نام نہاد شہباز سپیڈ نے 5ماہ میں ہرچیز تباہ کردی: میاں اسلم اقبال

لاہور: (ویب ڈیسک) پنجاب کے سینئر صوبائی وزیر میاں اسلم اقبال نے کہا ہے کہ نام نہاد شہباز سپیڈ نے 5 ماہ میں ہرچیز تباہ کردی، کرپشن میں شہرت پانے والی شہباز سپیڈ عوام کو ریلیف کی فراہمی میں ناکام ہے۔
سینئر صوبائی وزیر میاں اسلم سے صوبائی وزراء، اراکین اسمبلی اور دیگر سیاسی شخصیات نے ملاقاتیں کیں، ملاقاتوں کے دوران جاری ترقیاتی کاموں، ترقیاتی مسائل اور سیاسی صورتحال پر تبادلہ خیال کیا گیا۔
ملاقات کرنے والوں میں وزیر داخلہ کرنل ریٹائرڈ ہاشم ڈوگر، اراکین اسمبلی عمرآفتاب ڈھلوں، سمیع اللہ چوہدری، سابق ایم این اے منزہ حسن، بجاش خان نیازی، شکیل بلوچ اور دیگر شامل تھے۔
اس موقع پر میاں اسلم اقبال نے کہا کہ کرپشن کے پیسے سے لندن میں خریدے گئے محلات کا مکین پھر لوٹ مار کی پلاننگ کررہا ہے، عوام جاگ رہے ہیں اب اس کے فریب میں نہیں آئیں گے۔
انہوں نے کہا ہے کہ باپ بیٹی لندن میں بیٹھ کر پنجاب کے عوام کے خلاف سازشیں کر رہے ہیں، عمران خان کی جدوجہد سے قومی دولت کے لٹیرے بے نقاب ہوئے۔
میاں اسلم اقبال نے کہا کہ کرپشن زدہ چہروں سے پردہ اٹھانے پر کرپٹ ٹولا عمران دشمنی پر اتر آیا، حقیقی آزادی اور ملک کی بقا کی جنگ آخری مرحلے میں داخل ہوگئی ہے،عوام کے حقوق مجروح کرنے والے ٹولے کو اب جانا ہوگا۔