لاہور(نیوزایجنسیاں) دورہ انگلینڈ اور آئرلینڈ کیلئے قومی کرکٹ ٹیم کے فٹنس ٹیسٹ لاہور میں شروع ہو گئے۔فاسٹ باولر عثمان شنواری یویو ٹیسٹ مکمل نہ کر سکے۔ اسلام یونائیٹڈ سے تعلق رکھنے والے کرکٹرز آج ٹیسٹ دیں گے، لیگ اسپنر یاسر شاہ انجری کی وجہ سے سیریز سے آو¿ٹ ہو گئے۔آئر لینڈ اور انگلینڈ کے خلاف ٹیسٹ سیریز سے پہلے بیشتر کرکٹرز نے فٹنس ٹیسٹ کا مشکل مرحلہ پار کر لیا۔ دو کلومیٹر دوڑ میں فاسٹ باولر حسن علی، محمد رضوان، بابر اعظم ، فواد عالم اور فخر زمان تیز دوڑے جب کہ تمام کرکٹرز نے مقررہ فاصلہ نو منٹ میں طے کیا۔ یویو ٹیسٹ میں عثمان شنواری کے علاوہ تمام کرکٹر کامیاب ٹھہرے، فاسٹ باولر آج دوبارہ ٹیسٹ دیں گے۔ یویو ٹیسٹ میں محمد رضوان سب سے زیادہ فٹ قرار پائے۔آج بھی کرکٹرز نیشنل کرکٹ اکیڈمی میں گزاریں گے جنہیں جم اور فیلڈنگ ٹیسٹ کے مرحلے پار کرنے ہوں گے۔ اسلام آباد یونائٹڈ سے تعلق رکھنے والے کھلاڑی دوسرے روز میدان میں اتریں گے۔ فاسٹ باولر محمد عباس اور شان مسعود کیمپ میں دکھائی نہیں دیئے۔ تجربہ کار لیگ اسپنر یاسر شاہ گروئن انجری کے باعث سیریز سے باہر ہو گئے ، ان کی جگہ شاداب خان، بلال آصف اور کاشف بھٹی کو کیمپ میں بلا لیا گیا ہے۔ دوسری جانب آل راونڈر محمد حفیظ باولنگ ایکشن ٹیسٹ ممکنہ طور پر سترہ اپریل کو انگلینڈ میں دیں گے اس حوالے سے حتمی فیصلہ ایک دو روز میں ہوجائے گا۔چیف سلیکٹر انضمام الحق نے آئرلینڈ اور انگلینڈ کے دوروں کے دوران لیگ اسپنر کی عدم دستیابی کی تصدیق کر دی ہے۔انضمام الحق نے میڈیا سے گفتگو کرتے ہوئے بتایا کہ یاسر شاہ آئرلینڈ اور انگلینڈ کے دوروں سے باہر ہو گئے ہیں جو ہماری ٹیم کے لیے بڑا دھچکا ہے۔
