مالدیپ پہنچنے پر وزیراعظم کا شاندار استقبال ، سارک کا فعال ہونا ضروری

مالے (نیوز ایجنسیاں)وزیراعظم نواز شریف نے کہا ہے کہ پاکستان اور مالدیپ نے مشترکہ چیلنجز سے نمٹنے کےلئے مل کر کام کرنے، سول سروس، تعلیم، سیاحت اور تجارت میں تعاون بڑھانے پر اتفاق کیاہے،سیاحت اور عوامی روابط کے شعبوں میں تعاون کو فروغ دیں گے،خطے کی ترقی و خوشحالی کےلئے سارک کو فعال بنانا ضروری ہے بھارت نے سارک کے منشور اور اہداف کے منافی کام کیا تاہم مالدیپ اسلام آباد میں سارک اجلاس کے انعقاد کا حامی ہے، مالدیپ کے مستقبل کےلئے امن ، ترقی اور خوشحالی کی تمنائیں ہیں جبکہ مالدیپ کے صدر عبداللہ یامین عبدالقیوم نے کہا کہ پاکستان دیرینہ ،پائیدار اور قابل اعتبار دوست ملک ہے،مالدیپ نیشنل ڈیفنس فورس کی استعداد بڑھانے کےلئے تعاون پر مشکور ہیں، ماحولیاتی تبدیلیوں سے نمٹنے کےلئے تعاون کا عزم رکھتے ہیں ،تجارت بڑھانے کےلئے مشترکہ ورکنگ گروپ کو فعال بنایا جائے گا ۔ وہ منگل کو یہاں مالدیپ کے شہر مالے میں باہمی ملاقات ، استقبالیے اور دونوں ممالک کے درمیان مختلف شعبوں میں تعاون کے فروغ کے لئے مفاہمتی یادداشتوں پر دستخطوں کی تقریب کے بعد مشترکہ پریس کانفرنس سے خطاب کررہے تھے ۔قبل ازیں پاکستان اور مالدیپ کے درمیان مختلف شعبوں میں تعاون کی یادداشت پر دستخط ہوئے جن کے تحت دونوں ملک تجارت، تعلیم اور سیاحت جبکہ دفتر خارجہ اور سول سروسز کے شعبے میں تعاو ن بڑھایا جائیگا ۔ تقریب میں وزیراعظم نواز شریف اور مالدیپ کے صدر عبداللہ یامین عبدالقیوم بھی موجود تھے ۔بعدازاں مشترکہ پریس کانفرنس میں صدر مالدیپ نے کہا کہ مختلف شعبوں میں تعاون پر بات چیت ہوئی، سول سروس، تعلیم، سیاحت اور تجارت میں تعاون بڑھانے پر اتفاق ہوا، تجارت بڑھانے کےلئے مشترکہ ورکنگ گروپ کو فعال بنایا جائے گا،سیاحت اور عوامی روابط کے شعبوں میں تعاون کو فروغ دیں گے۔عبداللہ یامین عبدالقیوم نے کہا کہ نوجوانوں کی صلاحیتوں سے استفادے پر توجہ دیں گے، مالدیپ نیشنل ڈیفنس فورس کی استعداد بڑھانے کےلئے تعاون پر مشکور ہیں، پاکستان دیرینہ ،پائیدار اور قابل اعتبار دوست ملک ہے۔ انہوں نے کہا کہ ماحولیاتی تبدیلیوں سے نمٹنے کےلئے تعاون کا عزم رکھتے ہیں، خطے کو درپیش مسائل کے حل پر بھی بات چیت ہوئی۔ وزیراعظم نواز شریف نے کہا کہ مالدیپ کی یوم آزادی کی تقریبات میں شرکت باعث مسرت ہے، بطور مہمان خصوصی خوشی کے اس لمحے میں مدعوکیا جانا باعث فخر ہے۔ مالدیپ کے مستقبل کےلئے امن ، ترقی اور خوشحالی کی تمنائیں ہیں۔ انہوں نے کہا کہ باہمی مفاد کے تمام شعبوں میں تعاون بڑھانا چاہتے ہیں، مشترکہ چیلنجز سے نمٹنے کےلئے مل کر کام کرنے پر اتفاق کیا، خطے کی ترقی و خوشحالی کےلئے سارک کو فعال بنانا ضروری ہے۔ وزیراعظم نے کہا کہ بھارت نے سارک کے منشور اور اہداف کے منافی کام کیا جبکہ مالدیپ کے صدر اسلام آباد میں سارک اجلاس کے انعقاد کے حامی ہیں۔انہوں نے کہا کہ پاکستان امن و استحکام کےلئے مالدیپ کے وژن کو سراہتا ہے، دونوں ملکوں کے مشترکہ بزنس گروپ تشکیل دیئے گئے ہیں اور دونوں ملکوں کے ورکنگ گروپس کی 4ذیلی کمیٹیاں بھی کام کر رہی ہیں، کھیل، صحت، تعلیم اور انسداد منشیات میں تعاون جاری ہے۔ وزیراعظم نے کہا کہ پاکستان مالدیپ میں میڈیکل کالج کے قیام کےلئے تعاون کرے گا، پاکستان کے عوام مالدیپ کے عوام کےلئے نیک تمنائیں رکھتے ہیں۔ جبکہ حکومت اور پاکستانی عوام کیلئے اعزاز، مالدیپ کے قومی دن پر وزیراعظم نواز شریف مہمان خصوصی، نواز شریف کی آمد پر ایوان صدر میںپروقار استقبالیہ تقریب، گارڈ آف آنر پیش کیا گیا، فنکاروں کا روایتی رقص، سات توپوں کی سلامی بھی دی گئی، وزیراعظم نواز شریف مالدیپ کے یوم آزادی کی تقریبات میں شرکت کیلئے مالے پہنچے، ایوان صدر میں ان کا پرتپاک استقبال کیا گیا۔ مالدیپ کے صدر نے اپنی کابینہ اور دیگر حکام سے معزز مہمان کا تعارف کرایا وزیراعظم پاکستان نے بھی اپنے وفد کے ارکان کو مالدیپ کے صدر سے ملوایا، خاتون اول بیگم کلثوم نواز، مشیر خارجہ سینیٹر سرتاج عزیز اور سینیٹر پرویز رشید بھی وزیراعظم کے ہمراہ ہیں۔ میاں محمد نواز شریف نے کہا ہے کہ بھارت مقبوضہ کشمیر میں ریاستی دہشتگردی میں ملوث ہے، خطے کی ترقی کیلئے سارک کو فعال بنانا لازمی ہے، نئی دہلی نے سارک کے منشور کے منافی کام کیا اور سارک فورم کے مقصد کو نقصان پہنچایا ہے۔