لندن (مانیٹرنگ ڈیسک) معصوم انسانوں کو خون میں نہلانے والے دہشتگرد اپنی عاقبت تو برباد کرتے ہی ہیں لیکن دنیا میں وہ کس طرح عبرت کا نشان بن جاتے ہیں اس کی ایک مثال برطا نوی شہر مانچسٹر میں خود کش حملہ کرنے والے سلمان عابدی کی صورت میں دیکھی جاسکتی ہے۔ میل آن لائن کی رپورٹ کے مطابق مانچسٹر کی کسی مسجد کا امام اس دہشتگرد کا جنازہ پڑھانے کیلئے تیار نہیں جبکہ شہر کے تمام قبرستانوں نے اسے قبر کی جگہ دینے سے انکار کر دیا ہے۔ ذرائع کے حوالے سے بتایا گیا ہے کہ مانچسٹر شہر کے حکام کا کہنا ہے کہ وہ اس بات کو یقینی بنانے کیلئے اپنا پورا زور لگادیں گے کہ اس دہشت گرد کو مانچسٹر شہر کی زمین میں دفن نہ ہونے دیا جائے۔ تدفین تو دور کی بات اس کی لاش بھی مانچسٹر شہر سے باہر ایک مردہ خانے میں پڑی ہے اور کوئی اسے قبول کرنے کو تیار نہیں ہے۔ رپورٹ کے مطابق مانچسٹر حملے کے بعد جب لاشیں جمع کرنے کا سلسلہ شروع ہوا تو اسی وقت سلمان عابدی کی باقیات کو اس کا نشانہ بننے والے بے گناہ افراد کی لاشوںسے دور لیجا کر رکھا گیا تھا۔ حکام کا کہنا تھا کہ 22 معصوم افراد کی جان لینے والے کی باقیات کو ان معصوموں کی لاشوں کے قریب کیسے رکھا جا سکتا ہے۔
