لند ن میں ن لیگ کا تہلکہ خیز فیصلہ، پارٹی لیڈر کیلئے بڑے نام کی منظوری

لاہور (خصوصی رپورٹ) باخبر ذرائع کے مطابق شریف فیملی میں سیاست اور کاروباری معاملات کو الگ الگ اور نوجوان نسل میں تقسیم کرنے پر اتفاق رائے ہوگیا ہے‘ جس کے تحت شریف فیملی کے اندرون اور بیرون ملک تمام تر کاروباری معاملات وزیراعلیٰ پنجاب میاں شہبازشریف کے دونوں صاحبزادے حمزہ شہباز اور سلمان شہباز دیکھیں گے جبکہ میاں نوازشریف کے دونوں فرزند حسین نواز اور حسن نواز ان کی معاونت کریں گے۔ دوسری طرف مریم نواز اپنے والد میاں نوازشریف کی سیاسی جانشین ہوں گی اور مستقبل قریب میں انہیں پارٹی کی قیادت بھی سونپی جاسکتی ہے۔ ذرائع کے مطابق شریف فیملی کی نوجوان نسل میں یہ معاہدہ میاں نوازشریف اور میاں شہبازشریف کی موجودگی میں لاہور میں طے پایا اور اس پر فوراً عملدرآمد بھی شروع کردیا گیا ہے جبکہ باقی کچھ معاملات مریم نواز کے علاوہ شریف خاندان کے تمام ارکان کی لندن میں موجودگی کے دوران طے کئے جائیں گے۔ ذرائع کے مطابق اسی معاہدے کے مطابق ہی حمزہ شہبازشریف کی جگہ مریم نواز کو حلقہ این اے 120 کی انتخابی مہم کا انچارج بنایا گیا ہے اور حمزہ شہبازشریف لندن چلے گئے ہیں۔ یہ بھی پتہ چلا ہے کہ حمزہ شہبازبطور رکن قومی اسمبلی اپنی مدت پوری کریں گے جبکہ عین ممکن ہے کہ آئندہ الیکشن میں وہ قومی اسمبلی کے امیدوار تو ہوں گے لیکن سیاست میں زیادہ فعال نہیں ہوں گے۔