لندن (خصوصی رپورٹ) وزیراعظم نوازشریف ڈیووس سے لندن پہنچ گئے۔ اس موقع پر اپنی رہائش گاہ کے باہر میڈیا سے گفتگو کرتے ہوئے انہوں نے کہا کہ پانامہ کیس عدالت میں زیرسماعت ہے اس پر تبصرہ مناسب نہیں‘ عدالت جو بھی فیصلہ کرے قبول ہوگا۔ انہوں نے کہا کہ پاکستان کے اقتصادی اشاریے مثبت ہیں۔ رواں سال ترقی کی رفتار 5.5سے بھی بڑھ جائے گی۔ پاکستان میں بیرونی سرمایہ کاری بھی آ رہی ہے۔ پاکستان کو پیچھے دھکیلنے کی کوشش نہیں کرنی چاہئے‘ سپورٹ کرنی چاہئے کہ ملک آگے بڑھتا رہے۔ پاکستان ترقی کی جانب گامزن ہے۔ نوازشریف نے کہا کہ لوڈشیڈنگ کم ہو گئی ہے۔ انہوں نے کہا کہ ملک میں لوڈشیڈنگ اور دہشت گردی کا خاتمہ کیا۔ وزیراعظم نوازشریف نے کہا ہے کہ پانامہ کیس کا جو بھی فیصلہ آئے گا وہ ملک و ملت کیلئے بہتر ہو گا۔ بہت سے لوگوں نے ملکی ترقی کوپیچھے کھینچنے کی کوشش کی مگر انہیں کامیابی نہیں ہوئی۔ ہم تیزی سے ترقی کی منازل طے کر رہے ہیں۔ پاکستان کی معاشی ترقی کے دنیا بھر میں چرچے ہیں اور ڈیووس میں بھی اس کا تذکرہ ہوا۔ سوئٹزرلینڈ میں ورلڈ اکنامک فورم میں شرکت کے بعد وزیراعظم نوازشریف لندن پہنچے جہاں انہوں نے پارک لین فلیٹس میں اپنی رہائش گاہ پر میڈیا سے گفتگو کرتے ہوئے کہا کہ جس طرح پاکستان معاشی میدان میں آگے بڑھ رہا ہے اس کے کافی چرچے ہیں اور ڈیووس میں بھی اس کی بات ہوئی۔ ہم تیزی سے ترقی کی منازل طے کر رہے ہیں اور اس سال بھی ہماری جی ڈی پی کی شرح نمو ساڑھے پانچ فیصد سے بڑھ جائے گی۔ ہماری سٹاک مارکیٹ ایشیا میں پہلے اور دنیا میں پانچویں نمبر پر ہے۔ پاکستان ترقی کی راہ پر گامزن ہے جہاں ملکی و غیرملکی سرمایہ کاری ہو رہی ہے۔ سی پیک میں 55ارب ڈالر کی سرمایہ کاری ہو رہی ہے۔ پاکستان میں بجلی کی لوڈشیڈنگ کا بھی خاتمہ ہو رہا ہے جبکہ دہشت گردی بھی کم ہو رہی ہے۔ پانامہ کیس کے حوالے سے وزیراعظم نوازشریف نے کہا کہ کیس سپریم کورٹ میں چل رہا ہے اس لئے اس پر تبصرہ کرنا مناسب نہیں ہوگا‘ جو بھی فیصلہ آئے گا وہ ملک و ملت کیلئے بہتر ہو گا۔ پاکستان کے اندر سب کو ملکی ترقی کو سپورٹ کرنا چاہئے اور ملک کو پیچھے کھینچنے کی بجائے اسے آگے بڑھانے کی کوشش کرنی چاہئے۔ بہت سے لوگوں نے بہت زور لگایا لیکن ان کا کچھ نہیں بنا‘ جس کا مطلب ہے کہ پاکستان آگے بڑھتا رہے گا۔
