راولپنڈی کی انسداد دہشت گردی کی عدالت نے سانحہ 9 مئی کے 12 مقدمات میں پاکستان تحریک انصاف کے سابق چیئرمین عمران خان کا 2 روزہ جسمانی ریمانڈ منظور کرلیا۔
انسداد دہشت گردی کی خصوصی عدالت کے جج ملک اعجاز نے سابق وزیراعظم عمران خان کے خلاف سانحہ 9 مئی سے متعلق درج 12 مقدمات کی اڈیالہ جیل میں سماعت کی۔
عدالت نے 9 مئی مقدمات میں سابق چئیرمین پی ٹی آئی کے جسمانی ریمانڈ پر محفوظ فیصلہ سناتے ہوئے عمران خان کا 2 روزہ جسمانی ریمانڈ منظور کرلیا۔
جسمانی ریمانڈ پر فیصلہ انسداد دہشت گردی عدالت کے جج اعجاز آصف نے سنایا۔
پولیس نے بانی چیئرمین پی ٹی آئی کے خلاف 9 مئی کے 12 مقدمات میں 30 روزہ جسمانی ریمانڈ کی استدعا کی تھی، اس موقع پر وکلاء صفائی کی جانب سے بانی چیئرمین پی ٹی آئی کے جسمانی ریمانڈ کی مخالفت کی گئی تھی جبکہ عدالت نے فریقین کے دلائل مکمل ہونے پر فیصلہ محفوظ کیا تھا۔
عدالت کی جانب سے کہا گیا کہ تمام تھانوں کی تفتیشی ٹیمیں ایک ساتھ ہی اڈیالہ جیل میں عمران خان سے تفتیش کرسکیں گی، سابق چییرمین پی ٹی آئی کو جیل سے باہر نہیں لے جایا جاسکے گا۔
انسداد دہشت گردی عدالت نے 11 جنوری کو مکمل تفتیشی رپورٹ پیش کرنے کا حکم دیتے ہوئے سماعت ملتوی کردی جبکہ مقدمے کی اگلی سماعت 11 جنوری کو صبح 10 بجے اڈیالہ جیل میں ہی ہوگی۔
