”اپنی ماں اور بہن کو چیمبر میں بلاﺅ “ سندھ اسمبلی میں اخلاقیات کا جنازہ

کراچی (اے این این) سندھ اسمبلی کے اجلاس کے دوران پیپلز پارٹی کے رکن امداد پتافی اور پاکستان مسلم لیگ فنکشنل کی رکن نصرت سحر کے درمیان خوب تکرار ہوئی،اجلاس میں سوال جواب سیشن کے دوران امدا پتافی نے نصر ت سحر کو ڈرامہ کوئین اور رسی جل گئی بل نہیں گیا جیسے جملے بھی بولے۔ جمعرات کوصوبائی اسمبلی کے اجلاس میں نصرت سحر نے میر پور خاص روڈ سے متعلق سوال کیا تو وزیر ورکس امداد پتافی نے جواب دیا کہ موسم ہے عاشقانہ۔ نصرت سحر نے انگلش میں جواب پڑھ کر سنانے کو کہا توبولے ۔۔میرے چیمبر میں آجائیں پڑھ کر سنادوں گا۔ امداد پتافی کی گلابی انگریزی پر وزیر اعلیٰ سندھ اور وزراءبھی ہنس پڑے۔ امدا پتافی کے ان جملوں پر نصرت سحربرہم ہوگئی اور بولیں ایک وزیر بدتمیزی کررہا ہے،چیمبر میں اپنی ماں بہنوں کو بلائیں۔ اس پر قائم مقام اسپیکر نے امداد پتافی کو ہدایت کرتے ہوئے کہا کہ خاتون ممبرہیں ان کو تنگ نہ کریں۔ اس نوک جھونک سے قبل پیپلزپارٹی کے رکن غلام قادر چانڈیو نے سندھ اسمبلی میں بلاول بھٹو کی ریلی میں فیصل آباد میں بجلی بند کرنے کا معاملہ اٹھا یا جس پر پیپلزپارٹی کے ارکان نے ایوان میں کھڑے ہوکر شدید احتجاج کیا۔ ایوان میں شور شرابے کے باعث قائم مقام اسپیکر شہلارضا نے اجلاس دس منٹ کے لیے ملتوی کردیا۔