لاہور (سیاسی رپورٹر) مسلم لیگ ن کے حامی تصور کئے جانے والے سوشل میڈیا پر یہ بات سامنے آئی ہے کہ ”پاکستان میں جاری پانامہ کیس کو بعض تجزیہ کار کرپشن کے خاتمے اور تبدیلی کا باعث قرار دے رہے ہیں سچی بات یہ ہے کہ ملٹری اسٹیبلشمنٹ اور نوازشریف کی اختیارات کی لڑائی ہے کیونکہ ملٹری اسٹیبلشمنٹ پہلے افغان جہاد کے نام پر کمائی کر رہی تھی جو اب بند ہو چکی ہے وہ نوازشریف سے ہندوستان، افغانستان پالیسی پہلے ہی چھین چکی ہے۔ سو اب سی پیک کی نگرانی مانگ رہی ہے۔ اسٹیبلشمنٹ چاہتی ہے کہ سی پیک کی 5 رکنی ایڈوائزری کونسل بنے جن کا سربراہ حاضر سروس فوجی جنرل بنے۔ 5 رکنی کمیٹی میں آرمی کی مانگ ہے کہ 3 حاضر سروس جنرل ممبر ہوں اور 2 سویلین اس پر ایک عرصہ سے نواز شریف اور آرمی کے درمیان کش مکش چل رہی ہے بعض اطلاعات کے مطابق نوازشریف اور ان کے قریبی ساتھیوں نے اس وقت تک آرمی کی بات ماننے سے انکار کر دیا ہے۔ اطلاعات یہ ہیں کہ نوازشریف اور پارٹی کے قریبی ساتھیوں نے مشورہ دیا ہے کہ اگر نااہل ہونا پڑے تو ہوا جائے الیکشن میں جانا پڑے تو جایا جائے لیکن سی پیک کو جرنیلوں کے حوالے نہ کیا جائے نوازشریف نے مریم نواز کے ذریعے سول سپرمیسی کی جو بات کی ہے وہ یہی تھی کہ سی پیک سول نگرانی میں چلے گا۔ سمجھوتہ نہیں ہو گا۔“ اطلاعات کے مطابق نااہلی کی صورت میں مسلم لیگ جارحانہ انداز اپنائے گی اور جرنیلوں کے کردار سے پردہ اٹھانے کی لائن اختیار کرے گی۔ تاہم بعض سویلین اور جنرل ابھی تک درمیانہ حل اور راستہ اختیار کرنے کے لئے کوشاں ہیں۔ کیونکہ دونوں صورتوں میں فائدہ نوازشریف کو ہو گا۔
ملٹری اسٹیبلشمنٹ اور نواز شریف میں اختیارات کی لڑائی, سنسنی خیز خبر
