پاک سری لنکا آخری ٹی ٹوئنٹی میچ ’پنک ڈے‘ سے منسوب

لاہور: (ویب ڈیسک)پاکستان اور سری لنکا کے درمیان آخری ٹی ٹوئنٹی میچ کو ’پنک ڈے‘ سے منسوب کر دیا گیا۔صدر مملکت عارف علوی اور چیئرمین پاکستان کرکٹ بورڈ (پی سی بی) احسان مانی میچ سے پہلے پنگ ڈے کی تقریب میں شرکت کریں گے۔آسٹریلیا اور جنوبی افریقا میں ’پنک ڈے‘ کرکٹ میچ میں منایا جاتا ہے اب یہ روایت پاکستان میں بھی قائم ہو رہی ہے۔تاریخی قذافی اسٹیڈیم میں بدھ کو پاکستان اور سری لنکا کا تیسرا ٹی ٹوئنٹی میچ گلابی رنگ سے رنگا ہو گا۔پاکستان کرکٹ بورڈ نےاس میچ کو چھاتی کے سرطان سے آگاہی کیلئے منسوب کرنے کا فیصلہ کیا ہے۔میچ سے پہلے اس حوالے سے تقریب کا اہتمام کیا جائے گا جس میں صدر مملکت عارف علوی بھی شرکت کریں گے۔اس موقع پر صدر پاکستان دونوں ٹیموں کے کپتانوں کو پنک ربن پہنائیں گے۔ میچ میں شریک تمام کھلاڑی اور آفیشلز پنک ربن پہنیں گے جبکہ اسٹیڈیم میں موجود 12 ہزار شائقین میں پنک ربن تقسیم کیے جائیں گے۔قذافی اسٹیڈیم میں موجود 750 کرکٹ کے متوالوں میں پنک شرٹس بھی تقسیم کی جائیں گی۔