شہبازشریف کے کہنے پر آئی جی پنجاب نے اسمبلی میں پولیس بھیجی، پرویز الہیٰ

لاہور: (ویب ڈیسک) اسپیکر صوبائی اسمبلی پنجاب چوہدری پرویز الہیٰ نے کہا ہے کہ وزیر اعظم شہباز شریف کے کہنے پر آئی جی پولیس نے اسمبلی میں پولیس کی بڑی تعداد بھیجی، ہم اجلاس میں فیصلہ کریں گے کہ کیا قانونی اور آئینی اپشن اختیار کیا جاتا ہے۔
پارٹی رہنما راجہ بشارت کے ہمراہ پریس کانفرنس کے دوران انہوں نے کہا کہ جتنی عزت اراکین کو دی شریفوں نے 5 منٹ میں سب عزت زمین بوس کردی، کیا پولیس نے ایوان چلانا ہے تو آجائے ادھر بیٹھ جائے۔
چوہدری پرویز الہی نے کہا کہ محمد خان بھٹی کو تین ایم پی او کے تحت گرفتار کرنے کی کوشش تھی، شریف خاندان ہر بار بد سے بدتر ہو کر آئے ہیں، شریفوں کا اصل چہرہ عوام کو دکھا دیا ہے، استحقاق قوانین کی ن لیگ توہین کررہی ہے اورآج بھی پولیس کے ڈیڑھ سو اہلکار دروازوں پر کیوں بیٹھے ہیں۔
انہوں نے کہا کہ پوری اسمبلی کا استحقاق مجروح ہوا ہے، جب تک نیا وزیر اعلیٰ حلف نہیں لیتا اس وقت تک پرانا وزیر اعلیٰ بحال ہے، یہ الیکشن ہوا ہی نہیں حمزہ شہباز کے خلاف ووٹ ڈالنے کی جگہ پولیس تعینات تھی، ڈپٹی اسپیکر نے وزیٹر گیلری میں کھڑے ہو کر الیکشن کروایا ہے۔
علاوہ ازیں راجہ بشارت نے کہا کہ ہمارے 26 اراکین اگر مائنس کردیے جائیں تو ان کے پاس اکثریت نہیں، ابھی اختیار نہیں ملا لیکن غیر قانونی طور پر منتخب وزیر اعلی اختیار مانگتا ہے، ساڑھے تین سال میں ایوان کے وقار میں اضافہ کیا۔