جلاﺅ گھیراﺅ, خوفناک فائرنگ, ٹرمپ کے 20حامی ہلاک

واشنگٹن ‘ سڈنی (نیٹ نیوز‘ ایجنسیاں) ڈونلڈ ٹرمپ نے امریکی صدر کی حیثیت سے پہلا قدم اٹھاتے ہوئے سابق صدر کی جانب سے ہیلتھ کیئر کے سلسلے میں کی جانے والی اصلاحات کو ایگزیکٹو آرڈر پر دستخط کرکے نشانہ بنایا ہے۔ ان کے اعلان میں ایجنسیوں کو ہدایت دی گئی ہے کہ وہ اوباما کیئر نامی منصوبے پر آنے والے مالی بوجھ کو کم کریں۔گزشتہ روز اپنے افتتاحی خطاب میں انہوں نے ‘امریکہ کو مقدم’ رکھنے اور وسیع پیمانے پر پھیلے جرائم اور بند فیکٹریوں کے نتیجے میں ‘امریکی تباہی کو ختم’ کرنے کا عہد کیا۔ منتظمین کا کہنا ہے کہ وہ نسلی اور جنسی مساوات اور دیگر چیزوں کی نشاندہی کرنا چاہتے ہیں جن کے بارے میں خیال ظاہر کیا جاتا ہے کہ ٹرمپ کی انتظامیہ کی جانب سے انہیں خطرہ لاحق ہے۔ واشنگٹن میں بی بی سی کی نمائندہ بابرا پلیٹ اشر کے مطابق ٹرمپ نے عہد کیا ہے کہ وہ ایگزیکٹو آرڈر کے ذریعے جو کچھ کرسکتے ہیں وہ جلد از جلد کریں تاکہ وہ شروع میں ہی سبقت حاصل کرلیں نہیں تو پھر انھیں کسی بل کو منظور کروانے کے لیے کانگریس کے سخت مرحلے سے گزرنا پڑے گا۔ انہوں نے اپنی تقریر کے دوران امریکہ کی تاریک اور شکستہ تصویر پیش کی اور متروک کارخانوں، جرائم اور ناکام تعلیمی نظام جیسے مسائل کی نشان دہی کرتے ہوئے عہد کیا کہ ان کے دورِ صدارت میں تبدیلی لائی جائے گی۔ انہوں نے کیپیٹل کی سیڑھیوں پر تقریر کرتے ہوئے کہا یہ امریکی تباہی یہیں اور اب سے ختم ہوتی ہے۔ انہوں نے کہا ’ہم نے کھربوں ڈالر بیرونِ ملک خرچ کر دیے اور امریکہ بنیادی ڈھانچہ شکست و ریخت کا شکار ہوتا رہا۔ ہم نے دوسرے ممالک کو امیر بنا دیا اور ہمارے اپنے ملک کی دولت، طاقت اور اعتماد ختم ہوتا چلا گیا۔ امریکہ ایک بار پھر پہلے کی طرح جیتنا شروع کر دے گا اور پہلے سے کہیں زیادہ جیتے گا۔’ہم اپنی نوکریاں واپس لائیں گے، ہم اپنی سرحدیں واپس لائیں گے، ہم اپنی دولت اور خواب واپس لے کر آئیں گے۔ ‘انتظامیہ کی یہ تبدیلی صدارتی ویب سائٹوں میں بھی نظر آئی جن سے اوباما کی پالیسیاں ہٹا کر ٹرمپ کا ایجنڈا پوسٹ کر دیا گیا۔ تاہم بعض ناقدین نے اعتراض کیا ہے کہ ٹرمپ نے اس ایجنڈے میں شہری حقوق، ہم جنس پرستوں کے حقوق، صحت یا ماحولیاتی تبدیلی کا ذکر نہیں کیا۔ اس دوران میٹروپولیٹن پولیس کے مطابق انھوں نے ایک سو کے قریب مظاہرین کو گرفتار کیا ہے جو ٹرمپ کی تقریبِ حلف برداری کے خلاف احتجاج کر رہے تھے۔ ترجمان لیفٹیننٹ شان کانبوئے نے کہا کہ اکثریت کو ‘املاک کو نقصان پہنچانے’ کے الزام میں گرفتار کیا گیا ہے۔اس سے قبل ڈیڑھ سو کے قریب سیاہ پوش مظاہرین نے واشنگٹن بھر میں مارچ کرتے ہوئے کھڑکیوں کے شیشے توڑے اور کوڑے دان گلیوں میں لڑھکا کر راستے بند کرنے کی کوشش کی۔ہفتے کو خواتین کے ایک مظاہرے میں دو لاکھ افراد کی شرکت کی توقع ہے۔اس دوران نیویارک میں بھی مظاہرے ہوئے جن میں درجنوں مشاہیر سمیت ہزاروں لوگوں نے شرکت کی۔ انھوں نے ٹرمپ کی صدارت کے بارے میں اپنی تشویش کا اظہار کیا۔ اسی طرح کی ریلیاں آسٹریلیا اور نیوزی لینڈ میں منعقد کی جا رہی ہیں جبکہ دنیا کے کئی دوسرے ممالک میں اس طرح کی ریلیوں کا منصوبہ ہے۔ڈونلڈ ٹرمپ کے امریکی صدارت سنبھالنے کے خلاف آسٹریلوی شہر سڈنی میں ایک بڑا احتجاجی مظاہرہ کیا گیا ہے جس میں ہزاروں افراد نے شرکت کی۔ مظاہرین اِس خدشے کا اظہار کر رہے تھے کہ ٹرمپ کے دورِ صدارت کے دوران دنیا بھر میں نفرت اور کٹر رویوں میں اضافہ ہو گا۔ سڈنی کے سنٹرل ہائیڈ پارک میں خواتین کی ایک کثیر تعداد نے بھی ٹرمپ کے خلاف مظاہرے کا اہتمام کیا۔ انہوں نے ایسے بینر اٹھا رکھے تھے، جن پر درج تھا کہ وہ دنیا بھر میں مزاحمت کریں گی، نسائیت ان کا ٹرمپ کارڈ ہے اور وہ لڑکیوں کی طرح لڑیں گی۔ اس احتجاج کی منتظم مینڈی فرائی بینڈ کا کہنا تھا نسل پرستی صرف امریکا کا مسئلہ نہیں ہے اور ایسے رویوں کے خلاف آج کا احتجاج ایک تحریک کا آغاز ہے۔امریکہ کی معروف گلوکارہ میڈونا نے واشنگٹن میں لاکھوں خواتین کی ریلی سے خطاب کرتے ہوئے کہا کہ کئی بارسوچا کہ وائٹ ہاﺅس کو تباہ کرڈالوں، بربریت کا یہ نیا دور مسترد کرنے والی خواتین نے بغاوت کردی ہے۔
نیویارک (مانیٹرنگ ڈیسک) امریکی صدر ڈونلڈ ٹرمپ نے سی آئی اے ہیڈ کوارٹر کے دورے کے موقع پر گفتگو کرتے ہوئے کہا ہے کہ تمام خفیہ ایجنسیوں کی مکمل حمایت حاصل ہے اور امریکہ کو محفوظ بنانے میں سی آئی اے کا اہم کردار ہے۔ انہوں نے کہا کہ اسلامی دہشتگردی دنیا کےلئے سب سے بڑا خطرہ ہے۔ پھر کہتا ہوں کہ اسے ختم کر کے دم لوں گا۔ بعض اوقات سی آئی اے کو حکومت کی حمایت نہیں ملتی میں مکمل تعاون کرونگا۔ انہوں نے کہا کہ میری میڈیا سے کھلی جنگ ہے۔ دنیا میں میڈیا سے زیادہ بددیانت کوئی نہیں۔
نائیجیریا (مانیٹرنگ ڈیسک) نائیجیریا میں ڈونلڈ ٹرمپ کے حامیوں پر فائرنگ،20 افراد ہلاک ہوگئے۔ خبرایجنسی کے مطابق پورٹ ہارکوٹ میں علیحدگی پسند تنظیم کی جانب سے مظاہرہ کیا جا رہا تھا۔ حکام کی ہلاکتوں کی اطلاعات کی تردید اور53 افراد کی گرفتاری کی تصدیق کردی ۔