چترال(مانیٹرنگ ڈیسک) ضلع چترال کی شاہی جامع مسجد میں منبر پر کھڑے ہوکر ایک شخص کی جانب سے نبوت کا جھوٹا دعویٰ کرنے پر ہنگامہ کھڑا ہوگیا اور لوگوں نے اسے قابو کرکے مارنے کی کوشش کی تاہم خطیب مسجد نے صورت حال کی سنگینی سمجھتے ہوئے اسے پولیس کے حوالے کر دیا جس پر ہزاروں افراد نے تھانے پر دھاوا بولتے ہوئے گیٹ توڑ کر اندر جانے کی کوشش کی اور زبردست توڑ پھوڑ اور پتھراﺅ کیا۔ پولیس ملازمین نے کنٹرول کرنے کے لئے لاٹھی چارج اور شیلنگ کی جس کے نتیجے میں تین افراد زخمی ہوگئے۔ مظاہرین نے ملزم کی حوالگی کے لئے مزاحمت کی۔ حالات خراب ہونے اور ہاتھ سے نکلنے پر پولیس کی مدد کےلئے فوج اور سکاﺅٹس کے اہلکار بھی پہنچ گئے اور علاقے کا محاصرہ کرتے ہوئے کنٹرول سنبھال لیا۔ آخری اطلاعات آنے تک حالات کشیدہ تھے جبکہ چترال کے جنوبی علاقوں سے مذکورہ واقعہ کے خلاف سینکڑوں لوگوںکا ہجوم گاڑیوں سے آنے کی کوشش کر رہا ہے جن کو راستے ہی میں روک لیا گیا ہے جس کی وجہ سے گاڑیوں کی لمبی قطاریں لگ گئی ہیں۔ جمعہ کو شاہی مسجد میں محمد رشید ولد محمد دین سکنہ بچ تور کہو نامی شخص نے نعوذ باللہ نبوت کا جھوٹا دعویٰ کر دیا جس پر مسجد میں موجود لوگ کھڑے ہوگئے اور اس پر حملہ آور ہوئے تاہم خطیب جامع مسجد مولانا خلیق الزمان نے محمد رشید کو پاگل قرار دے کر پولیس کے حوالے کر دیا جس پر مشتعل ہجوم چترال تھانے کے باہر جمع ہوگیا اور تھانے پر پتھراﺅ شروع کر دیا اور توڑ پھوڑ کی جس سے تھانے کی عمارت کو نقصان پہنچا۔ ادھر چترال کے جنوبی علاقوں سے مذکورہ واقعہ کے خلاف لوگ جلوس کی شکل میں آئے تاہم شہر آنے والی گاڑیوں کو روک دیا گیا جن کی تعداد سینکڑوں میں ہے جس کی وجہ سے مسافروں کو شدید مشکلات کا سامنا ہے۔ ادھر ڈپٹی کمشنر چترال شہاب حامد یوسف زئی نے بتایا کہ گستاخ رسول کے خلاف ایف آئی آر درج کرلی گئی ہے۔ ملزم سے ضروری تفتیش کی جا رہی ہے، ملزم کی باتوں سے اندازہ ہوتا ہے کہ شاید اس کا دماغی توازن درست نہیں تاہم تفتیش اور میڈیکل رپورٹ آنے کے بعد معلوم ہوگا کہ ملزم واقعی ذہنی بیمار ہے یا کہ کوئی سازش ہے جس کے پس پردہ دیگر محرکات ہیں۔ ملزم یہ بھی کہتا ہے کہ وہ پچاسواں امام ہے اور کبھی کیا۔ دریںاثناءچترال میں عوام بدستور مشتعل ہیں اور ملزم کی حوالگی کا مطالبہ کر رہے ہیں۔ پولیس کے ساتھ ان کی آنکھ مچولی رات گئے تک جاری رہی۔ ڈی سی ذرائع کے مطابق ملزم کو نامعلوم مقام پر منتقل کر دیا گیا ہے اور فوج کو بھی طلب کر لیا گیا ہے جبکہ سکاﺅٹس اہلکار بھی موجود ہیں۔ تھانہ چترال کے باہر ابھی بھی لوگوں کا ہجوم موجود ہے جن میں علماءبھی شامل ہیں اور کہہ رہے ہیں کہ مذکورہ شخص واجب القتل ہے اسے ہمارے حوالے کیا جائے۔ ادھر انسداد دہشت گردی کی خصوصی عدالت کے جج سید کوثر عباس زیدی نے سوشل میڈیا پر گستاخانہ مواد کی تشہیر کے الزام میں گرفتار ملزموں کو جوڈیشل ریمانڈ پر جیل بھیج دیا۔ جمعہ کو ایف آئی اے نے سوشل میڈیا پر گستاخانہ مواد کی تشہیر کرنے والے 4 ملزمان کو 7 روزہ جسمانی ریمانڈ کے بعد عدالت پیش کیا گیا۔ ملزمان نے عدالت میں کہا کہ ہم پر کون کون سی دفعات لگائی گئی ہیں بتایا جائے، جس پر عدالت نے کہا کہ جو دفعات ملزمان پر لگائی گئی ہیں ملزمان کو آگاہ کیا جائے ان کا قانونی حق ہے۔ ایف آئی اے کی جانب سے عدالت کو بتایا گیا کہ ملزمان پر یکساں دفعات عائد کی گئی ہیں۔ تفتیش مکمل ہوچکی ہے ملزمان کے مزید جسمانی ریمانڈ کی ضرورت نہیں۔ عدالت نے 4 مئی تک ملزمان کو جوڈیشل ریمانڈ پر جیل بھیج دیا ہے۔
ملعون گرفتار

جھنگ(بیورورپورٹ)سابق صدر آصف علی زرداری نے کہاہے کہ اس دفعہ ہم نے پنجاب کا قلع فتح کرناہے،میاں صاحب ہم آپ کو گھر بھیجیں گے ،آپ گھر نہیں کسی اور گھر جائیں گے ،آپ کو لانڈھی جیل میں کھانا بھیجنے کیلئے میں تیار ہوں۔ جھنگ میں جلسے سے خطاب کرتے ہوئے پاکستان پیپلز پارٹی کے شریک چیئرمین اور سابق صدر آصف علی زرداری نے کہاہے کہ شاہ جیونہ کے لوگوں کا پیار دیکھ کر بہت خوشی محسوس کر رہاہوں ،فیصل صالح حیات کو دوبارہ پارٹی میں شامل ہونے پر مبارک باد دیتاہوں ۔انہوں نے کہا کہ اس دفعہ ہم نے پنجاب کا قلع فتح کرناہے ،اس بار ہم نے شریفوں کو مٹانا ہے ،گزشتہ الیکشن ہم نہیں ہار بلکہ ہمیں آر اوز نے ہرایاہے ۔ان کا کہناتھا کہ ن لیگ نے لوگوں کے ساتھ کیا کیا ،نہ بجلی ہے نہ پانی ،قرض دوگنا کر دیا ہے ،عوام کے ساتھ یہ کیا کیا ۔ آصف زرداری کا کہناتھا کہ ہم نے شاہنواز ،بینظیر ،مرتضی کے جنازے اٹھانے کے بعد بھی پاکستان کھپے کا نعرہ لگایا ،میاں صاحب ہم آپ کو گھر بھیجیں گے ،آپ گھر نہیں کسی اور گھر جائیں گے ،آپ سمجھ لیں جیسے مشرف کو گھر بھیجا تھا اب نوازشریف کوبھیجیں گے، آپ کو لانڈھی جیل میں کھانا بھیجنے کیلئے میں تیار ہوں۔ان کا کہناتھا کہ آج سندھ اسمبلی نے گو نواز گو نواز کی قرار داد پاس کر دی ہے ۔ان کا کہناتھا کہ بھی تو پہلا جلسہ ہے میاں صاحب آپ کیخلاف ،آگے آگے دیکھیں ہوتا ہے کیا ۔ آصف زرداری کا کہناتھا کہ چاروں صوبوں کو آپ سے نجات چاہیے، آپ صرف سرکاری روٹیاں توڑنے کے سوا کچھ نہیں کرسکتے، آپ سے کچھ نہیں ہوتا ، آپ پائے کھانے کے سوا کچھ نہیں کرسکتے،ہم ہرطرف سے آپ کے پیچھے لگ رہے ہیں،جب تک نکال نہ دیں آپ کے پیچھے لگے رہیں گے،انہوں نے قوم کا حق لوٹا ہے، ہم ان سے حق واپس لیں گے۔ان کا کہناتھا کہ میں یہاں تو مخدوم صاحب کی دعا لینے آیاہوں ،سب دوستوں کے ساتھ مل کر ان کی دوا کرنے آیا ہوں ۔ چیئرمین پاکستان پیپلز پارٹی بلاول بھٹو زرداری نے کہا ہے کہ پاناما کیس کے فیصلے سے ثابت ہوگیا کہ ایک فیصلہ شریفوں کیلئے ہے اور دوسرا ملک کے عوام کیلئے ہے، میاں صاحب پاناما کیس سے مکمل طور پر بری نہیں ہوئے بلکہ ان کے خلاف عوامی عدالت نے فیصلہ دے دیا ہے۔ بلاول بھٹو نے جلسے سے خطاب کرتے ہوئے گو نواز گو کے نعرے بھی لگائے۔ بلاول بھٹو زرداری کہتے ہیں کہ ان شریفوں پر کوئی قانون لاگو نہیں ہوتا، ان کے مقررہ کردہ افسروں کی جے آئی ٹی سے قوم کیا امید رکھ سکتی ہے۔جھنگ میں پیپلز پارٹی کے جلسہ عام سے خطاب میں انہوں نے کہا کہ کب تک اس ملک میں دو قانون چلیں گے، ایک وزیراعظم کو چار تین کے فیصلے پر پھانسی،جبکہ دوسرے وزیراعظم کو تین دو کے فیصلے پر بری کردیتے ہو۔بلاول بھٹو کا کہنا ہے کہ ایک خط نہ لکھنے پر گیلانی کو گھر بھیج دیا جاتاہے، نہ ہی ہمیں دو پاکستان چاہئیں، نہ ہی دو قانون، ہمیں ایک پاکستان اور ایک قانون چاہیے، امیر غریب کے لیے ایک ہی قانون ہو۔انہوں نے کہا کہ میاں صاحب، ا?پ مکمل طورپر بری نہیں ہوئے، دو سینئر ججز نے ا?پ کو نااہل قرار دے دیا، تھوڑی سی بھی شرم حیا ہے تو فوری استعفیٰ دیں، ا?پ کے خلاف توعوام کی عدالت نے بھی فیصلہ دے دیا ہے۔

اسلام آباد (خبرنگار خصوصی) پاناما لیکس کے فیصلے کے بعد وزیراعظم کی زیر صدارت پہلا مشاورتی اجلاس طلب کیا گیا جس میں قانونی ماہرین نے نواز شریف کو فیصلے سے متعلق تفصیلی بریفنگ دی۔ تفصیلات کے مطابق وزیراعظم نواز شریف کی زیر صدارت پاناما لیکس کا فیصلہ آنے کے بعد پہلامشاورتی اجلاس طلب کیا گیاجس سے خطاب کرتے ہوئے انہوں نے کہا کہ ہم نے پہلے بھی کہا تھا فیصلہ جو بھی ہو مانیں گے اور عدالتوں کے فیصلوں کا احترام کرتے ہیں۔ اجلاس میں سپریم کورٹ کے فیصلے کو قبول کرنے پر اتفاق اور وفاقی وزرانے وزیر اعظم پر مکمل اعتماد اور یکجہتی کا اظہار کیا۔ وزیراعظم ذرائع کے مطابق فیصلے کے قانونی اور سیاسی پہلووں پر تفصیلی مشاورت اورجے آئی ٹی کے حوالے سے آئندہ کی حکمت عملی بھی طے کی گئی اور وزیراعظم کی زیرصدارت اجلاس میں مشاورتی عمل جاری رکھنے کا فیصلہ کیا گیا۔ نواز شریف کی زیرصدارت اجلاس میں فیصلہ کیا گیا کہ سپریم کورٹ کے13 سوالات کا جواب ،جے آ ئی ٹی سے بھرپور تعاون ، سپریم کورٹ کے فیصلے پرمن و عن عمل ، کچھ تحفظات ہونے کے باوجود بہانہ نہیں بنایا جائےگا اور حکومت آئین اور قانون کی پاسداری کرے گی جبکہ اجلاس میں اتفاق کیا گیا کہ اپوزیشن صرف انتشار چاہتی ہے جس میں کبھی کامیاب نہیں ہو گی۔ٹیکسلا (نمائندہ خبریں) وفاقی وزیر داخلہ چوہدری نثار علی خان نے کہا ہے کہ عدالتی فیصلے لوگوں کی خواہشات نہیں قانون کے مطابق ہوتے ہیں ، بعض عناصر اپنے سیاسی مقاصد کی خاطر عجیب منطق پیش کررہے ہیں ،عدالتی فیصلے کو سیاست کی بھینٹ نہیں چڑھنا چاہیے ۔آصف زرداری کا ایمانداری پر لیکچر دینا قیامت کی نشانی ہے، ٹیکسلا میں میڈیا سے گفتگو کرتے ہوئے وزیرداخلہ نے کہا کہ عدالتی فیصلہ عدالتی ہی ہوتا ہے اسے نہ سیاست کی بھینٹ چڑھنا چاہیے اور نہ ہی اس پر تبصرے کرنے کیلئے مزید عدالتیں لگانی چاہیں ۔ عدالتی فیصلے کو طرح طرح کے معنی پہنچائے جارہے ہیں ۔ عدالتوں کے اوپر عدالتیں لگ رہی ہیں ۔ لوگ اپنی خواہشات اور سیاسی مقاصد کی خاطر عجیب عجیب مطق بیان کررہے ہیں ۔ یہ ایک متفقہ فیصلہ ہے کہا جارہا ہے کہ دو ججز ایک طرف اور تین ایک طرف ہیں ۔ یہ درست نہیں ہے دو ججز نے اختلاف رائے کا اظہار ضرور کیا ہے مگر جے آئی ٹی بنانے میں 5ججز کے دستخط موجود ہیں ۔ وزیر داخلہ نے کہا کہ کوئی بھی عدالتی فیصلہ کی خواہش کے مطابق نہیں ہوسکتا بلکہ قانون و آئین کے مطابق ہوتا ہے ۔ ابھی تک کیس عدالت میں ہے مزید تفتیش کیلئے جے آئی ٹی بنائی گئی ہے ۔ اپوزیشن کے بعض زعماءبار بار کمیشن یا جے آئی ٹی کا نام لیتے تھے اور کہتے تھے کہ اس میں ایم آئی اور آئی ایس آئی کے ممبران بھی شامل ہوں اب سپریم کورٹ نے فیصلہ دیا ہے کہ جے آئی ٹی بنے اور ایم آئی اور آئی ایس آئی کی نمائندگی ہو سپریم کورٹ کا فیصلہ سب کو قابل قبول ہونا چاہیے ۔ آج وزیراعظم کی میٹنگ میں ہمارے ساتھیوں نے اپنی اپنی رائے دی اور اس فیصلے کے حوالے سے مختلف بیانات سامنے آئے مگر وزیراعظم نے سختی سے ہدایت دی ہے کہ ہم کسی صورت اس فیصلے کو تقسیم نہ کریں خواہ دو ججز ایک طرف ہیں اور تین ججز ایک طرف ہیں ہم اسے عدالتی فیصلہ سمجھتے ہیں یہ اس وقت تک عدالت کا فیصلہ ہے جب تک جے آئی ٹی اپنی رپورٹ عدالت میں واپس نہیں آتی ۔ افسوس بعض سیاستدان عدالتی فیصلوں کے خلاف احتجاج بلند کرر ہے ہیں اور بعض ججوں کی حمایت اور بعض کے خلاف بات کر رہے ہیں ۔ خدا کیلئے آئین وقانون پر رحم کھائیے جب کوئی ایشوبنے تو اس کے حل کیلئے بھی کوئی طریقہ کار ہونا چاہیے ۔ مسئلے کے حل کیلئے پھر سپریم کورٹ سے بڑا ادارہ کونسا ہے ۔ یہ فیصلہ سپریم کورٹ پر چھوڑدیں ہمیں یہ فیصلہ قبول ہے آصف علی زرداری قوم کو ایمانداری اور دیانتداری پر لیکچر دیں یا آرٹیکل 62اور 63کا سرٹیفکیٹ دیں یہ قیامت کی نشانیاں ہیں اس ملک کے بعض سیاسی لیڈران پاکستانی عدالتوں سے تو مجرم قرار پائے ہی ہیں مگر سوئس عدالتوں سے بھی ہوئے ہیں آج وہی قوم کو شفافیت کو لیکچر دے رہے ہیں ۔ اگر ہم سب نے سپریم کورٹ پر اتفاق کیا ہے تو اسے فیصلہ کرنے دیں اگر یہ کہا جارہا ہے کہ وزیراعظم کی لیگل ٹیم کے پاس شواہد نہیں تھے تو یہ اس زور سے کیوں نہیں کہا جارہا کہ الزام لگانے والوں کے پاس بھی ناکافی شواہد تھے ۔یہاں وزیراعظم کے اوپر الٹی گنگا بہائی گئی کہ آپ نے اپنی بے گناہی ثابت کرنی ہے ۔ یہ کیس کرپشن کا نہیں بلکہ لندن میں وزیرعظم اور ان کے خاندان کی جانب سے خریدے گئے فلیٹس کیلئے پیسہ کہاں سے آیاجبکہ وزیراعظم کے خاندان کا سپریم کورٹ میں یہ موقف رہا کہ ہمارے والدکے 1970-80میں اس وقت بااثر اثاثے تھے جب ان کا حکومت کے ساتھ دور دور کا واسطہ نہیں تھا میں واضح کردوں کہ بہت سے لوگوں کے باہر اثاثے ہیں اگر غیر قانونی ہیں تو چھپا کر رکھتے ہیں ۔ جبکہ وزیراعظم اور ان کے خاندان نے ان فلیٹس کو چھپا کر نہیں رکھا اب سب کو سپریم کورٹ کا احترام کرتے ہوئے فیصلہ ہونے کا انتظار کرنا چاہیے یہ سرے محل یا کرپشن کا کیس نہیں اس کی نوعیت مختلف ہے ۔وزیراعظم نے خود کو احتساب کیلئے پیش کرکے اچھی ر وایت قائم کی ۔ وزیر داخلہ نے کہا کہ غیب کا علم میرے پاس نہیں مگر میرے سامنے اگر اس حکومت کے حوالے سے کرپشن یا کوئی بھی غلط کاری ہوتی تو میں بہت پہلے اس حکومت کوچھوڑ چکا ہوتا ۔ لہذا میرا ضمیر مطمئن ہے میں اللہ تعلی کے سامنے جوابدہ ہوں مگر الزامات کا جواب میرے پاس نہیں ہے ۔ الزامات لگانا ہی کافی نہیں ثبوت بھی دینے پڑتے ہیں اس کیس کا ایشو صرف یہ ہے کہ ان فلیٹس کیلئے سرمایہ کہاں سے آیا جب شریف خاندان کا مو¿قف ہے کہ 1970کے بعد ہمارا بیرون ملک سرمایہ تھا پیسہ پاکستان سے نہیں گیا فیصلہ شواہد کے مطابق ہوگا۔ الزامات یا شکوک شبہات کی بنیاد پر نہیں ہوگا۔ لفاظی اور گفتارکی جنگ میں ہر چیز کو کنفیوزکیا جارہا ہے ۔ کنفیوژن پیدا کرنے والے چند لوگ اس کیس کافیصلہ نہیں چاہتے بلکہ انتشار چاہتے ہیں حکومت نے تو کئی بار کہا ہے کہ جس چیز پر آپ راضی ہیں حکومت اسی کے تحت تفتیش اور تحقیقات کرانے کیلئے تیار ہے اس لیے حکومت نے یہ فیصلہ کیا ہے کہ ہم مکمل طور پر سپریم کورٹ کے فیصلے کے مطابق اس کو مکمل سپورٹ کریں گے اور فیصلے کا احترام بھی کریں گے ۔انہوںنے کہا کہ حکومت جس دن سے آئی اسی دن سے اس کے خلاف یلغار شروع ہو ئی۔ اپوزیشن نے ٹھان لی ہے کہ حکومت کو کام نہیں کرنے دینا ایک سوال پر انہوںنے کہا کہ الیکشن سے پہلے عبوری حکومت پیپلزپارٹی کی مرضی سے بنائی گئی کے پی کے فیڈرل ، سندھ ، بلوچستان پنجاب ہر جگہ نگران حکومت پیپلزپارٹی کی مرضی سے بنی نجم سیٹھی کو نگران وزیراعلی بننے کی میں اور شہبازشریف نے مخالفت تو پھر وہ کس طرح ہماری سپورٹ کرسکتے ہیں ۔ چیف الیکشن کمشنر اپوزیشن اور حکومت کی مرضی سے بنا دراصل اپوزیشن حکومت کی کارکردگی سے خوفزدہ ہے کارکردگی کا مقابلہ کرنے کی بجائے بیان بارزی کی گئی ۔ ہماری حکومت کی کارکردگی کا موازنہ پچھلی حکومت سے کریں تو فرق صاف نظر آئے گا۔ ہم کسی کی مخالفت کی پرواہ کئے بغیر آگے بڑھتے رہیں گے کراچی آپریشن وفاقی حکومت نے اتفاق رائے سے شروع کیا ۔ پاکستان کے دشمن بھی کراچی کی سیکیورٹی صورتحال کی بہتری کا اعتراف کرتے ہیں ۔ رینجرز کی کارکردگی کا حکومت سندھ کو سب سے بڑا فائدہ ہے اب بھی رینجرز کی مدت میں توسیع کا مسئلہ بلا جواز پیدا ہوا یہ ایک انتہائی تشویشناک صورتحال ہے ہر تین ماہ بعد سندھ حکومت رینجرز کا کردار متنازعہ بنا رہی ہے حالانکہ اسے رینجرز سے کوئی شکایت بھی نہیں ہے ۔ ابھی پاناماکا مکمل فیصلہ آیا ہی نہیں مٹھائیاں بانٹنے کی کوئی ضرورت نہیں اس سے رہنمائی اور عبرت حاصل کرنی چاہیے ۔ لوڈ شیڈنگ کے بارے میں سوال پر انہوںنے کہا کہ دسمبر تک 6ہزار میگاواٹ بجلی نظام میں شامل ہوگی میں وثوق سے کہہ سکتا ہوں کہ عوام کی مشکلات کم ہونے والی ہے ۔ڈان لیکس کے معاملے پر بات کرتے ہوئے چوہدری نثار کا کہنا تھا کہ نیوز لیکس کی رپورٹ پاناما کیس کی وجہ سے تاخیر کا شکار ہوئی جو پیر یا منگل کو وزیراعظم کو پیش کردی جائے گی جب کہ میں صرف اللہ کے سامنے جواب دہ ہوں، نوازشریف یا عدالت کے سامنے نہیں۔