٹیم کو ایسے ہی قائد کی ضرورت ہے، میری نیک خواہشات ان کے ساتھ ہیں اور امید ہے کہ وہ جلد ہی ایسا اچھا کمبی نیشن تشکیل دے کر ٹیم کو دوبارہ پراعتماد بنائیں گے۔آئی سی سی کو دیے گے انٹریو میں شاہد آفریدی کا کہنا تھا کہ پاکستان کے لیے کھیلنا میرے لیے سب سے بڑا اعزاز ہے، کیریئر میں میری کارکردگی میں اتار چڑھاﺅ آتا رہا لیکن طویل کیریئر میں یہ ایک متوقع بات ہے، اتنے لمبے عرصے تک پاکستان کی نمائندگی کرنے پر اللہ تعالیٰ کا شکر گزار ہوں اگرچہ میں نے ایسا سوچا بھی نہیں تھا، کرکٹ میں خوشی سے زیادہ غم ہوتا ہے اور اس عرصے میں کئی مراحل سے گزرنا پڑا۔ انہوں نے کہا کہ اس دوران میرے بھی کچھ خواب اور مقاصد تھے، میں اپنے آپ کو خوش قسمت تصور کرتا ہوں کہ میں اپنی کارکردگی سے کافی حد تک مطمئن ہوں اور لگتا ہے کہ میرا کوئی خواب سچ ہو گیا ہو۔ آفریدی کا کہنا تھا کہ ریٹائرمنٹ کے بعد زیادہ وقت اپنی فاﺅنڈیشن کے کام پر توجہ دوں گا جب کہ اس کے ساتھ ساتھ اپنے مداحوں کےلئے لیگز بھی کھیلوں گا۔