وزیر داخلہ سندھ نے زمین ہتھیالی ،اہم انکشاف

کراچی (خصوصی رپورٹ) لاڑکانہ سے تعلق رکھنے والے پیپلزپارٹی کے رہنما اللہ بخش انڑ نے الزام عائد کیا ہے کہ وزیرداخلہ سندھ سہیل انور سیال نے خیرپور میں میری پانچ سو ایکڑ زمین پر قبضہ کروایا ہے۔ چیف جسٹس سندھ ہائیکورٹ سے اپیل ہے کہ اس صورتحال کا نوٹس لیں۔ وہ کراچی پریس کلب میں پریس کانفرنس کررہے تھے۔ اللہ بخش انڑ نے کہا کہ انہیں اور ان کے بیٹے کو کچھ ہوا تو سہیل انور سیال اور ان کے بھائی طارق سیال کے خلاف مقدمہ درج کیا جائے۔ بعدازاں انہوں نے لاڑکانہ کی باقرانی اور ڈوکری تحصیلوں سے تعلق رکھنے والے افراد کے ہمراہ پریس کلب کے باہر احتجاجی مظاہرہ بھی کیا۔ انہوں نے چیئرمین پیپزپارٹی بلاول بھٹو سے اپیل کی وہ خیرپور میں ان کی زمینوں پر وزیرداخلہ سندھ سہیل انور سیال کی جانب سے مبینہ قبضے کا نوٹس لیں۔