محسن نقوی ٹیم میں بڑی سرجری کے بیان سے پیچھے ہٹنے لگے

پاکستان کرکٹ بورڈ (پی سی بی) کے چیئرمین محسن نقوی نے بھارت سے شکست کے بعد قومی کرکٹ ٹیم میں بڑی سرجری کے اپنے سخت مؤقف سے پیچھے ہٹتے ہوئے قوم سے کہا ہے کہ ٹی 20 ورلڈ کپ 2024 کے دوران کرکٹ ٹیم کو سپورٹ کریں۔
واضح رہے کہ بھارت کے مقابلے میں پاکستان کی انتہائی مایوس کن شکست کے بعد محسن نقوی نے ٹیم میں بڑے پیمانے پر رد وبدل کا اشارہ دیتے ہوئے کہا تھا کہ ’بڑی سرجری ہوگی‘۔
اب محسن نقوی نے ایک نجی چینل کو انٹرویو میں اپنے مؤقف میں نرمی دکھائی ہے، انہوں نے کہا کہ ”مشاورت جاری ہے اور اس موڑ پر معاملے پر مزید بات کرنا مناسب نہیں ہے۔“
اس سوال کا جواب دیتے ہوئے پی سی بی کے سربراہ نے قوم کو مشورہ دیا کہ وہ ”ٹورنامنٹ کے حتمی نتیجے کا انتظار کریں“ کیونکہ لیگ مرحلے میں ابھی میچ کھیلنا باقی ہیں۔
محسن نقوی نے اس بات کا اعادہ کیا کہ ٹیم کو فی الحال سپورٹ کی ضرورت ہے، اس بات پر اصرار کرتے ہوئے کہ موجودہ ٹیم کے ساتھ ٹورنامنٹ میں ”ہمیں آگے بڑھنا ہے“۔
اس ہفتے کے شروع میں محسن نقوی نے ہندوستان کے خلاف پاکستانی ٹیم کی شکست کے بعد مایوسی کا اظہار کیا تھا۔
انہوں نے برقرار رکھا کہ ٹیم کی خراب کارکردگی کا اشارہ ہے کہ اسے ”بڑی سرجری“ کی ضرورت ہے۔
محسن نقوی نے کہا کہ ”ایسا لگتا تھا کہ ایک چھوٹی سی سرجری کام کرے گی لیکن اس خراب کارکردگی کے بعد، مجھے اب یقین ہے کہ ایک بڑی سرجری کی ضرورت ہے۔ قوم جلد ہی ایک بڑی تبدیلی دیکھے گی،“ نقوی نے کہا۔
چیئرمین پی سی بی محسن نقوی نے مزید کہا کہ ’’ہندوستان کے خلاف شکست ہر لحاظ سے مایوس کن تھی‘‘۔
چیئرمین پی سی بی نے کہا کہ وہ جانتے ہیں کہ ٹیم میں کیا ہو رہا ہے اور ہارنے کی وجوہات کیا ہیں۔