بلاوائیو(نیوزایجنسیاں)پاکستان نے نوجوان بلے باز امام الحق کی شاندار سنچری اور شاداب خان کی بہترین باولنگ کی بدولت ایک روزہ سیریز کے پہلے میچ میں زمبابوے کو باآسانی 201 رنز سے شکست دے کر 5ون ڈے میچوں کی سیریز میں 1-0 کی برتری حاصل کرلی۔308رنزکے تعاقب میں زمبابوین ٹیم 35 اوورز میں 107 رنز بنا کر آوٹ ہوئی۔زمبابوے کے شہر بلاوایو کے کوئنز اسپورٹس کلب میں کھیلے گئے سیریز کے پہلے میچ میں میزبان ٹیم نے ٹاس جیت کر ابرآلود موسم کا فائدہ اٹھانے کے لیے پہلے بالنگ کا فیصلہ کیا۔تاہم زمبابوے کا فیصلہ بالکل غلط ثابت ہوا اور پاکستانی اوپنرز امام الحق اور فخر زمان نے ٹیم کو 113 رنز کا عمدہ آغاز فراہم کیا، فخر 7 چوکوں کی مدد سے 60رنز کی اننگز کھیلنے کے بعد پویلین لوٹے۔دوسرے اینڈ سے امام نے عمدہ بیٹنگ کا سلسلہ جاری رکھا اور نئے بلے باز بابر اعظم کے ساتھ مل کر اسکور کو 172 تک پہنچا دیا، بابر کی اننگز 30رنز پر تمام ہوئی۔تجربہ کار شعیب ملک نے بھی امام کا ساتھ دیا اور دونوں کھلاڑیوں نے تیسری وکٹ کے لیے 63 کی شراکت قائم کر کے پاکستان کو مضبوط پوزیشن میں پہنچا دیا۔اس دوران امام نے شاندار بیٹنگ کا سلسلہ برقرار رکھتے ہوئے ون ڈے کرکٹ میں اپنی دوسری سنچری مکمل کی جبکہ شعیب نے آٹ ہونے سے قبل 22 رنز بنائے۔268 کے اسکور پر پاکستان کو چوتھا نقصان پہنچا جب امام 11 چوکوں سے مزین 128 رنز کی اننگز کھیلنے کے بعد پویلین لوٹ گئے۔اختتامی اوورز میں آصف علی نے جارحانہ بیٹنگ کا مظاہرہ کیا اور صرف 25 گیندوں پر 2 چھکوں اور 4 چوکوں کی مدد سے 46 رنز بنا کر ٹیم کو 300 کا ہندسہ پار کرنے میں مدد دی۔پاکستان نے مقررہ اوورز میں7 وکٹوں کے نقصان پر 308رنز بنائے۔زمبابوے کی جانب سے ڈونلڈ تری پانو اور ٹنڈائی چتارا نے 2، 2 وکٹیں حاصل کیں۔ایک مشکل ہدف کے تعاقب میں زمبابوے کی ٹیم مسلسل مشکلات کا شکار رہی اور پہلا نقصان اس وقت اٹھانا پڑا جب 3 رنز بنے تھے جس کے بعد دوسرا نقصان مساکاڈزا کی صورت میں 11 رنز پر پڑا تاہم چیبابا نے کچھ مزاحمت کی تاہم 53 رنز بنا پر وہ بھی آوٹ ہوگئے، انھوں نے 20 رنز بنائے۔زمبابوے کی جانب سے سب سے زیادہ رنز ریان مورے نے بنائے جنھوں نے آوٹ ہوئے بغیر 32 رنز کی اننگز کھیلی جبکہ مساکانڈا 21 رنز بنا کر آوٹ ہوئے ۔جس کے بعد میزبان ٹیم کے بلے باز مسلسل آوٹ ہوتے رہے اور پوری ٹیم 35 اوورز میں 107 رنز بنا کر آوٹ ہوئی۔
