لاہور:آل پاکستان انجمن تاجرا ن نے این اے 120کے ضمنی انتخاب میں مسلم لیگ (ن) کی بھرپور حمایت کا اعلان کر تے ہوئے کہا کہ معیشت کی ترقی کیلئے سیاسی استحکام اور جمہوریت کا تسلسل نا گزیر ہے ،پاکستان کو دنیا میں باوقار ملک کے طور پر منوانے کیلئے اتفاق رائے سے ’’قومی میثاق ‘‘ مرتب کیا جائے ۔ ڈذں مسلم لیگ (ن) کے مرکزی رہنما کیپٹن (ر) محمد صفدر اور رکن قومی اسمبلی وحید عالم کی آل پاکستان انجمن تاجران کے صدر اشرف بھٹی اور دیگر تاجر نمائندوں سے ملاقات ہوئی ۔ اس موقع پر ڈپٹی میئر راؤ شہاب الدین،وسیم کاشمیری،جمشید بٹ، خواجہ ندیم،چیئرمین یونین کونسل شجابٹ ، الیاس بٹ سمیت دیگر بھی موجود تھے۔ ملاقات میں تاجروں کے دیرینہ مسائل کے حوالے سے بھی گفتگو کی گئی ۔کیپٹن (ر) محمد صفدر نے اس موقع پر گفتگو کرتے ہوئے کہا کہ نواز شریف کی قیادت میں ملک نے دن دوگنی رات چوگنی ترقی کی ہے اور آج عالمی ادارے پاکستان کی معاشی ترقی کے حوالے سے مثبت اشاریے پیش کر رہے ہیں ۔ انہوں نے کہا کہ مسلم لیگ (ن) کی حکومت نے ہمیشہ تاجر وں کی مشاورت سے پالیسیاں تشکیل دی ہیں جن کے مثبت اور دورس نتائج برآمد ہوئے ہیں۔ اشرف بھٹی نے حلقہ این اے 120کے ضمنی انتخاب میں مسلم لیگ (ن) کی بھرپور حمایت کا اعلان کرتے ہوئے کہا کہ تاجر برادری نے نا مساعد حالات کے باوجود معیشت کی ترقی میں اپنا اہم کردار ادا کیا ہے اور کر رہی ہے ۔اگر ہمیں دنیا کی آنکھوں میں آنکھیں ڈال کر بات کرنی ہے تو اس کیلئے خود مختاری کو اپنانا ہوگا اوریہ کام معیشت کی مضبوط کے بغیر ممکن نہیں۔
