اعصام نے بارسلونااوپن کے سیمی فائنل کا ٹکٹ کٹوالیا

بارسلونا(اے پی پی) سٹار پاکستانی کھلاڑی اعصام الحق قریشی فتوحات برقرار رکھتے ہوئے بارسلونا اوپن ٹینس ٹورنامنٹ مینز ڈبلز سیمی فائنل میں پہنچ گئے، اعصام اور جین جولین راجر نے کوارٹر فائنل میں مارسیلو میلو اور لیوکاز کیوبٹ کو سخت مقابلے کے بعد شکست دی۔ جمعرات کو کھیلے گئے مینز ڈبلز کوارٹر فائنل میں اعصام الحق اور ان کے ڈچ جوڑی دار جین جولین راجر نے عمدہ کارکردگی کا مظاہرہ کرتے ہوئے برازیل کے مارسیلو میلو اور ان کے پولینڈ کے جوڑی دار لیوکاز کیوبٹ کو ایک سخت مقابلے کے بعد 7-5، 3-6 اور 10-5 سے زیر کر کے سیمی فائنل کیلئے کوالیفائی کیا۔میگا ایونٹ کے فیصلہ کن معرکے میں رسائی کےلئے قومی ٹینس سٹار اعصام اورہالینڈکے جین جولین راجرزکو ارجنٹائن کے گویڈوپیلا اورچلی کے نکولس جیری کےخلاف کامیابی حاصل کرناہوگی۔اس سے قبل پری کوارٹرفائنل میں پاک ڈچ جوڑی نے ٹومی روبریڈو اور جوم مونار پر مشتمل اسپینش جوڑی کو سٹریٹ سیٹس میں 7-5 اور 6-3 سے ہرا یاتھا۔