لاہور (خصوصی رپورٹ) پنجاب حکومت نے لاہور شہر کو انتظامی سطح پر چار اضلاع میں تقسیم کرنے کا حتمی فیصلہ کیا ہے، حکومت کے حکم پر کمشنر لاہور نے تمام متعلقہ محکموں سے سفارشات طلب کرلی ہیں تاکہ سمری منظوری کے لیے وزیراعلیٰ پنجاب کو بھجوائی جا سکے۔ ہر ضلع کا علیحدہ ڈپٹی کمشنرہوگا جبکہ پولیس کا سربراہ ڈسٹرکٹ پولیس افسر ہوگا۔ اس تقسیم سے ترقیاتی فنڈز کا استعمال بھی آزادانہ اور منصفانہ ہوگا اور پسماندہ علاقوں کی ترقی بھی ممکن ہوگی۔ تفصیلات کے مطابق پنجاب حکومت نے کمشنر لاہور کی سربراہی میں ایک کمیٹی بنائی تھی کہ وہ لاہور کو چار اضلاع میں تقسیم کرنے کا جائزہ لیکر اپنی سفارشات دیں۔ کمیٹی نے اپنے اجلاس میں آٹھ صوبائی محکموں سے سفارشات طلب کیں جس میں محکمہ ایکسائز اینڈ ٹیکسیشن سے کہا گیا ہے کہ وہ شہر میں ہر یونین کونسل کی سطح پر لگائے گئے پراپرٹی ٹیکس کی تفصیلات فراہم کرے، محکمہ ہاﺅسنگ اینڈ اربن ڈویلپمنٹ سے کہا گیاکہ وہ اربن ڈویلپمنٹ کے جیوگرافیکل رجحان اور پاپولیشن گروتھ کے بارے میں تفصیلات فراہم کریں، لوکل گورنمنٹ اینڈ کمیونٹی ڈویلپمنٹ سے کہا گیا کہ وہ یونین کونسل کی سطح پر رجسٹرڈ ووٹوں کی تفصیلات سے آگاہ کرے اور شہر کی تحصیلوں اور یونین کونسل کی حد بندی کا ڈیجیٹل نقشہ فراہم کریں، کوآپریٹو ڈیپارٹمنٹ سے کہا گیا کہ لاہور میں کل رجسٹرڈ سوسائٹیوں اور ان کے نقشہ جات فراہم کریں، لاہور ڈویلپمنٹ اتھارٹی کو حکم دیا گیا کہ اس کی منظور شدہ ہاﺅسنگ سوسائٹیوں اور ان کے نقشہ جات کی تفصیلات فراہم کریں جبکہ محکمہ قانون پنجاب کو کہا گیا کہ لاہور کو چار اضلاع میں تقسیم کرنے کے حوالے سے قانونی مسائل کا جائزہ لیکر اپنی رپورٹ فراہم کریں۔ بیورو آف سٹیٹکس سے شہری آبادی کا ڈیٹا فراہم کرنے کا کہا گیا۔ ایک سینئر سرکاری اہلکار کے مطابق تمام محکموں کی رپورٹس کا جائزہ لینے کے لیے لاہور کمشنر کی سربراہی میں ایک اہم اجلاس گزشتہ دنوں ہوا جس میں یہ بات سامنے آئی کہ 1998ءکی مردم شماری کے مطابق لاہور کی آبادی 96 لاکھ تھی جو موجودہ مردم شماری میں ایک کروڑ 25 لاکھ سے تجاوز کر چکی ہے۔ محکمہ ایکسائز اینڈ ٹیکسیشن کی رپورٹ کے مطابق لاہور میں 8لاکھ 60 ہزار یونٹس پراپرٹی ٹیکس کی مد میں آتے ہیں۔ لوکل گورنمنٹ اینڈ کمیونٹی ڈویلپمنٹ کے نمائندے نے اجلاس میں بتایا کہ لاہور کے چار اضلاع میں تقسیم کرتے ہوئے موجودہ یونین کونسلز کی حد بندیوں کو نہ چھیڑا جائے کیونکہ انکو ختم کرنے سے قانونی مسائل کو سامنا ہوگا، انہوں نے مزیدکہا کہ آیا لاہور کے چار اضلاع ایک ہی میٹروپولیٹن کے ماتحت ہوں گے جیسا کہ کراچی میٹروپولیٹن کے پانچ اضلاع اس کے ماتحت کام کرتے ہیں۔ اجلاس کو مزید بتایا گیا کہ لاہور کو مزید 9زونز میں تقسیم کیا جا رہا ہے جبکہ اس وقت لاہور میں 274 یونین کونسل کام کر رہی ہیں۔ اجلاس میں محکمہ کوآپریٹو کے نمائندے نے بتایا کہ لاہور چار اضلاع میں تقسیم کرتے ہوئے اس کی اہم حد بندیوں جن میں مال روڈ، جیل روڈ اور کینال روڈ کو مدنظررکھا جائے کیونکہ ان کی سطح پر لاہور کی تقسیم بہتر طریقے سے کی جاسکتی ہے۔ محکمہ پولیس لاہور کے سینئر افسرنے اجلاس کو بتایا کہ لاہور پولیس پہلے ہی چھ ڈویژنوں میں تقسیم کی گئی جن میں سٹی، صدر، کینٹ ، سول لائن ، اقبال ٹاﺅن اور ماڈل ٹاﺅن شامل ہیں۔

کراچی (خصوصی رپورٹ) پی آئی اے انتظامیہ نے دنیا بھر میں موجود اپنے اربوں کے اثاثے ٹھکانے لگانے کی تیاری شروع کر دی ہے۔ غیرملکی بروکرز سے بکنگ دفاتر‘ ویئر ہاﺅسز‘ فلیٹوں اور اراضی کی مارکیٹ ویلیو جاننے کیلئے رابطے کر لئے گئے ہیں ‘جنہوں نے نئی ایوالوکیشن رپورٹس مرتب کرنے کے بعد ہیڈآفس ارسال کرنے کا سلسلہ شروع کر دیا ہے۔ قیمتوں کا تعین ہوتے ہی سمری تیار کر کے منظوری کیلئے بورڈ آف ڈائریکٹرز میں پیش کر دی جائے گی۔ قومی فضائی کمپنی کے اثاثوں کو فروخت کرنے کا ٹاسک نئے چیف ایگزیکٹو کو دیا جائے گا۔ تحقیقات پر معلوم ہوا ہے کہ پی آئی اے کی نجکاری نہ ہونے کی صورت میں دنیا بھر میں اس کے دفاتر‘ بنگلے‘ فلیٹس اور سینکڑوں ایکڑ اراضی جن کی مالیت اربوں روپے بتائی جاتی ہے‘ کو فروخت کرنے کی تیاری کی جا رہی ہے۔ پی آئی اے کے سب سے مہنگے اثاثوں میں امریکہ اور پیرس میں موجود ہوٹلز ہیں جن کی مالیت 350ارب روپے سے زائد بتاتی جا رہی ہے جن کی فروخت منصوبے کے آخر میں کی جائے گی۔ ذرائع نے بتایا کہ حکومت پی آئی اے کی نجکاری نہ کرنے کے ساتھ ساتھ سٹرٹیجک پارٹنر کی تلاش میں ہے جس کے ذمے ایئرلائن کے آپریشنل معاملات لگائے جائیں گے۔ اس ضمن میں اب تک کسی پارٹنر کا نام سامنے نہیں آیا تاہم حکومت نے پی آئی اے کے اثاثوں کی مالیت سے متعلق دستاویزات تیار کرنا شروع کر دی ہیں۔ پی آئی اے ذرائع نے بتایا کہ گزشتہ برس ایوی ایشن ڈویژن نے اثاثوں سے متعلق رپورٹ قائمہ کمیٹی برائے ایوی ایشن کو جمع کرا دی تھی‘ تاہم اس حوالے سے حکومت کو شکوک و شبہات ہیں کہ اس میں اراضی اور دیگر اثاثوں کی قیمتوں کے تعین میں بدنیتی کا مظاہرہ کیا گیا ہے اور اثاثوں کے ریٹ انتہائی کم ظاہر کئے گئے ہیں‘ جس کے بعد اب ایک بار پھر تمام اثاثوں کی قیمتوں کے تعین کیلئے غیرملکی بروکرز کو ٹاسک دیا گیا ہے۔ یہ غیرملکی بروکرز مارکیٹ ویلیو کا تعین کر کے اپنی رپورٹس پی آئی اے ہیڈآفس بھجوانا شروع کر چکے ہیں۔ معلومات کے مطابق پی آئی اے کے اثاثہ جات میں 31دسمبر کو راولپنڈی میں مال روڈ صدر میں پی آئی اے بکنگ آفس کی مالیت 3کروڑ 21لاکھ 42ہزار 500روپے ظاہر کی گئی ہے جبکہ پیرودھائی اسلام آباد میں پی آئی اے ڈی ایف ایس ایل ویئر ہاﺅس کی مالیت 3کروڑ 74لاکھ 40ہزار روپے بتائی گئی ہے۔ 28مارچ 1994ءکو گوادر میں ایئرپورٹ روڈ پر پی آئی اے سیلز آفس کی مالیت 52لاکھ 4ہزار ظاہر کی گئی۔ 30جون 1983ءمیں ملتان سیلزآفس کیلئے احمد شاہ ابدالی روڈ پر دفتر خریدا گیا جس کی مالیت ایک کروڑ 86لاکھ 84ہزار 550روپے ظاہر کی گئی۔ 28مئی 1995ءمیں مظفرآباد آزادکشمیر میں سیلز آفس کیلئے جگہ لی گئی جس کی موجودہ قیمت 36لاکھ 25ہزار 200روپے ظاہر کی گئی ہے۔ 1968ءمیں پشاور حیات آباد میں ایک سیلزآفس لیا گیا تھا جس کی مالیت 6کروڑ 8لاکھ 4ہزار روپے ظاہر کی گئی۔ سیدوشریف مینگورہ میں پی آئی اے سیلز آفس کی مالیت ایک کروڑ 18لاکھ 44ہزار ظاہر کی گئی ہے۔ 30جون 1988ءمیں سکردو سیلز آفس کیلئے چشمہ بازار میں جگہ لی گئی جس کی موجودہ مالیت 70لاکھ 30ہزار ظاہر کی گئی ہے۔ 30جون 1978ءکو تربت میں کشمیر روڈ پر سیلز آفس بنایا گیا جس کی مالیت 31لاکھ 83ہزار 350روپے ظاہر کی گئی ہے۔۔ 1976ءمیں اسلام آباد بلیو ایریا میں سیلزآفس خریدا گیا جس کی موجودہ مالیت 5کروڑ 79لاکھ روپے ظاہر کی گئی ہے۔ پنجاب اسمبلی کے بالمقابل واپڈا لاہور میں 1978ءمیں سیلزآفس لیا گیا جس کی موجودہ مالیت 14کروڑ 40لاکھ 47ہزار 875روپے ظاہر کی گئی ہے۔ 1974ءمیں کارساز کراچی میں پی آئی اے ڈائیگنوسٹک سنٹر کیلئے اراضی لی گئی‘ اس کی موجودہ مالیت 3کروڑ 17لاکھ 20ہزار روپے ظاہر کی گئی ہے۔ اسی روز کراچی میں سیلز آفس کیلئے سڈکو سنٹر صدر میں دفاتر حاصل کئے گئے جن کی موجودہ مالیت 3کروڑ 17لاکھ 30ہزار روپے بتائی گئی ہے۔ اسی روز کے ڈی اے سکیم ون کارساز میں پی آئی اے ایئرکریو میڈیکل سنٹر کیلئے اراضی حاصل کی گئی جس کی موجودہ مالیت ایک کروڑ 17لاکھ 7ہزار 632روپے ظاہر کی گئی ہے۔ 1980ءمیں فیصل آباد میں پی آئی اے سیلزآفس کیلئے سول لائنز میں اراضی لی گئی جس کی موجودہ مالیت ایک کروڑ 3لاکھ 72ہزار 280روپے بتائی گئی ہے۔ جون 1992ءمیں پولو گراﺅنڈ چترال میں پی آئی اے سیلزآفس لیا گیا جس کی موجودہ مالیت 29لاکھ 70ہزار ظاہر کی گئی ہے۔ 1981ءمیں کوئٹہ شیراحامی میں سیلز آفس کیلئے اراضی حاصل کی گئی جس کی موجودہ مالیت 5کروڑ 28لاکھ ظاہر کی گئی۔ 1993ءمیں سوک سینٹر ٹھنڈی سڑک حیدرآباد میں سیلزآفس بنایا گیا جس کی مالیت 8 کروڑ 58 لاکھ 50 ہزار 500 روپے ظاہر کی جارہی ہے۔ بھارت کے شہر ممبئی میں بھی 1978ءمیں اراضی حاصل کی گئی جس کی موجودہ مالیت 8 کروڑ 32 لاکھ 80 ہزار روپے بتائی جاتی ہے۔ ایمسٹرڈیم میں 1978ءمیں اراضی حاصل کی گئی جس کی موجودہ مالیت 4 کروڑ 78 لاکھ 83 ہزار 459 روپے ظاہر کی گئی ہے۔ ایمسٹرڈیم میں پی آئی اے کی دوسری ملکیت کی موجودہ مالیت ایک کروڑ 25 لاکھ 54 299 ظاہر کی گئی ہے۔ 1980ءمیں نیویارک میں بنگلہ خریدا گیا جس کی موجودہ مالیت 5 کروڑ 93 لاکھ 14 ہزار 626 روپے ظاہر کی گئی ہے۔ بھارت کے شہر دہلی میں نارائن منزل کی دو بلڈنگ خریدی گئیں جس کی موجودہ مالیت 20 کروڑ 41 لاکھ 73 ہزار 723 روپے ظاہر کی گئی ہے۔ ایمسٹرڈیم میں ایک اور ملکیت کی موجودہ قیمت 18 کروڑ 96 لاکھ 52 ہزار 424 روپے ظاہر کی گئی ہے۔ تاشقند میں پی آئی ے سیلز آفیس کی مالیت 82 لاکھ 95 ہزار 611 روپے ظاہر کی گئی ہے۔ امریکہ کے شہر نیویارک میں پی آئی اے کی ریذیڈنس نمبر 55 کی مالیت 4 کروڑ 15 لاکھ 20 ہزار 238 روپے ظاہر کی گئی ہے۔ ایمسٹرڈیم میں ایک اور ملکیتی اراضی 15 کروڑ 4 لاکھ 42 ہزار 913 روپے بتائی گئی ہے۔ آئزویرن ایواکوڈ میں ملکیت کی مالیت 46 لاکھ 34 ہزار 635 روپے ظاہر کی گئی ہے اور مارا میں حاصل کی گئی سیلز آفس کی اراضی کی مالیت 6 لاکھ پچاس ہزار ظاہر کی گئی ہے۔ ہیڈکوارٹر کیلئے اسلام آباد د میں خریدی گئی اراضی کی مالیت ایک کروڑ اڑتالیس لاکھ 22 ہزار 585 روپے ظاہر کی گئی ہے۔ سیدوشریف میں ہاﺅسنگ سوسائٹی کیلئے اراضی کی مالیت 40 لاکھ روپے ظاہر کی گئی ہے۔ سیدوشریف میں ہی سیلز آفس کیلئے دو کنال اراضی کی مالیت دو کروڑ بیس لاکھ ظاہر کی گئی ہے۔ اسکردو میں ٹی جی ایس سیکشن کیلئے اراضی کی مالیت 78 ہزار 200 ظاہر کی گئی ہے۔ یہیں پر سیلز آفس کیلئے دو کال اراضی کی مالیت دو کروڑ تیس لاکھ 62 ہزار 500 روپے بتائی گئی ہے جبکہ ایئرپورٹ آفس کیلئے چار کنال اراضی کی مالیت 63 لاکھ ظاہر کی گئی ہے۔ گلگت میںسیلز آفس کیلئے ایک کنال 13 مرلہ اراضی کی مالیت 75 لاکھ 2 ہزار 250 روپے بتائی گئی ہے۔ ایبٹ آباد میں اراضی کی ملکیت دو کروڑ 31 لاکھ روپے ظاہر کی گئی ہے۔ چترال میں سیلز آفس کیلئے اراضی کی قیمت پانچ کروڑ 49 لاکھ 90 ہزار ظاہر کی گئی ہے۔ پشاور میں دو ایکڑ سے زائد اراضی کی مالیت دو ارب 73 کروڑ 91 لاکھ 96 ہزار چھ سو دس روپے ظاہر کی گئی ہے۔ مظفرآباد میں آفس بلڈنگ کیلئے اراضی کی مالیت ایک کروڑ 77 لاکھ 78 ہزار روپے بتائی گئی ہے۔ اسی طرح راولپنڈی میں ڈیوٹی فری شاپ ویئر ہاﺅس کیلئے خریدی گئی اراضی کی مالیت 24 کروڑ 62 لاکھ 24 ہزار روپے ظاہر کی گئی ہے۔ ڈھوک کھنہ راولپنڈی میں 09.37 کنال اراضی کی مالیت 84 کروڑ ظاہر کی گئی ہے۔ 5th مال راولپنڈی میں بنگلے کی مالیت 60 کروڑ 18 لاکھ 8 ہزار 400 روپے ظاہر کی گئی ہے۔ سیالکوٹ میں سیلز آفس کیلئے زمین کی مالیت 9 کروڑ 60 لاکھ 12 ہزار ظاہر کی گئی ہے۔ لاہور میں ایک ایکڑ اراضی کی مالیت پچاس کروڑ 60 لاکھ بتائی گئی ہے۔ سول لائنز راولپنڈی میں سیلز آفس کی مالیت 19 کروڑ 57 لاکھ پچاس ہزار بتائی گئی ہے۔ ذرائع کا دعویٰ ہے کہ تمام مذکورہ ریٹ گزشتہ برس کی رپورٹ کے ہیں اور مذکورہ ایوالویشن میں اثاثوں کی قیمتیں انتہائی کم ظاہر کی گئی ہیں تاکہ ان کی فروخت کو آسانی سے ممکن بنایا جاسکے۔ ذرائع کے مطابق پی آئی اے کے موجودہ اباثے کھوبوں میں جاپہنچے ہیں او ر ان کی قیمتیں کم ظاہر کرکے پی آئی اے بورڈ سے منظوری حاصل کرنے کی تیاری کرلی گئی ہے۔ پی آئی اے میں نئے چیف ایگزیکٹو کے چناﺅ میں اس بات کا خیال بھی رکھا جارہا ہے کہ اس کی تقرری کے بعد یہ تمام مراحل گزار لئے جائیں۔ جن کی منصوبہ بندی کی جاچکی ہے۔ شعبہ فنانس کے ذرئع نے بتایا کہ نئی ایوالویشن رپورٹس کی آمد کا سلسلہ بھی جاری ہے۔ جو غیرملکی بروکرز کنٹری منیجر کے ذریعے ہیڈ آفس پہنچا جارے ہیں۔ واضح رہے کہ کراچی کے معروف ترین علاقے صدر میں واقع سڈکو سنٹر میں قائم پی آئی اے کے دفتر کی وہاں سے منتقلی کے بعد فروخت کی خبریں گردش کررہی ہیں جبکہ ایڈمن اور فنانس کے دفاتر فوری طور پر ہیڈآفس منتقل کئے جاچکے ہیں۔ معلوم ہوا ہے کہ سڈکو سنٹر میں واقع پی آئی اے کی دو منزلہ عمارت ہے جو پی آئی اے کی ملکیت ہے۔ اس کی مالیت اربوں روپے بتائی جاتی ہے۔ اس عمارت کی ایک منزل پی آئی اے کی ریزرویشن جبکہ دوسری منزل پر مالیاتی امور کے دفاتر ہیں۔ پی آئی اے انتظامیہ نے خاموشی سے اس عمارت کو فروخت کرکے اس کے دفاتر منتقل کرنے کا فیصلہ کرلیا ہے۔ معلوم ہوا ہے کہ پی آئی اے انتظامیہ مالیاتی امور امو ر کے دفتر کو ہیڈ آفس ایئرپورٹ پر واقع سی آر سی کی عمارت میں منتقل کررہی ہے جبکہ پی آئی اے ریزرویشن آفس ایک فائیو سٹار ہوٹل میں بھاری کرائے پر حاصل کرکے وہاں منتقل کیا جائے گا۔ ذرائع نے بتایا کہ پی آئی اے انتظامیہ اس عمارت کی مرمت کیلئے سڈکو سینئر انتظامیہ کو سالانہ صرف تین لاکھ روپے ادا کرتی ہے۔ اگر یہ دفتر کسی فائیو سٹار کسی فائیو سٹار ہوٹل میں منقل کیا گیا تو لاکھوں روپے ماہانہ کرائے اور دیگر اخراجات کی مد میں ادا کرنے پڑیں گے جو پی آئی اے پر مزید بوجھ ہوگا۔